فوتو: strategy2050.kz

وسى جىلى مەملەكەت سپورتتى دامىتۋعا 49 ملرد تەڭگە بولەدى، بۇل وتكەن جىلعى سومامەن سالىستىرعاندا 70 ملن تەڭگەگە كوپ. دەنە شىنىقتىرۋ جانە سپورتپەن اينالىساتىنداردىڭ سانى 2014 جىلدان بەرى 25,1 پايىزدان 27,4 پايىزعا دەيىن ارتىپ، 2016 جىلى 4,8 ملن ادامدى قۇراعان. مۇنداي مالىمەتتى  Finprom.kz اگەنتتىگى كەلتىرىپ وتىر.  

ال وسى جىلدىڭ سوڭىنا قاراي ولاردىڭ سانى 28 پايىزدى، 2020 جىلى 30 پايىزدى قۇراۋى مۇمكىن. سونداي-اق، سپورتپەن اينالىساتىن جاسوسپىرىمدەر مەن بالالاردى قامتۋ 13 پايىزدان 15,3 پايىزعا دەيىن ارتقان.

مۇمكىندىگى شەكتەۋلى 644 تۇلعانىڭ (ەلدەگى جالپى حالىقتىڭ 3,6 پايىزى) 269-ىندا سپورتپەن اينالىسۋعا قارسى كورسەتكىشتەر جوق. بۇلاردىڭ ىشىندە دەنە شىنىقتىرۋ جانە سپورتپەن اينالىساتىنداردىڭ ۇلەسى 2014-2016 جىل ارالىعىندا 9,2 پايىزدان 10,2 پايىزعا دەيىن كوبەيگەن.

وسىلايشا ەشبىر ەكونوميكالىق جاعدايلارعا قاراماستان كاسىبي سپورتشىلار مەن وليمپيادا ويىنشىلارىنا بولىنگەن قارجى جىل سايىن ارتىپ وتىر. دەگەنمەن بۇقارالىق سپورت تۇرلەرىنە از قارجى بولىنگەن.

سپورتتى دامىتۋعا بولىنگەن بيۋدجەت قارجىسى. دەرەككوز: Finprom.kz

وسى جىلى كاسىبي سپورتشىلارعا بولىنەتىن قارجى وتكەن جىلعا قاراعاندا  2 ملرد تەڭگەگە ارتىق بولادى. ال قر ۇلتتىق قۇراما كومانداسىن سپورتتىق ءىس-شارالارعا دايىنداپ، قاتىستىرۋ ءۇشىن 17,4 ملرد تەڭگە بولىنەدى. وتكەن جىلى بولىنگەن قارجىعا قاراعاندا بۇل قاراجات ەكى ەسەدەن دە كوپ.

بۇقارالىق سپورت تۇرلەرىنىە كەلەر بولساق، وسى جىلى 7,2 ملرد تەڭگە بولىنگەن. ال كەلەسى جىلى بولىنەتىن 3 ەسەگە از بولماق، شامامەن 2,7 ملرد تەڭگەنى قۇرايدى. ايتا كەتەيىك، وسى جىلى سپورتقا قابىلەتتى بالالاردى وقىتۋعا جانە دايىنداۋعا 4,3 ملرد تەڭگە بولىنەدى.

جالپى قازاقستاندا بۇقارالىق سپورتتى دامىتۋداعى نەگىزگى ماسەلەلەردىڭ ءبىرى اۋىلدى جەرلەر مەن وڭىرلەردەگى ماتەريالدىق-تەحنيكالىق بازالاردىڭ جەتىسپەۋشىلىگى بولىپ وتىر. مىسالى اۋىلداعى تۇرعىنداردىڭ تەك 20-25 پايىزى عانا دەنە شىنىقتىرۋ جانە سپورتپەن اينالىسادى. سونداي-اق، سەلولىق وكرۋگتەردىڭ 33 پايىزىندا نۇسقاۋشىلار مەن ادىسكەرلەر جەتىسپەيدى.

“The Qazaq Times”