Apple kompaniyası qazaqstandıq «qauipsizdik sertifikatına» qarsı şara qoldandı.

Tamız ayınıñ 21-i küni AQŞ kompaniyası taratqan mälimet boyınşa,  Apple öziniñ Safari brauzerinde «qauipsizdik sertifikatınan» qorğaytın arnayı şaralar qabıldağan. Atap aytqanda kompaniya qazaqstandıq Qaznet Trust Network önimin senimdi sertifikattar tiziminen alıp tastağan.

Bwğan deyin Google men Mozilla kompaniyaları da özderiniñ Chrome jäne Firefox brauzerlerinde Qazaqstan biligi sınaqtan ötkizgen «qauipsizdik sertifikatına» qarsı şaralar qoldanğanın mälimdegen. Olar özderiniñ bwl şeşimderin «qoldanuşılardıñ jeke derekterin özgelerden qorğau jäne onlayn qauipsizdikti qamtamasız etu» dep tüsindirgen.

Şilde ayında qazaqstandıqtar wyalı baylanıs operatorlarınan «qauipsizdik sertifikatın ornatu» jöninde hattar ala bastağan. Bilik onı «kiberşabuıl men zañsız kontentke qarsı qwral» dep tüsindirgen. Tamız ayınıñ 7-i küni prezident Qasım-Jomart Toqaev Wlttıq qauipsizdik komiteti öziniñ tapsırması boyınşa «qauipsizdik sertifikatın» sınaqtan ötkizgendigin aytıp, Twitter paraqşasında mälimdeme jasadı.

"The Qazaq Times"