Apple كومپانياسى قازاقستاندىق «قاۋىپسىزدىك سەرتيفيكاتىنا» قارسى شارا قولداندى.

تامىز ايىنىڭ 21-ءى كۇنى اقش كومپانياسى تاراتقان مالىمەت بويىنشا،  Apple ءوزىنىڭ Safari براۋزەرىندە «قاۋىپسىزدىك سەرتيفيكاتىنان» قورعايتىن ارنايى شارالار قابىلداعان. اتاپ ايتقاندا كومپانيا قازاقستاندىق Qaznet Trust Network ءونىمىن سەنىمدى سەرتيفيكاتتار تىزىمىنەن الىپ تاستاعان.

بۇعان دەيىن Google مەن Mozilla كومپانيالارى دا وزدەرىنىڭ Chrome جانە Firefox براۋزەرلەرىندە قازاقستان بيلىگى سىناقتان وتكىزگەن «قاۋىپسىزدىك سەرتيفيكاتىنا» قارسى شارالار قولدانعانىن مالىمدەگەن. ولار وزدەرىنىڭ بۇل شەشىمدەرىن «قولدانۋشىلاردىڭ جەكە دەرەكتەرىن وزگەلەردەن قورعاۋ جانە ونلاين قاۋىپسىزدىكتى قامتاماسىز ەتۋ» دەپ تۇسىندىرگەن.

شىلدە ايىندا قازاقستاندىقتار ۇيالى بايلانىس وپەراتورلارىنان «قاۋىپسىزدىك سەرتيفيكاتىن ورناتۋ» جونىندە حاتتار الا باستاعان. بيلىك ونى «كيبەرشابۋىل مەن زاڭسىز كونتەنتكە قارسى قۇرال» دەپ تۇسىندىرگەن. تامىز ايىنىڭ 7-ءى كۇنى پرەزيدەنت قاسىم-جومارت توقاەۆ ۇلتتىق قاۋىپسىزدىك كوميتەتى ءوزىنىڭ تاپسىرماسى بويىنشا «قاۋىپسىزدىك سەرتيفيكاتىن» سىناقتان وتكىزگەندىگىن ايتىپ، Twitter پاراقشاسىندا مالىمدەمە جاسادى.

"The Qazaq Times"