Soñğı uaqıtta Özbekstanda bolıp jatqan jağdaylar özin jer betiniñ jartı qwdayı sanaytın sayasi elitalıq toptarğa sabaq bola ala ma?

Keñester odağı qwlağalı beri Ortalıq Aziya elderinde bilik basında otırğan adamdardıñ jaqın tuıstarınıñ sottaluı dästürge aynaldı. Jaqında Bişkek sotı Qırğızstannıñ twñğış prezidenti Asqar Aqaevtıñ küyeu balası Ädil Toyğanbaevtı sırttay 20 jılğa, eks-prezident Qwrmanbek Bakievtiñ wlı Maksim Bakievti ömir boyı bas bostandığınan ayırdı. 2008 jılı  Almatı qalasınıñ sotı Nwrswltan Nazarbaevtıñ küyeu balası Rahat Älievti qaytıs bolmay twrıp sırttay 40 jılğa sottağan edi.

Ortalıq Aziya elderi prezidentteriniñ tuıstarı isti bolu dästürin endi mine Özbekstan Respublikasınıñ twñğış prezidenti Islam Kärimovtiñ qızı Gülnara Kärimova jalğastırdı. Biraq Kärimovanıñ isi bwrınğı isterden özgerek bolıp twr. Sebebi bwğan deyingi osığan wqsas jağdaylardıñ barlığında prezidentterdiñ jaqındarın şet elderge qaşıp ketkennen keyin barıp sottağan edi. Al Gülnara Kärimovanı öz elinde altı birdey bap boyınşa küdikti dep tanıp, qamauğa aldı. Bwl Ortalıq Aziya, tipti TMD köleminde bolmağan jağday.

Qazirgi uaqıtta Gülnara Kärimovanıñ mañında bolıp jatqan jağday Ortalıq Aziya memleketteriniñ basqaruşı elitasınıñ kez kelgeninde boluı mümkin. Öytkeni Qırğızstan, Özbekstan, Täjikstan, Türkimenstan, Qazaqstan elderiniñ qay-qaysın alıp qarasañız barlığında da qauipsizdik kepili zañ nemese Konstituciya emes, jekelegen twlğalar, prezidentter, prem'erler tağısın tağılar. Bwl erteñ bilik auısatın kezde sayasi elitalar arasındağı qaqtığısta jeñiluşi tarapqa auır soqqı bolıp tieri haq. Bügingi Gülnara Kärimovanıñ qamauğa alınuı sol jeñiluşi taraptıñ körinisi. Osı uaqıtqa deyin Özbekstanda qwqıqtıq memleket qalıptastıruğa, zañdıq negizde täuelssiz sot jüyesin qwruğa qwlıqsızdıq tanıtıp kelgen Kärimova, endi sol olqılıqtıñ zardabın özi şegeyin dep otır. Sebebi keşe Islam Kärimov özine qarsı kelgen azamattıq belsendiler men täuelsiz jurnalisterdi jemqorlıqqa belşesinen batqan ädiletsiz sot jüyesimen qalay sottasa, bügingi bilik Gülnara Kärimovanı däl sonday jolmen temir tordıñ ar jağına jibermek.

Qorıta kelgende Täuelsizdik alğan 26 jıl işinde demokratiyanı belinen basıp, Konstituciyanı qalauınşa özgertip kele jatqan Qazaqstan biligi Gülnara Kärimova oqiğasınan sabaq ala aldı ma? Elde täuelsiz sot jüyesin qwru, azamattıq qoğam qalıptastıru birdi-ekili azamattıq belsendiler men oppoziciyalıq toptarğa ğana emes, bolaşaqta özderine de kerek ekendigin tüsindi me? Ol jağı bizge belgisiz. Bir bilerimiz qazirdiñ özinde Qazaqstanda keşegi bilik basında bolğan azamattar Gülnara Kärimovanıñ kebin kiip, isti bolıp sottalıp jatır. Erteñ joğarı lauazımdı qızmetinen ayırılğan bireudiñ wl-qızı qarjı jımqırdı degen ayıppen qamauda otır dese, tañ qalmaymız. Öytkeni demokratiya ayaqastı bolğan elde bilikke talas tek osınday jolmen ğana jüretini belgili.

“The Qazaq Times”