Jıl sayın Qazaqstanda Astana küni qarsañında aspannan milliondar jauatın kün bolatın boldı. Biılda qwday qazaq halqına däl Astana küni jaqındap qalğanda 18 millionınşı azamatın berdi.  

Biraq biıl qwdaydıñ bergen sıyın Almatı oblısınıñ äkimi Amandıq Batalov keş bayqaptı. Negizi Qazaqstannıñ 18 millionınşı twrğını Taldıqorğan qalasında mamırdıñ 11 küni düniege kelip qoyıptı. Alayda oblıs äkimi onı Astana küni qarsañında qwttıqtaudı jön körgen eken.

Foto: Informburo.kz

Qazaqstan Respublikasınıñ Wlttıq ekonomika ministrliginiñ statistika komitetiniñ mälimeti boyınşa, 2017 jıldıñ 11 mamırında Almatı oblısınıñ ortalığı Taldıqorğan qalasında QR 18 milionınşı azamatşası Muslima Samatqızı düniege kelgen eken. Osığan oray keşe oblıs äkimi Amandıq Batalov düniege kelgen Muslima Samatqızınıñ otbasın qwttıqtap, aldağı uaqıtta 3 bölmeli päter beriletindigi jayında aytqan.

Esteriñizde bolsa bıltır däl osı 4 şilde küni Astananıñ Saida Mwhamediyarova esimdi millionınşı twrğını düniege kelip, Nwrswltan Nazarbaev pen Astana qalasınıñ äkimi Äset Isekeşov Mwhamediyarovtar otbasın qwttıqtap, päterdiñ kiltin sıylağan edi.

Foto: Astana qalasınıñ baspasöz qızmetiniki

Biraq sol kezde QR wlttıq ekonomika ministrliginiñ saytında 2016 jıldıñ 1 mamır künine deyingi statistikası boyınşa, Astana halqınıñ sanı 880 mıñ adamdı qwraydı degen aqparat berilgen edi.

Alayda biıl Astana küni qarsañında qwdaydıñ bergen sıyına Batalov dayın bolmasa da, QR wlttıq ekonomika ministrliginiñ statistika komiteti saqaday say ekendigin bayqattı. Olar Almatı oblısınıñ äkiminen bwrın 2017 jıldıñ 11 mamırında Taldıqorğan qalasında Qazaqstannıñ 18 millionınşı azamatı Muslima Samatqızı düniege kelgendigi jayında mälimdep qoydı.

Ne de bolsa jıl sayın Qazaqstan biligi 6 şildege deyin millionınşı adamdarın sanasa, 6-nan keyin merekege şaşılğan milliondardı qazaq halqı sanay almay dal boladı. Bärin aytta, birin ayt äyteuir jıl ötken sayın Qazaqstan biligi 6 şılde qarsañında qarjı kapitalına emes adam kapitalına köbirek köñil bölip keledi.

“The Qazaq Times”