جىل سايىن قازاقستاندا استانا كۇنى قارساڭىندا اسپاننان ميلليوندار جاۋاتىن كۇن بولاتىن بولدى. بيىلدا قۇداي قازاق حالقىنا ءدال استانا كۇنى جاقىنداپ قالعاندا 18 ميلليونىنشى ازاماتىن بەردى.  

بىراق بيىل قۇدايدىڭ بەرگەن سىيىن الماتى وبلىسىنىڭ اكىمى اماندىق باتالوۆ كەش بايقاپتى. نەگىزى قازاقستاننىڭ 18 ميلليونىنشى تۇرعىنى تالدىقورعان قالاسىندا مامىردىڭ 11 كۇنى دۇنيەگە كەلىپ قويىپتى. الايدا وبلىس اكىمى ونى استانا كۇنى قارساڭىندا قۇتتىقتاۋدى ءجون كورگەن ەكەن.

فوتو: Informburo.kz

قازاقستان رەسپۋبليكاسىنىڭ ۇلتتىق ەكونوميكا مينيسترلىگىنىڭ ستاتيستيكا كوميتەتىنىڭ مالىمەتى بويىنشا، 2017 جىلدىڭ 11 مامىرىندا الماتى وبلىسىنىڭ ورتالىعى تالدىقورعان قالاسىندا قر 18 ميليونىنشى ازاماتشاسى مۋسليما ساماتقىزى دۇنيەگە كەلگەن ەكەن. وسىعان وراي كەشە وبلىس اكىمى اماندىق باتالوۆ دۇنيەگە كەلگەن مۋسليما ساماتقىزىنىڭ وتباسىن قۇتتىقتاپ، الداعى ۋاقىتتا 3 بولمەلى پاتەر بەرىلەتىندىگى جايىندا ايتقان.

ەستەرىڭىزدە بولسا بىلتىر ءدال وسى 4 شىلدە كۇنى استانانىڭ سايدا مۇحامەدياروۆا ەسىمدى ميلليونىنشى تۇرعىنى دۇنيەگە كەلىپ، نۇرسۇلتان نازارباەۆ پەن استانا قالاسىنىڭ اكىمى اسەت يسەكەشوۆ مۇحامەدياروۆتار وتباسىن قۇتتىقتاپ، پاتەردىڭ كىلتىن سىيلاعان ەدى.

فوتو: استانا قالاسىنىڭ ءباسپاسوز قىزمەتىنىكى

بىراق سول كەزدە قر ۇلتتىق ەكونوميكا مينيسترلىگىنىڭ سايتىندا 2016 جىلدىڭ 1 مامىر كۇنىنە دەيىنگى ستاتيستيكاسى بويىنشا، استانا حالقىنىڭ سانى 880 مىڭ ادامدى قۇرايدى دەگەن اقپارات بەرىلگەن ەدى.

الايدا بيىل استانا كۇنى قارساڭىندا قۇدايدىڭ بەرگەن سىيىنا باتالوۆ دايىن بولماسا دا، قر ۇلتتىق ەكونوميكا مينيسترلىگىنىڭ ستاتيستيكا كوميتەتى ساقاداي ساي ەكەندىگىن بايقاتتى. ولار الماتى وبلىسىنىڭ اكىمىنەن بۇرىن 2017 جىلدىڭ 11 مامىرىندا تالدىقورعان قالاسىندا قازاقستاننىڭ 18 ميلليونىنشى ازاماتى مۋسليما ساماتقىزى دۇنيەگە كەلگەندىگى جايىندا مالىمدەپ قويدى.

نە دە بولسا جىل سايىن قازاقستان بيلىگى 6 شىلدەگە دەيىن ميلليونىنشى ادامدارىن ساناسا، 6-نان كەيىن مەرەكەگە شاشىلعان ميلليونداردى قازاق حالقى ساناي الماي دال بولادى. ءبارىن ايتتا، ءبىرىن ايت ايتەۋىر جىل وتكەن سايىن قازاقستان بيلىگى 6 شىلدە قارساڭىندا قارجى كاپيتالىنا ەمەس ادام كاپيتالىنا كوبىرەك كوڭىل ءبولىپ كەلەدى.

“The Qazaq Times”