Körneki suret. Foto: Coronavirus2020.kz

Qazaqstanda koronavirus pen oğan wqsas pnevmoniyağa şaldıqqandar sanı tağı 4,4 mıñ artıp, jalpı esebi 900 mıñnan astı. Osılayşa Qazaqstan «jağımsız statistikada» düniejüzinde halqı eñ köp auırğan 36-şı memleket retinde birneşe aptadan beri öz ornında qalıp otır.

Törtinşi tolqın ekpindey bastağan şilde ayınıñ ortasına qaray täuliktik sırqattar sanı 5 mıñnıñ, tamızğa qaray 7 mıñnıñ üstine şıqqan, indet qarqını eki aptadan beri 4-5 mıñ keyske mañayladı.  Densaulıq saqtau ministrliginiñ resmi mälimetinşe, elde 8 qırküyekte koronavirus (KVI+) jwqqan 4106 adam, al 7-si küni  koronavirus pnevmoniyasına (KVI-) şaldıqqan 302 adam tirkeldi jäne seysenbide 103 qazaqstandıq (tañerteñ 86 adam delingen edi, DenMin tüzetuinen keyin aqparat öñdeldi – QT) aurudan qaytıs boldı. Qazir elde 84 mıñ adam (KVI+ boyınşa 76 mıñ, KVI- boyınşa 8 mıñday) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 24%-ı ädettegidey joğarı dinamikada twrğan bir ğana Almatı (976) qalasına tiesili. Seysenbige qarağanda keşe Qarağandı (529), Almatı (330), ŞQO (201), Atırau (127), BQO (124) öñirlerinde nauqastar sanı kürt arttı.  Al astana (329), Pavlodar (229), Aqtöbe (222), Aqmola (201), Mañğıstau (185), Qostanay (178) oblıstarında epidahual eleuli därejede özgere qoymadı. Şımkent (150), Qızılorda (92), SQO (81), Jambıl (79), Türkistan (53) öñirlerinde dert qarqını twraqtı. Keşe, särsenbide aurudan ayıqqan 6926 adam üyine şığarılğan. 7 qırküyekte jiını 89 adam qaytıs bolğan.

#COVID_pnevmoniyası Qırküyektiñ 7-si aqparatı bir täulikke keşigip beriletin koronavirus pnevmoniyasına şaldıqqan 302 nauqas esepke alındı. Vedomstvo dereginşe, bwl küni sırqattar Almatı (59) oblısı,  Şımkent (47), Jambıl (40), Atırau (20), Mañğıstau (20) oblıstarı men Almatı (19) qalasında köptep anıqtalğan. Sonımen qosa, 132 adam ayığıp şıqqan, tağı 14 adam köz jwmğan.

#Jalpı  DenMin deregine qarağanda, emdelip jatqan 84 mıñ nauqastıñ 18 mıñı auruhanada, 65 mıñı ambulatorlıq baqılauda. 1390 nauqastıñ jağdayı naşar, ondağı 346 adamnıñ häli öte auır. Bwdan özge 197 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Türkistan oblısınan basqa ŞQO, SQO, Jambıl, Qızılorda öñirleri «sarı aymaqqa» ötken. Basqa 12 aymaq twtastay «qızıl aymaqta» twr.

DenMinniñ QT redakciyasına bergen mälimetinşe, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Üş ayda bas-ayağı 420 mıñ adam auırsa, 6,6 mıñnan asa adam köz jwmdı.

Bıltır 13 naurızdan beri COVID-19 infekciyasın jwqtırğandar qatarı 828 mıñnan assa, 1 tamızdan bılayğı koronavirus pnevmoniyası 72 mıñğa juıqtağan. DDSW derekqorı men Wlttıq statistikada Qazaqstanda auırğandar sanı 900 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 17,3 mıñnan asa adam (KVI+ / U07.1 – 10 076, KVI- / U07.2 – 4611, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 36-orınğa ornıqtı.

Ükimettiñ soñğı deregine qarağanda, Qazaqstanda 5,7 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 6,9 mln-nan asadı.

The Qazaq Times