Auıl şaruaşılığı ministri mindetin atqaruşı Erbol Qaraşökeev. Foto: Qızılorda oblısı äkimdiginiñ baspasöz qızmeti

Qazaqstanda qwrğaqşılıq saldarınan 178,8 mıñ gektar egis joyılğan. Sonımen qosa, ministrlik küzgi jiın-terim işki-sırtqı narıqtı qatar jarılqaydı dep sendiredi.

Särsenbi küni, 18 tamızda ötken dästürli ükimet otırısında auıl şaruaşılığı salasınıñ uaqıtşa ministri Erbol Qaraşökeev mälimetinşe, biıl Qazaqstanda 23 million gektarğa egis egilgen.

«13,2 million gektarda nemese dändi daqıldardıñ jalpı köleminiñ 85%-ında jaqsı jäne qanağattanarlıq küyde. 2,1 million gektarda nemese 13,7%-da naşar küyde, 178,8 mıñ gektarda nemese 1,1%-nda egister joyılğan» dedi ministr mindetin atqaruşı.

Qaraşökeev klimattıñ özgerui saldarınan Qazaqstan ğana emes, astıq derjavaları Kanada, AQŞ, Resey de ziyan şegip otırğanın alğa tartıp, aqtau argumentin bildirdi. Şeneunik iek arta söylegen sözinde biıl Kanadada bidaydıñ jalpı tüsimi ötken jılmen salıstırğand 30,6%, AQŞ-ta 4,4%, Reseyde 15%-ğa ortayadı degen derek keltirdi.

Qaraşökeevtiñ boljamına qarağanda, biıl Qazaqstanda 15,3 million tonna dändi daqıl jinaladı. Oğan qosa qambada aldıñğı jıldardan qalğan 3,1 million tonna astıq bar.

Şaruanıñ basına kelgen uaqıtşa ministr biıl öndiriletin astıq bärine, işki narıq pen esportqa jetetin boladı dep uäde berdi. Bwğan wqsas sözdi bügin ükimet basşısı Asqar Mamin de qaytalağan.

«Alda jinalatın astıq kölemi eldiñ azıq-tülik qauipsizdigin qamtamasız etip qana qoymay, Qazaqstannıñ eksport narığındağı poziciyasın saqtap twruğa da mümkindik beredi»,  – deydi Erbol Qaraşökeev.

Ükimet otırısında Qaraşökeev bwl eki oblısqa mal azığına jwmsalğan şığınnıñ ötemi retinde ükimet rezervinen 3,8 mlrd bölingenin, tağı 5,3 mlrd teñge bölu jöninde şeşim qabıldanğanın ayttı. Ministrilik basşısınıñ sözinşe, bwğan qosımşa retinde jergilikti byudjetterden 9,1 mlrd teñge bölingen, oblıs basşıları qosımşa 4,5 mlrd teñge bölu qarastırıp otır.

Biıl Qazaqstandı 30 jılda bolmağan su tapşılığı men qwrğaqşılıq jaylap, kökönis pen astıq bağası şarıqtap, oñtüstik-batıs öñirlerde şöp şıqpay mal qırıldı.

Quañşılıqtan qattı qatalağan Mañğıstau jäne Qızılorda oblıstarında jwrt jem-şöptiñ joqtığın qoldağı malınan ayırılıp qaldı. Şığınnıñ da, aram ölgen mal basınıñ da esebi naqtı emes. Resmi statistikanıñ özi qayşılıqqa tolı.

The Qazaq Times