Auıl şaruaşılığı minitsri Erbol Qaraşökeev baspasöz konferenciyasında. 18 qazan 2021 jıl. Foto: OKQ

Auıl şaruaşılığı minitsri Erbol Qaraşökeev äleumettik mañızı bar azıq-tülikter qorı sarqılmasa da bağanıñ ösetinin jasırmadı.

Köktemge qaray Qazaqstannıñ işki narığında et bağası ösui ıqtimal. Bwl qazir jem-şöp bağasınıñ artuına baylanıstı. «Dese de et bağası köp öspeydi degen boljamımız bar», – dep mälimdedi auıl şaruaşılığı ministri Qaraşökeev OrtKom alañında ötken brifingte.

«Qazaqstannıñ auıl şaruaşılığı keşeni eldi etpen – 100%, siır eti – 97%, qoy eti – 100%, jılqı etimen – 97,5% qamtamasız etti. YAğni, işki swranıstı özimizdiñ önimmen tolıq qamtıp otırmız. Sondıqtan bizde importpen şetelden äkelinetin et kölemi köp emes. Al bağasına toqtalatın bolsaq, biıl jem-şöp bağasınıñ öskenin bilesizder. Sol sebepti et bağasınıñ ösui ıqtimal. Öytkeni, et öndirip jatqan qojalıqtar men şarua qojalıqtarı şığındarınıñ barlığın öteui kerek. Biraq asa joğarı ösim bolmaytın şığar», – dedi Erbol Qaraşökeev.

Bir jıldıñ işinde qoydıñ eti qattı qımbattağan. Onıñ bağası birden 14,9% köterildi. Odan keyin jılqı eti – 9,4%, siır eti — 7,8%, şoşqa eti — 7,4%, al qws eti 3,2% qımbattadı.

Sonımen qatar, ministr äleumettik nan bağasınıñ kürt ösuine jol bermeytinin mälimdedi. Aytuınşa, bwl üşin qajetti barlıq qwral men ötken jıldan qalğan 1 mln tonnağa juıq qor bar. Jıl sayın bwl qor nan bağasın twraqtandıru üşin ğana emes, mal şaruaşılığı keşenine qoldau bildiru üşin de qoldanıladı.

«Biıl azıq-tülik kelisimşart korporaciyası forvardtıq satıp alu şarttarı boyınşa 680 mıñ tonna biday satıp alamız dep josparlap otırmız. Sol kölemniñ 60%-ğa juığın satıp alıp, qoymalarımızğa äkelip aldıq. 1-2 ay işinde qajetti kölemdi tolıqtay satıp alıp, jemdi de jinap şığamız. Memlekettik qorda bıltırdan qalğan 400 mıñ tonnaday jem bar. Sonı qosqanda bizdegi qor wnmen jäne wnnan jasalatın basqa da tauarlarmen qamtamasız etuge tolıqtay jetkilikti. Al bağasına keletin bolsaq, Qazaqstan boyınşa äleumettik mañızı bar tauarlar tizimi bar. Sol tauarlar tiziminen nandı alsaq, birinşi sorttağı wnnan jasalatın, salmağı 552 gramm bolatın bölkeniñ bağası köterilip ketpeui üşin talay jwmıs jasap jatırmız. Twraqtandıru qorı öz kezeginde qajet kölemde wndı jinap, satıp alıp jatır. Sonday-aq, kelisimşart korporaciyasımen memlekettik qorğa jinalatın bidaydı arzandatu mümkinşiligin qarastırıp jatırmız. Ol üşin zañnama negizdemesine özgeris engizemiz», – dep tüsindirdi Erbol Qaraşökeev.

Sonday-aq, ministr osı jinalğan qordan iri kompaniyalar men nan pisiretin käsiporındarğa wn jiberiletinin ayttı. Osılayşa äleumettik nan bağası twraqtı boladı.

The Qazaq Times