Körneki suret. Foto: aşıq derekköz

QT redakciyası birneşe aydan beri swrap kele jatqan vakcina salu nauqanına bölingen qarajattıñ esebi turalı saualğa Densaulıq saqtau ministrligi jauap berdi. Vedomstvonıñ baspasöz hatşısı Äsel Artıqşinova wsınğan resmi mälimette biıl koronaviruspen küresuge jalpı jiını 313,3 mlrd teñge bölingeni körsetilgen. Halıq qazınasınan bölingen qomaqtı qarajat qayda jwmsalmaq? Ükimet josparın nege eki ret özgertti? 

Ötken köktemde Ükimet koronavirusqa qarsı bölingen qarjınıñ esebin eki ret özgertti. «Estuşi Ükimettiñ» ekioylı bolu sebebin anıqtap körelik. Naurızda qabıldanğan qaulığa baylanıstı qarjı kölemi 228,3 mlrd teñgeden 313, 3 mlrd somağa deyin artqan. Üstine qosılğanı – 85 mlrd teñge. Bastapqıda Ükimet rezervinen 50,2 mlrd teñge qarastırılsa, keyin bwl 100,4 mlrd-qa wlğaydı. Naurızda bekitilgen jospar boyınşa, biılğa 9,9 mln adamğa 49,6 mlrd teñgege vakcina, 600 mln teñgege şpric satıp alınbaq bolğan. Bwl qarjınıñ 18 mlrd teñgesine 2 mlrd 60 mln adamğa «Sputnik V» jäne 31,6 mlrd teñgege 15 mln 680 mıñ adamğa QazCovid-in ekpesin alu josparlanğan edi. Biraq Ükimet otandıq vakcina öndirisiniñ äleuetin artıq bağalap qoyğanın keş te bolsa wğınıp, mejeni özgertti.

Twzdıq: 21 säuirde densaulıq saqtau vice-ministri Jandos Bürkitbaev QT redakciyasına bergen jauabında «Qazaqstan Respublikası Ükimetiniñ rezervinen qarajat bölu turalı» 31 naurızdağı qaulığa säykes vakcinaciya nauqanında qoldanatın qwraldarğa 50 mlrd 229 mln teñge qarajat bölingenin habarlağan. Biraq (redakciya mäseleni birneşe ay kötergennen keyin) 28 şildede ministr Aleksey Coy tilşige äuelde 7 mln 840 mıñ adamğa salınadı dep josparlanğan QazVac vakcinasınıñ kölemi men byudjeti keminde 5 ese qısqarğanın mälimdedi. Otandıq ekpe öndirisine biıl endi 31 mlrd emes, 6 mlrd jwmsaladı. Säykesinşe, 15 mln 680 mıñ dozanıñ ornına 3 mln komponent şığarıladı.

Rezervten qayta ajıratılğan 95,3 mlrd teñge qarjığa tört vakcina öndiruşisinen («Sputnik V», QazVac/ QazCovid-in, Coronavac, Sinopharm – tolığıraq İ tarmaqta) 10 mln 890 mıñ adamğa arnap ekpe alınadı. Alayda bwl qatarğa qazan ayında 2 mln dozası jetkizilui tiis Pfizer vakcinası enbegen.

Respublikalıq byudjetten bölinetin qarjığa 21,5 mlrd teñge qosılğan, yağni 160,7-den 182,2 mlrd teñgege deyin köbeygen. Negizgi ösgeris – karantin şaraların iske asıruğa jäne koronaviruspen küresetin medqızmetkerlerdiñ üstemaqısın töleuge qarastırılğan 68,1 mlrd teñge 89,6 mlrd teñgege artqan. Qazan ayında medqızmetkerlerge beriletin üstemaqı birjola toqtaytının jäne sol merzimge deyin 10 mln azamatqa vakcina salınatının, soğan oray karantin şarasınıñ asa qajet bola qoymasın eskersek, däl osı bağıttağı qarjınıñ köptep bölinu sebebi tüsiniksiz.

Qazaqstan Ükimetiniñ koronavirus pandemiyasına qarsı küresuge bağıttalğan ekinşi jılğa bölgen 313,3 mlrd teñgeniñ esebi:

İ. Ondağı 100,4 mlrd teñge Ükimet rezervinen qarastırılğan. Bwl qarajattıñ 95%-ğa juığı, yağni 95,3 mlrd teñge 10 mln 890 mıñ adamdı immundauğa jwmsalmaq. Taratıp aytsaq:

  • 7 mln 140 mıñ azamatqa arnalğan 14 mln 280 mıñ doza (bir adamğa eki doza salınadı – QT) reseylik (Qarağandı zauıtında qaptaladı) Sputnik V ekpesi – 70 mlrd 80 mln 926 mıñ teñgege;
  • 1 mln 500 mıñ azamattı egu üşin 3 mln doza otandıq QazVac vakcinası – 6 mlrd 48 mıñ teñgege;
  • 250 mıñ azamatqa arnap 500 mıñ dozadan twratın qıtaylıq Coronavac espesi – 3 mlrd 572 mln 535 mıñ teñgege;
  • 2 mln adamğa 4 mln dozalı qos komponentten twratın tağı bir Qıtaydıñ Sinopharm ekpesi – 15 mlrd 699 mln 248 mıñ teñgege;
  • Ekpe salatın şpircter – 600 mln teñgege;
  • Infekciyalıq virusqa PHK zerthanalıq taldauı – 4 mlrd 500 mln teñgege  satıp alu josparlanğan.

İİ. 182 mlrd 200 mln teñge respublikalıq byudjetten bölingen:

  • Koronaviruspen küresip jürgen medqızmetkerlerge tölenetin üstemaqığa – 89 mlrd 600 mln teñge;
  • Medicinalıq qızmetterdiñ aqısı retinde – 80 mlrd 400 mln teñge;
  • Sanitariyalıq-epidemiologiyalıq baqılau komiteti mamandarınıñ jwmıs saparına – 100 mln teñge;
  • Medicinalıq-sanitariyalıq alğaşqı kömek (MSAK) körsetetin wyımdardağı qızmetkerlerdi jeke qorğanış qwraldarımen (JQQ) qamtuğa – 12 mlrd 100 mln teñge.

İİİ. Medicinalıq qızmetterdi töleuge MÄMS şeñberinde 17 mlrd 300 mln teñge ajıratılğan.

IV. Kvazimemlekettik sektordağı kompaniyalardıñ basın qosatın «Samwrıq-Qazına» wlttıq äl-auqat qorınan 500 mıñ adamğa 13 mlrd 400 mln teñgege Qıtay-BAÄ elderiniñ birlesken önimi Hayat-Vax vakcinasınıñ 1 mln dozası satıp alındı.

Ministrlik mälimetinşe, bıltır osı bağıttarğa jiıntıq esebi 252 mlrd 2 mln teñge jwmsalğan. Aytap aytqanda: Ükimet rezervinen 28 mlrd 9 mln teñge (JQQ, därilik zattar, medbwyımdar, zerthanalıq qwraldar, test sınamaları t.b.), respublikalıq byudjetten 197 mlrd 800 mln (medqızmetkerlerdiñ üstemaqısına 115 mlrd 800 mln, medqızmetterge 67 mlrd, şwğıl boy kötergen 3 modul'di auruhananıñ qwrılısına 14 mlrd 800 mln, SEBK (el auzında SES atalıp ketken) mamandarınıñ issapar şığındarına 200 mln), byudjetten tıs 5 mlrd 100 mln (240 dana ÖJJ men 87 vibroakustika apparatın aluğa), MÄMS-ten 20 mlrd 400 mln (medicinalıq qızmetterdiñ tölemine) teñge bölingen.

Bıltır 13 naurızdan beri COVID-19 infekciyasın jwqtırğandar qatarı 715 mıñnan, 1 tamızdan bılayğı koronavirus pnevmoniyası 66 mıñnan asqan. DDSW derekqorı men Wlttıq statistikada Qazaqstanda auırğandar sanı 782,5 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardan 14,7 mıñ adam (KVI+ / U07.1 – 7988, KVI- / U07.2 – 4129, ilespe aurulardan – 2633) qaytıs bolğan. Sonımen qosa, Qazaqstanda 4,8 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 6,2 millionnan asadı.

The Qazaq Times