QT رەداكتسياسى بىرنەشە ايدان بەرى سۇراپ كەلە جاتقان ۆاكتسينا سالۋ ناۋقانىنا بولىنگەن قاراجاتتىڭ ەسەبى تۋرالى ساۋالعا دەنساۋلىق ساقتاۋ مينيسترلىگى جاۋاپ بەردى. ۆەدومستۆونىڭ ءباسپاسوز حاتشىسى اسەل ارتىقشينوۆا ۇسىنعان رەسمي مالىمەتتە بيىل كوروناۆيرۋسپەن كۇرەسۋگە جالپى جيىنى 313,3 ملرد تەڭگە بولىنگەنى كورسەتىلگەن. حالىق قازىناسىنان بولىنگەن قوماقتى قاراجات قايدا جۇمسالماق؟ ۇكىمەت جوسپارىن نەگە ەكى رەت وزگەرتتى؟ 

وتكەن كوكتەمدە ۇكىمەت كوروناۆيرۋسقا قارسى بولىنگەن قارجىنىڭ ەسەبىن ەكى رەت وزگەرتتى. «ەستۋشى ۇكىمەتتىڭ» ەكىويلى بولۋ سەبەبىن انىقتاپ كورەلىك. ناۋرىزدا قابىلدانعان قاۋلىعا بايلانىستى قارجى كولەمى 228,3 ملرد تەڭگەدەن 313, 3 ملرد سوماعا دەيىن ارتقان. ۇستىنە قوسىلعانى – 85 ملرد تەڭگە. باستاپقىدا ۇكىمەت رەزەرۆىنەن 50,2 ملرد تەڭگە قاراستىرىلسا، كەيىن بۇل 100,4 ملرد-قا ۇلعايدى. ناۋرىزدا بەكىتىلگەن جوسپار بويىنشا، بيىلعا 9,9 ملن ادامعا 49,6 ملرد تەڭگەگە ۆاكتسينا، 600 ملن تەڭگەگە شپريتس ساتىپ الىنباق بولعان. بۇل قارجىنىڭ 18 ملرد تەڭگەسىنە 2 ملرد 60 ملن ادامعا «سپۋتنيك V» جانە 31,6 ملرد تەڭگەگە 15 ملن 680 مىڭ ادامعا QazCovid-in ەكپەسىن الۋ جوسپارلانعان ەدى. بىراق ۇكىمەت وتاندىق ۆاكتسينا ءوندىرىسىنىڭ الەۋەتىن ارتىق باعالاپ قويعانىن كەش تە بولسا ۇعىنىپ، مەجەنى وزگەرتتى.

تۇزدىق: 21 ساۋىردە دەنساۋلىق ساقتاۋ ۆيتسە-ءمينيسترى جاندوس بۇركىتباەۆ QT رەداكتسياسىنا بەرگەن جاۋابىندا «قازاقستان رەسپۋبليكاسى ۇكىمەتىنىڭ رەزەرۆىنەن قاراجات ءبولۋ تۋرالى» 31 ناۋرىزداعى قاۋلىعا سايكەس ۆاكتسيناتسيا ناۋقانىندا قولداناتىن قۇرالدارعا 50 ملرد 229 ملن تەڭگە قاراجات بولىنگەنىن حابارلاعان. بىراق (رەداكتسيا ماسەلەنى بىرنەشە اي كوتەرگەننەن كەيىن) 28 شىلدەدە مينيستر الەكسەي تسوي تىلشىگە اۋەلدە 7 ملن 840 مىڭ ادامعا سالىنادى دەپ جوسپارلانعان QazVac ۆاكتسيناسىنىڭ كولەمى مەن بيۋدجەتى كەمىندە 5 ەسە قىسقارعانىن مالىمدەدى. وتاندىق ەكپە وندىرىسىنە بيىل ەندى 31 ملرد ەمەس، 6 ملرد جۇمسالادى. سايكەسىنشە، 15 ملن 680 مىڭ دوزانىڭ ورنىنا 3 ملن كومپونەنت شىعارىلادى.

رەزەرۆتەن قايتا اجىراتىلعان 95,3 ملرد تەڭگە قارجىعا ءتورت ۆاكتسينا وندىرۋشىسىنەن («سپۋتنيك V»، QazVac/ QazCovid-in, Coronavac, Sinopharm – تولىعىراق ءى تارماقتا) 10 ملن 890 مىڭ ادامعا ارناپ ەكپە الىنادى. الايدا بۇل قاتارعا قازان ايىندا 2 ملن دوزاسى جەتكىزىلۋى ءتيىس Pfizer ۆاكتسيناسى ەنبەگەن.

رەسپۋبليكالىق بيۋدجەتتەن بولىنەتىن قارجىعا 21,5 ملرد تەڭگە قوسىلعان، ياعني 160,7-دەن 182,2 ملرد تەڭگەگە دەيىن كوبەيگەن. نەگىزگى وسگەرىس – كارانتين شارالارىن ىسكە اسىرۋعا جانە كوروناۆيرۋسپەن كۇرەسەتىن مەدقىزمەتكەرلەردىڭ ۇستەماقىسىن تولەۋگە قاراستىرىلعان 68,1 ملرد تەڭگە 89,6 ملرد تەڭگەگە ارتقان. قازان ايىندا مەدقىزمەتكەرلەرگە بەرىلەتىن ۇستەماقى ءبىرجولا توقتايتىنىن جانە سول مەرزىمگە دەيىن 10 ملن ازاماتقا ۆاكتسينا سالىناتىنىن، سوعان وراي كارانتين شاراسىنىڭ اسا قاجەت بولا قويماسىن ەسكەرسەك، ءدال وسى باعىتتاعى قارجىنىڭ كوپتەپ ءبولىنۋ سەبەبى تۇسىنىكسىز.

قازاقستان ۇكىمەتىنىڭ كوروناۆيرۋس پاندەمياسىنا قارسى كۇرەسۋگە باعىتتالعان ەكىنشى جىلعا بولگەن 313,3 ملرد تەڭگەنىڭ ەسەبى:

ءى. ونداعى 100,4 ملرد تەڭگە ۇكىمەت رەزەرۆىنەن قاراستىرىلعان. بۇل قاراجاتتىڭ 95%-عا جۋىعى، ياعني 95,3 ملرد تەڭگە 10 ملن 890 مىڭ ادامدى يممۋنداۋعا جۇمسالماق. تاراتىپ ايتساق:

  • 7 ملن 140 مىڭ ازاماتقا ارنالعان 14 ملن 280 مىڭ دوزا ء(بىر ادامعا ەكى دوزا سالىنادى – QT) رەسەيلىك (قاراعاندى زاۋىتىندا قاپتالادى) سپۋتنيك V ەكپەسى – 70 ملرد 80 ملن 926 مىڭ تەڭگەگە;
  • 1 ملن 500 مىڭ ازاماتتى ەگۋ ءۇشىن 3 ملن دوزا وتاندىق QazVac ۆاكتسيناسى – 6 ملرد 48 مىڭ تەڭگەگە;
  • 250 مىڭ ازاماتقا ارناپ 500 مىڭ دوزادان تۇراتىن قىتايلىق Coronavac ەسپەسى – 3 ملرد 572 ملن 535 مىڭ تەڭگەگە;
  • 2 ملن ادامعا 4 ملن دوزالى قوس كومپونەنتتەن تۇراتىن تاعى ءبىر قىتايدىڭ Sinopharm ەكپەسى – 15 ملرد 699 ملن 248 مىڭ تەڭگەگە;
  • ەكپە سالاتىن شپيرتستەر – 600 ملن تەڭگەگە;
  • ينفەكتسيالىق ۆيرۋسقا PHK زەرتحانالىق تالداۋى – 4 ملرد 500 ملن تەڭگەگە  ساتىپ الۋ جوسپارلانعان.

ءىى. 182 ملرد 200 ملن تەڭگە رەسپۋبليكالىق بيۋدجەتتەن بولىنگەن:

  • كوروناۆيرۋسپەن كۇرەسىپ جۇرگەن مەدقىزمەتكەرلەرگە تولەنەتىن ۇستەماقىعا – 89 ملرد 600 ملن تەڭگە;
  • مەديتسينالىق قىزمەتتەردىڭ اقىسى رەتىندە – 80 ملرد 400 ملن تەڭگە;
  • سانيتاريالىق-ەپيدەميولوگيالىق باقىلاۋ كوميتەتى ماماندارىنىڭ جۇمىس ساپارىنا – 100 ملن تەڭگە;
  • مەديتسينالىق-سانيتاريالىق العاشقى كومەك (مساك) كورسەتەتىن ۇيىمدارداعى قىزمەتكەرلەردى جەكە قورعانىش قۇرالدارىمەن (جقق) قامتۋعا – 12 ملرد 100 ملن تەڭگە.

ءىىى. مەديتسينالىق قىزمەتتەردى تولەۋگە ءمامس شەڭبەرىندە 17 ملرد 300 ملن تەڭگە اجىراتىلعان.

IV. كۆازيمەملەكەتتىك سەكتورداعى كومپانيالاردىڭ باسىن قوساتىن «سامۇرىق-قازىنا» ۇلتتىق ءال-اۋقات قورىنان 500 مىڭ ادامعا 13 ملرد 400 ملن تەڭگەگە قىتاي-ءباا ەلدەرىنىڭ بىرلەسكەن ءونىمى Hayat-Vax ۆاكتسيناسىنىڭ 1 ملن دوزاسى ساتىپ الىندى.

مينيسترلىك مالىمەتىنشە، بىلتىر وسى باعىتتارعا جيىنتىق ەسەبى 252 ملرد 2 ملن تەڭگە جۇمسالعان. ايتاپ ايتقاندا: ۇكىمەت رەزەرۆىنەن 28 ملرد 9 ملن تەڭگە (جقق، دارىلىك زاتتار، مەدبۇيىمدار، زەرتحانالىق قۇرالدار، تەست سىنامالارى ت.ب.), رەسپۋبليكالىق بيۋدجەتتەن 197 ملرد 800 ملن (مەدقىزمەتكەرلەردىڭ ۇستەماقىسىنا 115 ملرد 800 ملن، مەدقىزمەتتەرگە 67 ملرد، شۇعىل بوي كوتەرگەن 3 ءمودۋلدى اۋرۋحانانىڭ قۇرىلىسىنا 14 ملرد 800 ملن، سەبك (ەل اۋزىندا سەس اتالىپ كەتكەن) ماماندارىنىڭ ءىسساپار شىعىندارىنا 200 ملن), بيۋدجەتتەن تىس 5 ملرد 100 ملن (240 دانا ءوجج مەن 87 ۆيبرواكۋستيكا اپپاراتىن الۋعا), ءمامس-تەن 20 ملرد 400 ملن (مەديتسينالىق قىزمەتتەردىڭ تولەمىنە) تەڭگە بولىنگەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 715 مىڭنان، 1 تامىزدان بىلايعى كوروناۆيرۋس پنەۆمونياسى 66 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 782,5 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردان 14,7 مىڭ ادام (كۆي+ / U07.1 – 7988, كۆي- / U07.2 – 4129, ىلەسپە اۋرۋلاردان – 2633) قايتىس بولعان. سونىمەن قوسا، قازاقستاندا 4,8 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 6,2 ميلليوننان اسادى.

The Qazaq Times