ينفەكتسيا جۇقتىرعان ناۋقاستارعا ارنالعان جالپى پالاتاداعى توسەك. ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ تۇركسىب اۋدانىنداعى فيليالى. الماتى قالاسى. 25 ناۋرىز 2021 جىل. فوتو: QT / كۇلتەگىن اسپانۇلى

تاۋلىگىنە 7 مىڭنان استام سىرقات انىىقتالىپ جاتقان تۇستا بيلىك كوروناۆيرۋستان ەمدەۋگە ارنالعان اۋرۋحانالارداعى توسەك-ورىن سانىن كوبەيتە الماي وتىر. ءتۇرلى جاعدايدا اۋىرىپ جاتقان 82 مىڭ ادام ۇيدە ەمدەلۋگە ءماجبۇر. تامىز ايىنىڭ العاشقى دەكاداسىندا 79 مىڭنان اسا سىرقات تىركەلىپ، 1269 ادام كوز جۇمدى.

11 تامىز تاڭدا وتكەن ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي رەسپۋبليكا مەن وڭىرلەردەگى كوۆيدتىك توسەك-ورىن قورىنىڭ جۇكتەمەسى تۋرالى باياندادى.

«كۇندەلىكتى مونيتورينگ مالىمەتى بويىنشا، وڭىرلەردە ورنالاسقان 328 مەديتسينالىق نىساندا بارلىعى 55 658 ورىن بار. 10 تامىزداعى دەرەككە ساي، رەسپۋبليكادا توسەك-ورىن قورىنىڭ 54%-ى تولدى. ايماقتار اراسىندا ەڭ اۋىر جۇكتەمە اتىراۋ وبلىسى مەن استانادا، ارقايسىندا 69% توسەك-ورىن تولعان. سونداي-اق، اقتوبە وڭىرىندە 65%-عا، الماتى قالاسى مەن جامبىل وبلىسى ارقايسىنىڭ 63%-ىندا ناۋقاستار جاتىر»، – دەدى تسوي.

قازىرگى كەزدە قازاقستاندا 112 843 ادام اۋىرىپ جاتىر. ونىڭ 30 181-ءى اۋرۋحانادا ەمدەلۋدە، قالعان 82 662 ادام امبۋلاتوريالىق باقىلاۋعا الىنعان. ولاردى بيلىك ءۇي جاعدايىندا ەمدەلۋ قاجەت دەپ ەسەپتەيدى.

ينفەكتسيالىق ستاتسيونارلارداعى رەانيماتسيا بولىمدەرىندە 4969 توسەك-ورىن جۇمىسقا قوسىلعان. ونىڭ 45%-ى قولدانىلىپ جاتىر.

ءمينيستردىڭ ايتۋىنشا،ەلدە ەپيدەميولوگيالىق احۋال ناشارلاعان جاعدايدا قوسالقى 7419 ورىن دايىندالعان.

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى شامامەن 8,2 مىڭعا ارتىپ، جالپى ەسەبى 720 مىڭنان استى. تەك شىلدە ايىندا 154 مىڭ ادام سىرقاتتانىپ، 1932 ادام (كۆي+ 1644, كۆي- 288) قايتىس بولعان. شىلدە ايىنىڭ ورتاسىنا قاراي تاۋلىكتىك كورسەتكىشى 5 مىڭنىڭ ۇستىنە شىققان ىندەتتىڭ ءتورتىنشى تولقىنىندا قازىر كەمىندە 7 مىڭ جاعداي تىركەلىپ جاتىر.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 656 مىڭنان، 1 تامىزدان بىلايعى كوروناۆيرۋس پنەۆمونياسى 64 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 720 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك قاراستىرادى. سونىمەن قاتار، پاندەميا باستالعالى جالپى ۆيرۋس جۇققانداردان 13,6 مىڭ ادام (كۆي+ / U07.1 – 7103, كۆي- / U07.2 – 3949, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، ساراپشىلار مەن دارىگەرلەردىڭ نارازىلىعىنا قاراماستان، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.

"The Qazaq Times"