Rejisserdiñ janaza räsimine jwrt köp jinaldı. Foto: Azattıq Radiosınıñ paraqşasınan.

Bügin, 30 şilde küni Almatı jwrtı rejisser, oppoziciya qayratkeri Bolat Atabaevtı aqtıq saparğa şığarıp saldı. Ziyalı qauım arasınan halıq jağında twrğan sanaulı twlğanıñ biri Atabaevtıñ janazasına karantin talaptarına qaramastan qalıñ jwrt jinaldı.

Rejisserdiñ öz üyiniñ aldında ötelgen janaza räsimine äriptesteri, birqatar qoğam qayratkerleri jäne qoğam belsendileri de qatıstı. Olar aytulı twlğağa aza twtıp, jaqındarına köñil ayttı. Azattıq radiosınıñ mälimetine qarağanda, jinalğandar arasında birli-jarım bilik ökilderi de bolğan.

29 şilde küni baqilıq bolğan marqwmnıñ qazası qazaq eline, sonıñ işinde ziyalı qauım men azamattıq qoğam ökilderin, öner men ädebiet ökilderine ayrıqşa auır tidi. Bolat Atabaev bıltır ğana nauqasına baylanıstı auır operaciyadan şıqqan bolatın.

Körnekti twlğa halıq jağında twrıp, bilikke aşıq sın-pikir aytqan sanaulı ziyalı qauım ökiliniñ biri. 2011 jılı «Jañaözen oqiğası» kezinde bilik jağınan qamauğa alınıp, artınşa bosatılğan. Bilik tarabınan jasalğan qısımğa baylanıstı Germaniyağa ketuge mäjbür bolğan edi. Soñğı birer jılda ğana elge oralğan Bolat Atabaev soñğı uaqıttarda teatr salasında özinen keyingi buınğa täjiribelerimen bölisip jürgen.

Ornı tolmas qazağa oray, redakciyamız atınan marqwmnıñ tuğan-tuıstarına, jaqın dos-jaranına, twtas qazaq eline qayğıra otırıp köñil aytamız! Wltınıñ wlağattı perzentin Täñir aldınan jarılqap, arttağı eline şapağatın qaldırsın! Biligine ınsap berip, halqına qayırın bersin!

“The Qazaq Times”