Foto: adyrna.kz

Keşeli beri Jañaözende bastalğan narazılıqqa şığıp özderiniñ talap tilekterin beybit türde bildirip jatqan jwrtqa qoldau körsetip jaqtağandar men birge olarğa qoldau bildirgenderdiñ äreketin arandatuşılıqqa balap jatqan biraz adamdardı da körip qaldıq. Osığan baylanıstı belgeli qwqıq qorğauşı Abzal Qwspan öziniñ FB-dağı paraqşasında pikir bildirdi. Oqırmanğa zañger sözin wsınudı jön sanadıq.

Arandatuşılıq degen ne?

Keşe Jañaözenge qoldau bildirgen ağayınnıñ birazı jekeme şığıp, bizdiñ Jañaözendi qoldauımız arandatuşılıqqa jata ma dep swrap jatır. Bwlarğa ne bolğan desem, jelide tañ atpastan biraz adam (äzirge attarın atamay aq qoyayın) şınında da, qoldau bildirgen adamdardıki arandatuşılıq dep qwqıqtıq bağa berip, qorqıtıp-ürkituge bel şeşip kirisip ketkenderi bayqaladı.

Sonımen arandatuşılıq degen ne?

Iä, QR qılmıstıq kodeksinde arandatuşılıq äreketter üşin - qılmıstıq jauapkerşilik qarastırılğan. Kodekstiñ 28 babı, 4 böliginde sözbe-söz bılay jazılğan: “Basqa adamdı azğıru, parağa satıp alu, qorqıtu jolımen nemese basqa da täsilmen qılmıstıq qwqıq bwzuşılıq jasauğa köndirgen adam aydap saluşı dep tanıladı”.

YAğni, eger Siz osı jağdaydı paydalanıp, Jañaözendik ağayındardı qanday da bir qılmıstıq is-äreket jasauğa itermeleseñiz, tura mağınasında köndirseñiz (!), onda Sizdiñ äreketiñiz arandatuşılıq dep tanıluı bek mümkin!

Alayda, Jañaözendikterge, osınday qiın jağdayda qoldau bildiru, ol eşqanday da arandatuşılıqqa jatpaydı! Jañaözendikterdi qoldau, eldiñ qos ökpesinen qısıp bara jatırğan qımbatşılıqqa, onı auızdıqtauğa şarasızdıq tanıtıp otırğan Ükimetke, bilikke narazılıq bildiru! Al ol - Sizdiñ Konstituciyalıq qwqığıñız!