بۇگىن، 30 شىلدە كۇنى الماتى جۇرتى رەجيسسەر، وپپوزيتسيا قايراتكەرى بولات اتاباەۆتى اقتىق ساپارعا شىعارىپ سالدى. زيالى قاۋىم اراسىنان حالىق جاعىندا تۇرعان ساناۋلى تۇلعانىڭ ءبىرى اتاباەۆتىڭ جانازاسىنا كارانتين تالاپتارىنا قاراماستان قالىڭ جۇرت جينالدى.

رەجيسسەردىڭ ءوز ءۇيىنىڭ الدىندا وتەلگەن جانازا راسىمىنە ارىپتەستەرى، بىرقاتار قوعام قايراتكەرلەرى جانە قوعام بەلسەندىلەرى دە قاتىستى. ولار ايتۋلى تۇلعاعا ازا تۇتىپ، جاقىندارىنا كوڭىل ايتتى. ازاتتىق راديوسىنىڭ مالىمەتىنە قاراعاندا, جينالعاندار اراسىندا ءبىرلى-جارىم بيلىك وكىلدەرى دە بولعان.

29 شىلدە كۇنى باقيلىق بولعان مارقۇمنىڭ قازاسى قازاق ەلىنە، سونىڭ ىشىندە زيالى قاۋىم مەن ازاماتتىق قوعام وكىلدەرىن، ونەر مەن ادەبيەت وكىلدەرىنە ايرىقشا اۋىر ءتيدى. بولات اتاباەۆ بىلتىر عانا ناۋقاسىنا بايلانىستى اۋىر وپەراتسيادان شىققان بولاتىن.

كورنەكتى تۇلعا حالىق جاعىندا تۇرىپ، بيلىككە اشىق سىن-پىكىر ايتقان ساناۋلى زيالى قاۋىم وكىلىنىڭ ءبىرى. 2011 جىلى «جاڭاوزەن وقيعاسى» كەزىندە بيلىك جاعىنان قاماۋعا الىنىپ، ارتىنشا بوساتىلعان. بيلىك تارابىنان جاسالعان قىسىمعا بايلانىستى گەرمانياعا كەتۋگە ءماجبۇر بولعان ەدى. سوڭعى بىرەر جىلدا عانا ەلگە ورالعان بولات اتاباەۆ سوڭعى ۋاقىتتاردا تەاتر سالاسىندا وزىنەن كەيىنگى بۋىنعا تاجىريبەلەرىمەن ءبولىسىپ جۇرگەن.

ورنى تولماس قازاعا وراي، رەداكتسيامىز اتىنان مارقۇمنىڭ تۋعان-تۋىستارىنا، جاقىن دوس-جارانىنا، تۇتاس قازاق ەلىنە قايعىرا وتىرىپ كوڭىل ايتامىز! ۇلتىنىڭ ۇلاعاتتى پەرزەنتىن ءتاڭىر الدىنان جارىلقاپ، ارتتاعى ەلىنە شاپاعاتىن قالدىرسىن! بيلىگىنە ىنساپ بەرىپ، حالقىنا قايىرىن بەرسىن!

“The Qazaq Times”