Körneki suret. Almatı qalasındağı Ortalıq klinikalıq auruhanasınıñ koronavirusqa arnalğan bölimi. 15 şilde 2021 jıl. Foto: QT / Kültegin Aspanwlı

Qazaqstannıñ Densaulıq saqtau ministrligi 1 qazannan bastap koronaviruspen küresuge jwmıldırılğan medicina qızmetkerlerine üsteme aqı töleudi toqtatudı josparlap otır. Vedomstvo bwyrıqtıñ jobasın jariyalap ta ülgerdi.

Bıltır köktemde prezident Toqaevtıñ tapsırması negizinde ministrlik qabıldağan şeşim biıl küzde küşin joymaq. «COVID-19 koronavirusımen küres şeñberinde epidemiyağa qarsı is-şaralarğa tartılğan densaulıq saqtau jüyesi jwmıskerlerin qarjılıq qoldaudıñ keybir mäseleleri turalı» Qazaqstan Respublikası Densaulıq saqtau ministriniñ 2020 jılğı 4 säuirdegi № QR DSM-28/2020 bwyrığına özgeristerengizu turalı» qwjattıñ nobayın bajaylasaq, psihoemocionaldıq twrğıda auır äri densaulıqqa qauipti boluı mümkin jağdayda jwmıs istegen medqızmetkerlerge 1 qazannan bastap üsteme aqı men qosımşa tölem töleu toqtatıladı.

Üstem aqıdan qağılatın mamandar qatarına:

  • reanimatolog-anesteziolog därigerler;
  • infekcionister;
  • reanimatologiya jäne anesteziologiya böliminiñ anesteziologtarı;
  • epidemiologtar;
  • BMSK psihologtarı men äleumettik qızmetkerleri;
  • yadrolıq medicina ortalıqtarınıñ mamandarı;
  • patalogoanatom därigerler engen.

Sonımen qosa, Ükimet 1 tamızdan bastap qazir tölenip jatqan üsteme aqınıñ kölemin 50% qısqartu josparlanıp otır. Qısqarğan jağdayda tölemder kelesidegidey boladı:

  • birinşi qauipti top – 10 EAJM;
  • ekinşi qauipti top – 5 EAJM;
  • üşinşi qauipti top – 2,5 EAJM.

Joğarıda atap ötkendey tamızda jartısı qısqarğan üstem aqı qazan ayınan bastap müldem tölenbeydi. Bwl qoğam arasında, äsirese därigerler qauımdastığında qattı sınğa iligui mümkin.

Elektrondı ükimet portalına jüktelgen daulı bwyrıq jobasın aşıq talqılau 4 tamızğa deyin jalğasadı.

Toqaevtıñ 2020 jılğı 29 naurızda bergen uädesi altı ay öter-ötpesten 20 qazanda «jartılay joyılıp» edi. Anığıraq aytqanda, qızmet babında virus jwqqan 14 mıñnan astam medqızmetkerge jäne qaytıs bolğan 182 medqızmetkerdiñ tuıstarına ötemaqı tölegen soñ, mwnı da toqtatqan. (Alayda özge de köptegen därigerler auırğanın qalıñ byurokrat jüye men küñgirt mehanizmniñ kesirinen qağaz jüzinde däleldey almay, tiisti tölemge qol jetpegenin aytıp şağınğan – QT). Arada jılğa juıq uaqıt ötkende jaña bwyrıqpen üsteme aqını birjola üzbek.

The Qazaq Times redakciyasınıñ swrau hatına bergen jauabında Densaulıq saqtau ministrligi ötemaqı turalı bwyrıqtıñ küşi toqtağan 20 qazan men biılğı 31 naurız aralığında respublikada «koronavirus pen pnevmoniyağa 4087 medicina qızmetkeri şaldığıp, 8-i qaytıs bolğanın» habarlağan.

Bıltır köktemgi eki ay karantinde jetkilikti türde qamdanbay, därgerlerdi qorğanıs qwraldarımen (kiim, qolğap, maska – QT) qamti almağandıqtan medqızmetkerlerdiñ eleuli böligi sırqattanıp, ondağanı qaytıs bolğan. Ükimettiñ qate boljamınıñ saldarınan dayındıq şınayı jağdayğa keri proporciyağa wşırap, artı «mausım-şilde» qırğınına wlasqan. Jwrt tügel derlik därihanadan kerek däri-därmek tappay, şetelden tapsırıspen aldıruğa tura kelgeni esimizde. Qızmet barısında sırqattanğan jäne qaytıs bolğan medqızmetkerlerge uädeli ötemaqını der kezinde töleudiñ özi mwñğa aynalıp, Aqordanıñ aralasuımen ğana iske asqan edi. Endi qırküyek ayınıñ soñına deyin Qazaqstan halqınıñ 10 million azamatına ekpe salu josparı iske asqannan keyin koronavirustan emdeytin därigerlerdiñ üstem aqısı toqtatılmaq. Degenmen sarapşılar Ükimettiñ «jalpıhalıqtıq vakcina nauqanın sılbır-bayau äri küdikti sayasatpen jürgizuine» baylanıstı josparlanğan merzimge deyin mejege jetkize alarına kümänmen qaraydı.

“The Qazaq Times”