«ۋادە دەدلاينى»: توقاەۆتىڭ دارىگەرلەردى قولداۋ تۋرالى بۇيرىعى كۇزدە «تولىقتاي» كۇشىن جويماق

قازاقستاننىڭ دەنساۋلىق ساقتاۋ مينيسترلىگى 1 قازاننان باستاپ كوروناۆيرۋسپەن كۇرەسۋگە جۇمىلدىرىلعان مەديتسينا قىزمەتكەرلەرىنە ۇستەمە اقى تولەۋدى توقتاتۋدى جوسپارلاپ وتىر. ۆەدومستۆو بۇيرىقتىڭ جوباسىن جاريالاپ تا ۇلگەردى.

بىلتىر كوكتەمدە پرەزيدەنت توقاەۆتىڭ تاپسىرماسى نەگىزىندە مينيسترلىك قابىلداعان شەشىم بيىل كۇزدە كۇشىن جويماق. «COVID-19 كوروناۆيرۋسىمەن كۇرەس شەڭبەرىندە ەپيدەمياعا قارسى ءىس-شارالارعا تارتىلعان دەنساۋلىق ساقتاۋ جۇيەسى جۇمىسكەرلەرىن قارجىلىق قولداۋدىڭ كەيبىر ماسەلەلەرى تۋرالى» قازاقستان رەسپۋبليكاسى دەنساۋلىق ساقتاۋ ءمينيسترىنىڭ 2020 جىلعى 4 ساۋىردەگى № قر دسم-28/2020 بۇيرىعىنا وزگەرىستەرەنگىزۋ تۋرالى» قۇجاتتىڭ نوبايىن باجايلاساق، پسيحوەموتسيونالدىق تۇرعىدا اۋىر ءارى دەنساۋلىققا قاۋىپتى بولۋى مۇمكىن جاعدايدا جۇمىس ىستەگەن مەدقىزمەتكەرلەرگە 1 قازاننان باستاپ ۇستەمە اقى مەن قوسىمشا تولەم تولەۋ توقتاتىلادى.

ۇستەم اقىدان قاعىلاتىن ماماندار قاتارىنا:

• رەانيماتولوگ-انەستەزيولوگ دارىگەرلەر;
• ينفەكتسيونيستەر;
• رەانيماتولوگيا جانە انەستەزيولوگيا ءبولىمىنىڭ انەستەزيولوگتارى;
• ەپيدەميولوگتار;
• بمسك پسيحولوگتارى مەن الەۋمەتتىك قىزمەتكەرلەرى;
• يادرولىق مەديتسينا ورتالىقتارىنىڭ ماماندارى;
• پاتالوگواناتوم دارىگەرلەر ەنگەن.

سونىمەن قوسا، ۇكىمەت 1 تامىزدان باستاپ قازىر تولەنىپ جاتقان ۇستەمە اقىنىڭ كولەمىن 50% قىسقارتۋ جوسپارلانىپ وتىر. قىسقارعان جاعدايدا تولەمدەر كەلەسىدەگىدەي بولادى:

• ءبىرىنشى قاۋىپتى توپ – 10 ەاجم;
• ەكىنشى قاۋىپتى توپ – 5 ەاجم;
• ءۇشىنشى قاۋىپتى توپ – 2,5 ەاجم.

جوعارىدا اتاپ وتكەندەي تامىزدا جارتىسى قىسقارعان ۇستەم اقى قازان ايىنان باستاپ مۇلدەم تولەنبەيدى. بۇل قوعام اراسىندا، اسىرەسە دارىگەرلەر قاۋىمداستىعىندا قاتتى سىنعا ىلىگۋى مۇمكىن.

ەلەكتروندى ۇكىمەت پورتالىنا جۇكتەلگەن داۋلى بۇيرىق جوباسىن اشىق تالقىلاۋ 4 تامىزعا دەيىن جالعاسادى.

توقاەۆتىڭ 2020 جىلعى 29 ناۋرىزدا بەرگەن ۋادەسى التى اي وتەر-وتپەستەن 20 قازاندا «جارتىلاي جويىلىپ» ەدى. انىعىراق ايتقاندا، قىزمەت بابىندا ۆيرۋس جۇققان 14 مىڭنان استام مەدقىزمەتكەرگە جانە قايتىس بولعان 182 مەدقىزمەتكەردىڭ تۋىستارىنا وتەماقى تولەگەن سوڭ، مۇنى دا توقتاتقان. (الايدا وزگە دە كوپتەگەن دارىگەرلەر اۋىرعانىن قالىڭ بيۋروكرات جۇيە مەن كۇڭگىرت مەحانيزمنىڭ كەسىرىنەن قاعاز جۇزىندە دالەلدەي الماي، ءتيىستى تولەمگە قول جەتپەگەنىن ايتىپ شاعىنعان – QT). ارادا جىلعا جۋىق ۋاقىت وتكەندە جاڭا بۇيرىقپەن ۇستەمە اقىنى ءبىرجولا ۇزبەك.

The Qazaq Times رەداكتسياسىنىڭ سۇراۋ حاتىنا بەرگەن جاۋابىندا دەنساۋلىق ساقتاۋ مينيسترلىگى وتەماقى تۋرالى بۇيرىقتىڭ كۇشى توقتاعان 20 قازان مەن بيىلعى 31 ناۋرىز ارالىعىندا رەسپۋبليكادا «كوروناۆيرۋس پەن پنەۆمونياعا 4087 مەديتسينا قىزمەتكەرى شالدىعىپ، 8-ءى قايتىس بولعانىن» حابارلاعان.

بىلتىر كوكتەمگى ەكى اي كارانتيندە جەتكىلىكتى تۇردە قامدانباي، دارگەرلەردى قورعانىس قۇرالدارىمەن (كيىم، قولعاپ، ماسكا – QT) قامتي الماعاندىقتان مەدقىزمەتكەرلەردىڭ ەلەۋلى بولىگى سىرقاتتانىپ، ونداعانى قايتىس بولعان. ۇكىمەتتىڭ قاتە بولجامىنىڭ سالدارىنان دايىندىق شىنايى جاعدايعا كەرى پروپورتسياعا ۇشىراپ، ارتى «ماۋسىم-شىلدە» قىرعىنىنا ۇلاسقان. جۇرت تۇگەل دەرلىك ءدارىحانادان كەرەك ءدارى-دارمەك تاپپاي، شەتەلدەن تاپسىرىسپەن الدىرۋعا تۋرا كەلگەنى ەسىمىزدە. قىزمەت بارىسىندا سىرقاتتانعان جانە قايتىس بولعان مەدقىزمەتكەرلەرگە ۋادەلى وتەماقىنى دەر كەزىندە تولەۋدىڭ ءوزى مۇڭعا اينالىپ، اقوردانىڭ ارالاسۋىمەن عانا ىسكە اسقان ەدى. ەندى قىركۇيەك ايىنىڭ سوڭىنا دەيىن قازاقستان حالقىنىڭ 10 ميلليون ازاماتىنا ەكپە سالۋ جوسپارى ىسكە اسقاننان كەيىن كوروناۆيرۋستان ەمدەيتىن دارىگەرلەردىڭ ۇستەم اقىسى توقتاتىلماق. دەگەنمەن ساراپشىلار ۇكىمەتتىڭ «جالپىحالىقتىق ۆاكتسينا ناۋقانىن سىلبىر-باياۋ ءارى كۇدىكتى ساياساتپەن جۇرگىزۋىنە» بايلانىستى جوسپارلانعان مەرزىمگە دەيىن مەجەگە جەتكىزە الارىنا كۇمانمەن قارايدى.

“The Qazaq Times”