125 mektep mwğalimderiniñ qaymıqpastan bas köterui Qazaqstan bilim beru jüyesindegi äbden siresken zañsızdıqtardıñ señin bwzıp jarğanday bolıp edi. Alayda Şımkent qalasındağı prokuratura men antikor qızmetteri isti toqtatıp tastadı. Foto: QT

Bıltır küzde Şımkent qalasında bılığı aşılğan 125 mekteptegi «jemqorlıq-jımqıru» mäselesi boyınşa qozğalğan is qoğamdıq rezonans sipatı bäseñdegennen keyin toqtatılıp jabılğan.

«Eks-direktor men sıbaylastarı bilim oşağında üş jıl oyran saldı» degen ayıppen bıltır «qaraşa, jeltoqsan men sol bir-eki ayda» bas kötergen 200-ge tarta mwğalimniñ bir tobı ädildik izdep tauanı şağılğanın aytadı. 3 şildede Sıbaylas jemqorlıqqa qarsı is-qimıl agenttiginiñ (Sıbaylas jemqorlıqqa qarsı qızmet) Şımkent qalası boyınşa departamenti redakciyağa joldağan qosımşa jauap hatında qoğamda rezonans tudırğan isti mausım ayınıñ ayağında toqtatıp tastağanın habarladı. Biraq Antikor memlekettik qwzırlı organdar janınan qwrılğan komissiya qorıtındısı boyınşa anıqtalğan  köptegen kemşilik pen arızdanuşı wjım wsınğan ondağan tarmaqtan twratın ayğaqtı ayıptaular bola twra istiñ kenet toqtatıluınıñ sebebin tüsindirmedi. Hattıñ orındauşısı Säbit Jüzbaevqa habarlasqanda tolıq tüsinik bere almaytının jetkizdi.

Kezinde Şpekbaevtıñ qolınan İİ därejeli «Aybın» ordenin alğan, qazir qalalıq departament basşısı mindetin uaqıtşa atqaruşı Bauırjan Wzınjas:

«25.05.2021 jılı qala prokuraturasımen qabıldanğan şeşim zerdelenip, is boyınşa qosımşa tergeu amaldarın jürgizu üşin nwsqau berilip, tergeuşimen qabıldanğan şeşim kelisuden bas tartılğan.

28.06.2021 jılı atalğan qılmıstıq isi boyınşa qala prokuraturasınıñ qaulısında körsetilgen qosımşa tergeu amaldarı tolığımen orındalıp, qılmıstıq is boyınşa QR QPK-niñ 35-babı 1-böligi 2-tarmağına säykes toqtatu turalı şeşim qabıldandı. Bwl qala prokuraturasımen kelisilip, qılmıstıq is mwrağatqa joldandığı jöninde habarlaymın», – dep jauap berdi.

Wjımdıq arız negizinde jeltoqsan ayında antikordıñ jergilikti departamenti qozğağan №207900131000185 qılmıstıq iste eski de jaña direktor Äset Satıbaldiev «küdikti» retinde tanılğan.

Osığan deyin jeltoqsan ayında tergeuşi Nwrdäulet Särsenbek tilşige aytqan sözinde is soñına deyin jetetinin, ädil de aşıq tergeuge uäde bergen.

Arızdanuşı wjımnıñ redakciyağa jäne qwzırlı  organdarğa wsınğan derek-däyekteri boyınşa, üş jarım jıl mektepte qarjı jinau, auızbastırıq alu, käsipodaqtıñ birjaqtığı (direktorğa täueldiligi), gazet-basılımdarğa mäjbürli türde jazğızu, ot jağuşını jwmısqa ornalastırudan bastap dekretten oralğan qızmetkerdi jemqorlıqqa itermeleu, kanikulda remontqa, körnekilik qwraldarğa, äkimşilikke salınğan ayıppwldı öteuge jäne tuğan kün-merekelerge jönsiz aqşa jinau siyaqtı keminde 25 tarmaqtan twratın türli zañsızdıqtar orın alğan. Antikor jalpı arızdı naqtı jağdaylar boyınşa tolıqtırudı swrağanda är maman tap bolğan  zañbwzuşılıq turalı jekeley qosımşa arız tüsirgen. Tilşi «küdikti» retinde tanılıp, artınan «şıtırman» ädispen aqtalğan Satıbaldiev pen onıñ «sıbaylastarı» atalğan orınbasarlarına habarlasqanımen tildesu mümkin bolmadı.

Jartı jılday qalalıq Bilim basqarması, ministrliktiñ (BjĞM) Bilim salasında sapanı qamtamasız etu departamenti, Memlekettik eñbek inspekciyası jäne Memlekettik audit qızmeti siyaqtı tört birdey organnıñ zerdeleu jwmısımen mekteptiñ ötken 3,5 jılındağı kemşilik köptep anıqtalğan. Komissiya qorıtındıları saytta jariyalandı. Bilim ministri Ashat Aymağambetov brifingte, swhbatında komissiyanıñ eki rettik tekserisi boyınşa ondağan tarmaqtan twratın olqılıq anıqtalğanın aytıp, eks-direktor men onıñ orınbasarı qızmetten şettetilgenin aşıq mälimdegen.

Degenmen wjım-direktor arasındağı dau özgeşe öñdenip, eks-direktor men basqarma basşısı tartısına aynaldı. Sotta bir wtıp, bir jeñilgen basqarma öz rayınan qaytıp, bwyrığınıñ küşin joydı. Eki ortada antikor şetin twsı men şikiligi köp qalıñ isti aşıq ta ädil jürgizuge bergen uädesin wmıtıp, kenetten isti toqtattı. Qoğam nazarın audarğan qoyırtpaq istiñ jartı jolda qalay jabılıp qalğanı, qwqıqtıq negizi tüsiniksiz.

Şilde aynıñ basında «basqarma men küdikti direktordıñ spektakliniñ körermeni bolğanımızdı özimiz bilmey qaldıq» dep şeneunikterge aldanğanın aytqan mwğalimder qala äkimi Mwrat Äytenovke qayrılıp, ündeu joldağan. Wjımdıq arız Facebook jelisinde tikeley efirde beyne-şağım türinde joldandı. (Läzzat Äjibekova jergilikti bilim salasına jauaptı basşılıq özge mektepterdiñ osı beyne-ündeuge bolısıp-pikir bildiruine tıyım salğanı jöninde jazdı). Degenmen äkimdikten jauap bolmağan.

Nwr Otan partiyasınıñ qalalıq filialında ötken «jiında qoğam belsendisi Äset Ibrahim wjımdıq arızımız ben memlekettik audittiñ  3 258 582 teñge tauarlıq  qwndılıqtar jäne  negizgi  qwraldardıñ jetpeytindigin anıqtağan aktisin Täjievanıñ qolına wstattı jäne şara qoldanuın swradı. Tiisinşe bizdiñ ökilimiz Jañabek Äbişev basqarma basşısına osı qwjattı paydalana otırıp, QR Eñbek kodeksiniñ 48 babınıñ 1,3,5 tarmaqtarı boyınşa memlekettik  «müliktiñ jäne basqa da qwndılıqtardıñ saqtaluın qamtamasız etpegeni üşin jwmıstan şettetuge qwqığı barın» naqtılap körsetse de, ol (Täjieva – QT) Satıbaldievti ornınan bosatpaq tügili tergeu bitkenşe uaqıtşa  şettetkisi kelmeytinin anıq bayqattı», – degen basqarma basşısınıñ äreketsizdigine küdiktengen mwğalimder.

Ministr, äkim, basqarma basşısı, antikor basşısı, prokuraturağa jüginip «aqiqatın tügendey almağan» wstazdar aldağı uaqıtta «küresin jalğastıra bermek».

"The Qazaq Times"