125 مەكتەپ مۇعالىمدەرىنىڭ قايمىقپاستان باس كوتەرۋى قازاقستان ءبىلىم بەرۋ جۇيەسىندەگى ابدەن سىرەسكەن زاڭسىزدىقتاردىڭ سەڭىن بۇزىپ جارعانداي بولىپ ەدى. الايدا شىمكەنت قالاسىنداعى پروكۋراتۋرا مەن انتيكور قىزمەتتەرى ءىستى توقتاتىپ تاستادى. فوتو: QT

بىلتىر كۇزدە شىمكەنت قالاسىندا بىلىعى اشىلعان 125 مەكتەپتەگى «جەمقورلىق-جىمقىرۋ» ماسەلەسى بويىنشا قوزعالعان ءىس قوعامدىق رەزونانس سيپاتى باسەڭدەگەننەن كەيىن توقتاتىلىپ جابىلعان.

«ەكس-ديرەكتور مەن سىبايلاستارى ءبىلىم وشاعىندا ءۇش جىل ويران سالدى» دەگەن ايىپپەن بىلتىر «قاراشا، جەلتوقسان مەن سول ءبىر-ەكى ايدا» باس كوتەرگەن 200-گە تارتا مۇعالىمنىڭ ءبىر توبى ادىلدىك ىزدەپ تاۋانى شاعىلعانىن ايتادى. 3 شىلدەدە سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەت) شىمكەنت قالاسى بويىنشا دەپارتامەنتى رەداكتسياعا جولداعان قوسىمشا جاۋاپ حاتىندا قوعامدا رەزونانس تۋدىرعان ءىستى ماۋسىم ايىنىڭ اياعىندا توقتاتىپ تاستاعانىن حابارلادى. بىراق انتيكور مەملەكەتتىك قۇزىرلى ورگاندار جانىنان قۇرىلعان كوميسسيا قورىتىندىسى بويىنشا انىقتالعان  كوپتەگەن كەمشىلىك پەن ارىزدانۋشى ۇجىم ۇسىنعان ونداعان تارماقتان تۇراتىن ايعاقتى ايىپتاۋلار بولا تۇرا ءىستىڭ كەنەت توقتاتىلۋىنىڭ سەبەبىن تۇسىندىرمەدى. حاتتىڭ ورىنداۋشىسى ءسابيت جۇزباەۆقا حابارلاسقاندا تولىق تۇسىنىك بەرە المايتىنىن جەتكىزدى.

كەزىندە شپەكباەۆتىڭ قولىنان ءىى دارەجەلى «ايبىن» وردەنىن العان، قازىر قالالىق دەپارتامەنت باسشىسى مىندەتىن ۋاقىتشا اتقارۋشى باۋىرجان ۇزىنجاس:

«25.05.2021 جىلى قالا پروكۋراتۋراسىمەن قابىلدانعان شەشىم زەردەلەنىپ، ءىس بويىنشا قوسىمشا تەرگەۋ امالدارىن جۇرگىزۋ ءۇشىن نۇسقاۋ بەرىلىپ، تەرگەۋشىمەن قابىلدانعان شەشىم كەلىسۋدەن باس تارتىلعان.

28.06.2021 جىلى اتالعان قىلمىستىق ءىسى بويىنشا قالا پروكۋراتۋراسىنىڭ قاۋلىسىندا كورسەتىلگەن قوسىمشا تەرگەۋ امالدارى تولىعىمەن ورىندالىپ، قىلمىستىق ءىس بويىنشا قر قپك-ءنىڭ 35-بابى 1-بولىگى 2-تارماعىنا سايكەس توقتاتۋ تۋرالى شەشىم قابىلداندى. بۇل قالا پروكۋراتۋراسىمەن كەلىسىلىپ، قىلمىستىق ءىس مۇراعاتقا جولداندىعى جونىندە حابارلايمىن»، – دەپ جاۋاپ بەردى.

ۇجىمدىق ارىز نەگىزىندە جەلتوقسان ايىندا انتيكوردىڭ جەرگىلىكتى دەپارتامەنتى قوزعاعان №207900131000185 قىلمىستىق ىستە ەسكى دە جاڭا ديرەكتور اسەت ساتىبالديەۆ «كۇدىكتى» رەتىندە تانىلعان.

وسىعان دەيىن جەلتوقسان ايىندا تەرگەۋشى نۇرداۋلەت سارسەنبەك تىلشىگە ايتقان سوزىندە ءىس سوڭىنا دەيىن جەتەتىنىن، ءادىل دە اشىق تەرگەۋگە ۋادە بەرگەن.

ارىزدانۋشى ۇجىمنىڭ رەداكتسياعا جانە قۇزىرلى  ورگاندارعا ۇسىنعان دەرەك-دايەكتەرى بويىنشا، ءۇش جارىم جىل مەكتەپتە قارجى جيناۋ، اۋىزباستىرىق الۋ، كاسىپوداقتىڭ بىرجاقتىعى (ديرەكتورعا تاۋەلدىلىگى), گازەت-باسىلىمدارعا ءماجبۇرلى تۇردە جازعىزۋ، وت جاعۋشىنى جۇمىسقا ورنالاستىرۋدان باستاپ دەكرەتتەن ورالعان قىزمەتكەردى جەمقورلىققا يتەرمەلەۋ، كانيكۋلدا رەمونتقا، كورنەكىلىك قۇرالدارعا، اكىمشىلىككە سالىنعان ايىپپۇلدى وتەۋگە جانە تۋعان كۇن-مەرەكەلەرگە ءجونسىز اقشا جيناۋ سياقتى كەمىندە 25 تارماقتان تۇراتىن ءتۇرلى زاڭسىزدىقتار ورىن العان. انتيكور جالپى ارىزدى ناقتى جاعدايلار بويىنشا تولىقتىرۋدى سۇراعاندا ءار مامان تاپ بولعان  زاڭبۇزۋشىلىق تۋرالى جەكەلەي قوسىمشا ارىز تۇسىرگەن. ءتىلشى «كۇدىكتى» رەتىندە تانىلىپ، ارتىنان «شىتىرمان» ادىسپەن اقتالعان ساتىبالديەۆ پەن ونىڭ «سىبايلاستارى» اتالعان ورىنباسارلارىنا حابارلاسقانىمەن تىلدەسۋ مۇمكىن بولمادى.

جارتى جىلداي قالالىق ءبىلىم باسقارماسى، مينيسترلىكتىڭ (بجعم) ءبىلىم سالاسىندا ساپانى قامتاماسىز ەتۋ دەپارتامەنتى، مەملەكەتتىك ەڭبەك ينسپەكتسياسى جانە مەملەكەتتىك اۋديت قىزمەتى سياقتى ءتورت بىردەي ورگاننىڭ زەردەلەۋ جۇمىسىمەن مەكتەپتىڭ وتكەن 3,5 جىلىنداعى كەمشىلىك كوپتەپ انىقتالعان. كوميسسيا قورىتىندىلارى سايتتا جاريالاندى. ءبىلىم ءمينيسترى اسحات ايماعامبەتوۆ بريفينگتە، سۇحباتىندا كوميسسيانىڭ ەكى رەتتىك تەكسەرىسى بويىنشا ونداعان تارماقتان تۇراتىن ولقىلىق انىقتالعانىن ايتىپ، ەكس-ديرەكتور مەن ونىڭ ورىنباسارى قىزمەتتەن شەتتەتىلگەنىن اشىق مالىمدەگەن.

دەگەنمەن ۇجىم-ديرەكتور اراسىنداعى داۋ وزگەشە وڭدەنىپ، ەكس-ديرەكتور مەن باسقارما باسشىسى تارتىسىنا اينالدى. سوتتا ءبىر ۇتىپ، ءبىر جەڭىلگەن باسقارما ءوز رايىنان قايتىپ، بۇيرىعىنىڭ كۇشىن جويدى. ەكى ورتادا انتيكور شەتىن تۇسى مەن شيكىلىگى كوپ قالىڭ ءىستى اشىق تا ءادىل جۇرگىزۋگە بەرگەن ۋادەسىن ۇمىتىپ، كەنەتتەن ءىستى توقتاتتى. قوعام نازارىن اۋدارعان قويىرتپاق ءىستىڭ جارتى جولدا قالاي جابىلىپ قالعانى، قۇقىقتىق نەگىزى تۇسىنىكسىز.

شىلدە اينىڭ باسىندا «باسقارما مەن كۇدىكتى ديرەكتوردىڭ سپەكتاكلىنىڭ كورەرمەنى بولعانىمىزدى ءوزىمىز بىلمەي قالدىق» دەپ شەنەۋنىكتەرگە الدانعانىن ايتقان مۇعالىمدەر قالا اكىمى مۇرات ايتەنوۆكە قايرىلىپ، ۇندەۋ جولداعان. ۇجىمدىق ارىز Facebook جەلىسىندە تىكەلەي ەفيردە بەينە-شاعىم تۇرىندە جولداندى. ء(لاززات اجىبەكوۆا جەرگىلىكتى ءبىلىم سالاسىنا جاۋاپتى باسشىلىق وزگە مەكتەپتەردىڭ وسى بەينە-ۇندەۋگە بولىسىپ-پىكىر بىلدىرۋىنە تىيىم سالعانى جونىندە جازدى). دەگەنمەن اكىمدىكتەن جاۋاپ بولماعان.

نۇر وتان پارتياسىنىڭ قالالىق فيليالىندا وتكەن «جيىندا قوعام بەلسەندىسى اسەت يبراحيم ۇجىمدىق ارىزىمىز بەن مەملەكەتتىك ءاۋديتتىڭ  3 258 582 تەڭگە تاۋارلىق  قۇندىلىقتار جانە  نەگىزگى  قۇرالداردىڭ جەتپەيتىندىگىن انىقتاعان اكتىسىن تاجيەۆانىڭ قولىنا ۇستاتتى جانە شارا قولدانۋىن سۇرادى. تيىسىنشە ءبىزدىڭ وكىلىمىز جاڭابەك ابىشەۆ باسقارما باسشىسىنا وسى قۇجاتتى پايدالانا وتىرىپ، قر ەڭبەك كودەكسىنىڭ 48 بابىنىڭ 1,3,5 تارماقتارى بويىنشا مەملەكەتتىك  «مۇلىكتىڭ جانە باسقا دا قۇندىلىقتاردىڭ ساقتالۋىن قامتاماسىز ەتپەگەنى ءۇشىن جۇمىستان شەتتەتۋگە قۇقىعى بارىن» ناقتىلاپ كورسەتسە دە، ول (تاجيەۆا – QT) ساتىبالديەۆتى ورنىنان بوساتپاق تۇگىلى تەرگەۋ بىتكەنشە ۋاقىتشا  شەتتەتكىسى كەلمەيتىنىن انىق بايقاتتى»، – دەگەن باسقارما باسشىسىنىڭ ارەكەتسىزدىگىنە كۇدىكتەنگەن مۇعالىمدەر.

مينيستر، اكىم، باسقارما باسشىسى، انتيكور باسشىسى، پروكۋراتۋراعا جۇگىنىپ «اقيقاتىن تۇگەندەي الماعان» ۇستازدار الداعى ۋاقىتتا «كۇرەسىن جالعاستىرا بەرمەك».

"The Qazaq Times"