5 mamırda mäjilis jer qatınastarı turalı zañ jobasına senat engizgen tüzetulerdi maqwldap, qwjattı prezidentke joldadı. Ötken aptada senat jobanıñ qoğamda dau tuğızğan twstarına tüzetu engizudi, atap aytqanda, şeteldikterge orman ösiru üşin jer bermeudi wsınıp, mäjiliske qaytarğan.

Bügin, 6 mamırda mäjilis deputattarı birneşe minuttıñ işinde atalğan tüzetulerdi qabıldadı. Agrarlıq mäseleler jönindegi komitettiñ hatşısı, deputat Berik Serikwlı "senat wsınğan tüzetuler" şeteldik jer paydalanuşılar men şeteldik qatısuı bar zañdı twlğalarğa jer bermeudi közdeytin zañ jobasınıñ "mäjilis maqwldağan zañ twjırımdamasın bwzbaydı jäne onıñ mazmwnın naşarlatpaydı, osığan oray komitet senat wsınğan özgerister men tolıqtırularmen kelisudi wsınadı " dedi. Deputattardıñ barlığı jobanı qoldadı.

Prezident Qasım-Jomart Toqaevtıñ bastamaşı boluımen onıñ äkimşiligi dayındağan jer qatınastarı turalı zañ jobası mäjilistiñ qarauına naurızdıñ ortasında tüsken. Ol kezde atalğan qwjatta orman ösiru üşin şeteldikterge jer berudi közdeytin tarmaq mülde bolğan joq. Onı engizen – mäjilistiñ osı zañ jobası jönindegi jwmıs tobı. Zañ jobası 14 säuirde senatqa mäjilis engizgen tüzetu boyınşa joldandı. Sol sätte qoğamda osı bapqa qarsılar köbeydi. Eldiñ keybir qalasında "Jaña zañ jobası qabıldanbasın" degen talappen mitingi de ötti. Senat dau tudırğan tarmaqqa tüzetu engizip, zañ jobasın mäjiliske qaytardı.

Qazaqstanda jer dauı eldi birinşi prezident Nwrswltan Nazarbaev basqarıp twrğan kezde bastalğan. 2016 jılı elde auıl şaruaşılığı jerin şeteldikterge satu jäne wzaq merzimge jalğa berudi qarastıratın daulı zañ jobasına halıq jappay narazı bolğan soñ Nazarbaev oğan bes jılğa moratoriy jariyalağan. Onıñ merzimi biıl ayaqtaladı. Osığan oray, qazirgi prezident Qasım-Jomart Toqaev jerdi şeteldikterge satuğa jäne wzaq jılğa jalğa beruge tıyım saludı qarastıratın zañ jobasın äzirleudi tapsırğan.

Bilik jerdiñ bos jatpau qajettigin, oğan investiciya tartu kerektigin jii aytadı. Biraq el azamattarınıñ keybiri elde jemqorlıq örşip twrğan şaqta jer satu qauipti degen oyda.

"The Qazaq Times"