Saylau-partiya turalı zañ jobası maqwldandı. Biıl 836, endigi jılı 351 äkim saylanadı

Särsenbide, 5 mamırda mäjilis saylau turalı konstituciyalıq zañ jobasın özgertip, jaña nwsqasın maqwldadı.

Zañ jobasında audandıq mañızı bar qalalar, kentter men auıldıñ äkimderin tikeley saylau, sayasi partiyalardıñ mäjiliske ötu şegin 7-den 5%-ğa tömendetu jäne saylau byulleten'derine «Barlığına qarsımın» degen tañdau nwsqasın engizu siyaqtı özgerister qamtılğan.

Zañ jobası turalı bayandama äzirlegen wlttıq ekonomika ministri Äset Erğalievtiñ aytuınşa, biıl ekinşi jartıjıldıqta 836 auıl äkimi tikeley dauıs beru arqılı saylanadı. Oğan «Memlekettik qızmet turalı» zañğa say biliktiligi bar 25 jasqa tolğan kez kelgen azamat qatısa aladı. Partiya müşeleri men saylauşılardıñ jalpı sanınıñ keminde bir payız qolın jinağan täuelsiz kandidattar da saylauğa tüse aladı.

«Eger kandidat bolmasa nemese bir adam ğana wsınılğan jağdayda audan äkiminiñ eki nemese bir kandidattı wsınuğa qwqığı bar. Saylau 40 kün bwrın jariyalanadı. Al saylaudıñ özi qazirgi äkimniñ ökilettik merzimi ayaqtalğanğa deyin on kün bwrın ötedi. Saylau ötkennen keyin üş kün işinde qorıtındı şığarıladı. Öz kezeginde saylanğan äkim jürgizip jatqan jwmısı üşin halıq aldında esep beredi» dedi Äset Erğaliev bügingi Mäjilistiñ jalpı otırısında.

Onıñ aytuınşa, biıl auıl äkimin saylauğa respublikalıq byudjetten 4,8 mlrd teñge qarastırılğan. Kelesi jılı 351 auıl äkimin saylauğa 3,1 mlrd teñge bölinedi. Al 2023 jıldan bastap mwnday saylauğa jergilikti byudjetten qarjı qarastırıladı.

Ministr bwdan özge Toqaevtıñ jıl basındağı tapsırması boyınşa, «mäjilis saylauı kezinde sayasi partiyalardıñ parlamentke ötu şegi jeti payızdan bes payızğa tömendeydi. Bwğan qosa, barlıq deñgeydegi saylau byulleten'derinde «barlığına qarsımın» degen bağan qosıladı» dep mälimdedi.

Mwnı zor jetistik körgen deputattardıñ keybiri «Qazaqstan sayasi twrğıda jaña beleske şıqtı» dep mälimdedi. Alayda azamattıq belsendiler men sarapşılar osığan deyin bwl mejeni 3%-ğa deyin kemitudi swrağan. Al qazir qoldanıstağı zañ ayasında Mäjiliske saylauda keminde 7% dauıs jiğan partiyalar ğana öte aladı.

Osıdan eki jıl bwrın Nazarbaev tağayındap, artınan resmi türde saylağan Toqaev elde «sayasi demokratiyalıq reforma» jürgizuge uäde etken. Bıltır köktemgi karantinde asığıs qabıldanğan beybit jiın ötkizu, sayasi partiyalar men saylau turalı zañdardı azmattıq qoğam qattı sınadı. Bir ğana mısal, prezident miting ötkizuge endi rwqsat aludıñ qajeti joq, tek qwlaqtandıru mehanizmi arqılı jüredi dese, jergilikti bilik ökilderi «rwqsat alınbağan miting zañsız» degen uäj aytadı.

"The Qazaq Times"