Qazaqstannıñ Halıq partiyası bağa ösimine qarsı jürgizilgen  kürestiñ tiimsizdiginen jäne infliyaciyalıq jasırın salıqtıñ saldarınan qarapayım jwrt şığınğa battı dep esepteydi.

QHP deputatı Ayqın Qoñırov bügingi mäjilis otırısında Ükimettiñ infliyaciyağa qarsı küres sayasatı dwrıs sipatta jürgizilmeuin sınap, bwdan halıqtıñ zardap şegip otırğanın mälimdedi. Frakciya deputattarı vice-prem'er Älihan Smayılovqa infliyaciyamen küreste jiberilgen qatelikter üşin kimderdiñ jauapqa tartılğanı jöninde swrau joldadı.

«Şınayı jağdaydı körip otırğanımız. Partiya saylauşıları resmi statistika mälimetteri men narıqtağı bağanıñ ayırmaşılığı aytıp jii şağımdanadı. Resmi esepte körsetilgendey, azıq-tülik bağasınıñ 11,04% -ğa qımbattauı masqara jağday! Şındap kelgende bwl kemitilgen körsetkiş, sonıñ özinde soraqı. Halıq twtınatın asa mañızdı tauarlar 50%-ğa deyin qımbattağan. Sonda deklaraciyalıq qwjattar orındalmasa, onıñ qajeti bar? Infliyaciya boljamınıñ sätsiz şığuına jauaptılar läm-mim degen söz joq, nege eşkim jauap bermeydi?» – dep swradı deputat.

Qazir qımbatşılıqtıñ bar sebebin älemdik qwbılısqa ısırıp, aqtaytın atqaminerler köp. Degenmen pandemiya jağdayınıñ ıqpalı men sırtqı faktorlardan tıs salalarda da negizsiz ösim bayqaladı.

«Swranıstıñ tosınnan jıldam ösui qwbılısına baylanıstı Qazaqstanda jağday mülde basqa. Sebebi azamattardıñ tabısı aytarlıqtay artqa qoyğan joq. Dändi-daqıldar: kartop, künbağıs mayı men jwmırtqağa swranıs bayağışa özgerissiz. Köptegen tauarlar boyınşa älemdik narıqqa täueldi emespiz. Elimizde dändi-daqıldar öndirisi işki narıqtıñ 96,4%-ın, al ösimdik mayı 80,5%-dı qamtamasız etedi. Soğan qaramastan, dändi-daqıldar 22%-ğa, ösimdik mayı 52%-ğa  östi» – dedi Ayqın Qoñırov.

Frakciya jetekşisi osılayşa käsipkerler importqa täuelsiz tauarların negizsiz qımbattatıp, halıqtıñ qaltasına salmaq salu arqılı eselep tabısqa kenelip jatqanın aytadı. Ol mwnı «inflyaciyalıq beyresmi-jasırın salıq» dep atadı. Halıqtıñ tabısı ortayıp, inflyaciya artqandıqtan, otbasılıq byudjettiñ basım böligin kündelikti azıq-tülik önimine jwmsauğa mäjbür.

Partiya keltirgen derekke säykes, biıl qañtar-şilde aylarınıñ aralığında halıqtıq twtınu önimderiniñ infliyaciya ösimi 245 mlrd teñgege jetken. Ükimettiñ nätijesiz inflyaciyağa qarsı küresi turalı deputattar birneşe mäseleni kün tärtibinde dereu qolğa aludı tapsırdı.

Qazaqstannıñ osı zamanğı jaña tarihında 2021 jıl ekonmikalıq jäne halıqtıñ äleumettik twrmıs-ahualı jağınan eñ auır uaqıt retinde ötip jatır. Elde jwmısşılar tabı tabıstı arttıru, eñbek jağdayın jaqsartu talabımen ondağan ereuil ötkizdi, äli de jalğasıp jatqanı bar. Sarapşılar jwrttıñ twrmısı äbden naşarlap, kedeylik şeginiñ artqanın, jwmısı twralağanın aytıp dabıl qağıp keledi.

The Qazaq Times