Mamay men Baybek. Fotokollaj: QT

Biliktegi "Nwr Otan" partiyası törağasınıñ birinşi orınbasarı Bauırjan Baybek oppoziciyadağı sayasatker Janbolat Mamay men onıñ jwbayı, jurnalist Inga Imanbaydı sotqa berdi. Bwl jaylı bügin, 30 säuirde  Baybektiñ zañgeri Ayjan Taşenova öziniñ facebook-tağa paraqşasında habarladı. 

Baybek Mamay men Imanbaydı "abıroy men iskerlik bedelime nwqsan keltirdi" dep ayıptap otır. Zañger Taşenovanıñ jazuınşa, Baybek öz arızın Almatı qalası Äuezov audanı №2 audandıq sotına tapsırğan. Bilik partiyası ökiliniñ Mamay men Imanbaydıñ üstinen arız jazuına olardıñ  özi jaylı tüsirgen zertteu videosı sebep bolğan.

Atalğan video  "Demokratiyalı Qazaqstan" Youtube arnasında jariyalağan. Videoda Mamay "Baybektiñ Almatığa äkim bolıp twrğanda qaladağı birqatar jemqorlıq isterge qatısı boldı" dep ayıptağan jäne sol kezde onıñ otbası müşeleriniñ iri biznesmenderge aynalğanın aytqan.

"Demokratiyalı Qazaqstan" Youtube arnasında jariyalağan B.Baybek jaylı J.Mamaydıñ zertteui

Zañger Taşenova bügingi jazbasında osı videoda keltirilgen mälimetter "dälelsiz, negizsiz" ekenin aytqan.

"Biıl 19 säuirde Bauırjan Baybek qajetti resmi qwjattar men basqa da materialdardı körsete otırıp, barlıq ayıptaulardı jariya türde joqqa şığardı. Bwl rette, J.Mamay men I.Imanbaevanıñ aytqan sözderiniñ jalğandığın, jalañsözdiligin jäne arsızdığın eskere otırıp, B.Baybek öziniñ ar-namısın, abıroyı men bedelin sot arqılı qorğau qwqığın paydalanu jöninde şeşim qabıldadı. Sondıqtan azamattıq zañnama ayasında biz beynematerialdar avtorları ayıptaularınıñ negizsizdigi men mağınasızdığın däleldeuge niettenip otırmız" dep jazdı Baybektiñ zañgeri Taşenova Facebook paraqşasında.

Onıñ sözinşe, Baybek Mamay men Imanbaydı qılmıstıq jäne äkimşilik qudalaudan bas tartıp, isti azamattıq qaraumen şekteudi jön körip otır. Zañger Baybektiñ ötemaqı talap etpeytinin de jazğan. Bwğan qosa, ol Mamay özi jariyalağan videoda aytqan mälimetterdi sotta däleldep beru qajet dep esepteydi.

"J.Mamay men I.Imanbayğa qatıstı talap arızdı sot qanağattandırğan jağdayda, atalğan azamattar B.Baybektiñ ar-namısı men abıroyına nwqsan keltiretin materialdardı joyuı, sonday-aq tiisti äleumettik jelilerde jäne YouTube-arnada barlıq negizsiz, şındıqqa janaspaytın ayıptauların joqqa şığaruı tiis" dep jazdı Taşenova.

Baybektiñ zañgeri öz jazbasında Mamay men Imanbaydı sot procesin sayasilandırudan bas tartıp, onıñ aşıq ta konstruktivti ayada ötuine qoldau körsetuge şaqırğan.

"The Qazaq Times" tilşisimen söylesken Mamay "sottıñ ädil ötetinine eş senbeytinin" ayttı. Ol Baybektiñ zañgeriniñ "sot procesin sayasilandırmayıq" degenin negizsiz dep esepteydi.

– Baybek – "Nwr Otan" partiyası törağasınıñ birinşi orınbasarı. Ol – sayasi twlğa. Al biz – Demokratiyalıq partiya qwrğısı keletin sayasi wyımbız. Sondıqtan bwl 100 payız sayasi sot boladı. Al sottıñ şeşimi Baybektiñ paydasına şığuı äbden mümkin. Öytkeni Qazaqstanda ädiletti sot joq. Men özim äkimşilik sot, qılmıstıq sot, azamattıq sot barlığınan ötken adammın. Sondıqtan men Qazaqstannıñ sotınan eşqanday ädildik kütpeymin. Biraq sot qanday  şeşim şığarsa da, öz aytqandarımnan bas tartpaymın, eşqaşan Baybekten keşirim swramaymın, özim jariyalağan videonı, mälimetterdi, derekterdi eş jerden öşirmeymin. Sol üşin türmege otırğızamın dese, otırğızsın, – dedi Mamay Qazaq Times tilşisine.

"The Qazaq Times"