بيلىكتەگى "نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەك وپپوزيتسياداعى ساياساتكەر جانبولات ماماي مەن ونىڭ جۇبايى، جۋرناليست ينگا يمانبايدى سوتقا بەردى. بۇل جايلى بۇگىن، 30 ساۋىردە بايبەكتىڭ زاڭگەرى ايجان تاشەنوۆا ءوزىنىڭ facebook-تاعا پاراقشاسىندا حابارلادى.
بايبەك ماماي مەن يمانبايدى "ابىروي مەن ىسكەرلىك بەدەلىمە نۇقسان كەلتىردى" دەپ ايىپتاپ وتىر. زاڭگەر تاشەنوۆانىڭ جازۋىنشا، بايبەك ءوز ارىزىن الماتى قالاسى اۋەزوۆ اۋدانى №2 اۋداندىق سوتىنا تاپسىرعان. بيلىك پارتياسى وكىلىنىڭ ماماي مەن يمانبايدىڭ ۇستىنەن ارىز جازۋىنا ولاردىڭ ءوزى جايلى تۇسىرگەن زەرتتەۋ ۆيدەوسى سەبەپ بولعان.
اتالعان ۆيدەو "دەموكراتيالى قازاقستان" Youtube ارناسىندا جاريالاعان. ۆيدەودا ماماي "بايبەكتىڭ الماتىعا اكىم بولىپ تۇرعاندا قالاداعى بىرقاتار جەمقورلىق ىستەرگە قاتىسى بولدى" دەپ ايىپتاعان جانە سول كەزدە ونىڭ وتباسى مۇشەلەرىنىڭ ءىرى بيزنەسمەندەرگە اينالعانىن ايتقان.
"دەموكراتيالى قازاقستان" Youtube ارناسىندا جاريالاعان ب.بايبەك جايلى ج.مامايدىڭ زەرتتەۋى
زاڭگەر تاشەنوۆا بۇگىنگى جازباسىندا وسى ۆيدەودا كەلتىرىلگەن مالىمەتتەر "دالەلسىز، نەگىزسىز" ەكەنىن ايتقان.
"بيىل 19 ساۋىردە باۋىرجان بايبەك قاجەتتى رەسمي قۇجاتتار مەن باسقا دا ماتەريالداردى كورسەتە وتىرىپ، بارلىق ايىپتاۋلاردى جاريا تۇردە جوققا شىعاردى. بۇل رەتتە، ج.ماماي مەن ي.يمانباەۆانىڭ ايتقان سوزدەرىنىڭ جالعاندىعىن، جالاڭسوزدىلىگىن جانە ارسىزدىعىن ەسكەرە وتىرىپ، ب.بايبەك ءوزىنىڭ ار-نامىسىن، ابىرويى مەن بەدەلىن سوت ارقىلى قورعاۋ قۇقىعىن پايدالانۋ جونىندە شەشىم قابىلدادى. سوندىقتان ازاماتتىق زاڭناما اياسىندا ءبىز بەينەماتەريالدار اۆتورلارى ايىپتاۋلارىنىڭ نەگىزسىزدىگى مەن ماعىناسىزدىعىن دالەلدەۋگە نيەتتەنىپ وتىرمىز" دەپ جازدى بايبەكتىڭ زاڭگەرى تاشەنوۆا Facebook پاراقشاسىندا.
ونىڭ سوزىنشە، بايبەك ماماي مەن يمانبايدى قىلمىستىق جانە اكىمشىلىك قۋدالاۋدان باس تارتىپ، ءىستى ازاماتتىق قاراۋمەن شەكتەۋدى ءجون كورىپ وتىر. زاڭگەر بايبەكتىڭ وتەماقى تالاپ ەتپەيتىنىن دە جازعان. بۇعان قوسا، ول ماماي ءوزى جاريالاعان ۆيدەودا ايتقان مالىمەتتەردى سوتتا دالەلدەپ بەرۋ قاجەت دەپ ەسەپتەيدى.
"ج.ماماي مەن ي.يمانبايعا قاتىستى تالاپ ارىزدى سوت قاناعاتتاندىرعان جاعدايدا، اتالعان ازاماتتار ب.بايبەكتىڭ ار-نامىسى مەن ابىرويىنا نۇقسان كەلتىرەتىن ماتەريالداردى جويۋى، سونداي-اق ءتيىستى الەۋمەتتىك جەلىلەردە جانە YouTube-ارنادا بارلىق نەگىزسىز، شىندىققا جاناسپايتىن ايىپتاۋلارىن جوققا شىعارۋى ءتيىس" دەپ جازدى تاشەنوۆا.
بايبەكتىڭ زاڭگەرى ءوز جازباسىندا ماماي مەن يمانبايدى سوت پروتسەسىن ساياسيلاندىرۋدان باس تارتىپ، ونىڭ اشىق تا كونسترۋكتيۆتى ايادا وتۋىنە قولداۋ كورسەتۋگە شاقىرعان.
"The Qazaq Times" تىلشىسىمەن سويلەسكەن ماماي "سوتتىڭ ءادىل وتەتىنىنە ەش سەنبەيتىنىن" ايتتى. ول بايبەكتىڭ زاڭگەرىنىڭ "سوت پروتسەسىن ساياسيلاندىرمايىق" دەگەنىن نەگىزسىز دەپ ەسەپتەيدى.
– بايبەك – "نۇر وتان" پارتياسى توراعاسىنىڭ ءبىرىنشى ورىنباسارى. ول – ساياسي تۇلعا. ال ءبىز – دەموكراتيالىق پارتيا قۇرعىسى كەلەتىن ساياسي ۇيىمبىز. سوندىقتان بۇل 100 پايىز ساياسي سوت بولادى. ال سوتتىڭ شەشىمى بايبەكتىڭ پايداسىنا شىعۋى ابدەن مۇمكىن. ويتكەنى قازاقستاندا ادىلەتتى سوت جوق. مەن ءوزىم اكىمشىلىك سوت، قىلمىستىق سوت، ازاماتتىق سوت بارلىعىنان وتكەن اداممىن. سوندىقتان مەن قازاقستاننىڭ سوتىنان ەشقانداي ادىلدىك كۇتپەيمىن. بىراق سوت قانداي شەشىم شىعارسا دا، ءوز ايتقاندارىمنان باس تارتپايمىن، ەشقاشان بايبەكتەن كەشىرىم سۇرامايمىن، ءوزىم جاريالاعان ۆيدەونى، مالىمەتتەردى، دەرەكتەردى ەش جەردەن وشىرمەيمىن. سول ءۇشىن تۇرمەگە وتىرعىزامىن دەسە، وتىرعىزسىن، – دەدى ماماي Qazaq Times تىلشىسىنە.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
قاراعايعا قارسى بۇتاق. دۋماننىڭ سوت تەرگەۋى اياقتالدى. 29 شىلدە ءجارىسسوز.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى