Qañtar qwrbandarın da kinäli dep tapqan sud'ya Däuren Mäukeev. Foto: QT / Kültegin Aspanwlı

2 mamırda bes ayğa juıq qaralğan «Äruaqtar sotına» ükim oqıldı. Almatı qalasınıñ Bostandıq audandıq №2 sud'yası Däuren Mäukeev Qañtarda qaza tapqan bes marqwmnıñ bärin ayıptı dep taptı. 

Serik Kerimov, Qanat Äubäkirov, Nwrbolat Qasımjanov, Aslan Valiev, Şıñğıs Tastanbekovterdiñ bärin Qılmıstıq kodekstiñ 272-babı 2-böligimen jappay tärtipsizdikke qatıstı jäne Tastanbekovten özgesin 269-babınınıñ 2-böligimen memlekettik ğimaratqa söz baylasıp şabuıldadı dep tanıdı.  

Osılayşa sud'ya prokuror Arman Nügirbekovtiñ soñğı ayıptau aktisin tolığımen qanağattandırdı.

Marqwmdardıñ tuıstarı – qoğamdıq qorğauşılar. Foto: QT / Kültegin Aspanwlı

Alayda Qañtar qwrbandarınıñ tuıstarı memlekettik ayıptaumen kelispeydi. Olar osığan deyin jarıssözdiñ eki otırısında da tergeu-prokuratura organdarınıñ isti qarau-qabıldau jäne tolıqtıru kezeñinde öreskel qatelikter men kemşilikter ketkenin naqtı körsetken. İs tergeuindegi şikilikter men zañbwzuşılıqtardı sotqa tizip wsınğan.

Şıñğıs Tastanbekovtıñ äkesi Abayhan jäne äpkesi Şınar Tastanbekovter.

Marqwmdardıñ advokattarı men qoğamdıq qorğauşılar prokuror taqqan ayıptar däleldenbegenin, jalğan-jasandı jolmen jäne jalpılama boljamdarmen negizsiz jürgizilgenine şağınadı.

Jıl basında bastalğan «Äruaqtar sotınıñ» ükimi sotqa qatısuşılardıñ narazılığın tudırdı. 14-otırısta mälim bolğan audandıq instanciyanıñ ükimine narazılar appelyaciyağa şağım tüsiretinin ayttı.

«Äruaqtar sotı» qoğam men qwqıq qorğauşılar tarabınan qatañ sınalsa da birneşe öñirde jürip jatır. Däl osığan wqsas Qañtar qwrbandarın sottau täjiribesi juırda Taraz qalalıq sotında boldı. 7 aqpanda sud'ya Bağdat Törebekwlı 5 marqwm men 4 tiri adamdı kinäli dep tanığan ükim şığarğan. Tergeu jala men bwrmalaumen, sot ädiletsiz jürdi degen marqwmdardıñ tuıstarı olardıñ keybiri kezdeysoq, endi biri beybit narazı bolğanın aytıp, oblıstıq sotqa apellyaciya şağımın tüsirgen. «Äruaqtar sotınınıñ» almatılıq nwsqasın qarap jatqan sud'ya Däuren Mäukeevtiñ öndirisinde Qañtarşılarğa qatıstı tağı bir kürdeli «24+1 isi» bar. Onda 24 tiri jäne bir marqwm qañtarşı ayıptaluda. Biraq qañtarşılardıñ kemi 18-i özine tağılğan ayıppen mülde kelispeydi, jala dep esepteydi. Mäukeev osığan deyingi qızmet bababında 2017 jılı jurnalist Janbolat Mamayğa ayıptau ükimin şığarğan.

The Qazaq Times