Türkistan oblısınıñ qoğamdıq damu basqarması 2021 jılı propagandalıq türli videorolikter men derekti fil'mder üşin byudjetten 376 mln teñge bölgen. Mekeme osığan baylanıstı jıl basınan beri memlekettik satıp alu portalında 10 kelisimşart jasasqan. Qazir olardıñ qarjısı tölenip, orındalğanı törteu. Al özge altı kelisimşarttıñ önimi jasalıp jatır. Qoğamdıq damu basqarması tapsırıs bergen qanday videorolikter, onı kim dayındap jatır? "The Qazaq Times" tilşisi anıqtap kördi. 

1 MINUTTIQ 10 VIDEO ÜŞİN 12,3 MLN TEÑGE

Bwl maqalada orındalıp qoyğan 4 kelisimşartqa toqtaldıq. Onıñ birinşisi "Türlengen Türkistan" attı videorolik kontentin dayındau üşin jasalğan kelisimşart. Oğan 5 aqpanda qol qoyılıp, tapsırıs 2 naurızda orındalğan soñ merdiger kompaniyağa aqısı tolığımen tölengen. Kelisimşart bir közden satıp alu täsili boyınşa jasalğan. Bağası – 12,3 mln teñge.

Bwl satıp aludıñ tehnikalıq sipattamasına qarağanda, tapsırıstı orındauşı "Türlengen Türkistan" taqırıbında hronometrajı 1 minuttan kem emes 10 videorolik dayındauğa tiis.

12,3 mln teñgege jasalğan kelisimşarttıñ tehnikalıq sipattamasınıñ skrini

Bwl satıp alu boyınşa tapsırıstı orındauşı – JK KULUMBETOV. Wlttıq statistika byurosınıñ saytındağı aqparatqa säykes, kompaniya qojayını – 33 jastağı Serğali Beysenqwlwlı Qwlımbetov. Kompaniya Şımkent qalasında tirkelgen. Memlekettik satıp alu portalında eki kelisimşart jasasqan. Ekeuinde de tapsırıs beruşi – Türkistan oblısınıñ qoğamdıq damu basqarması.

JWMISI BİR, AQISI ÄRTÜRLİ EKİ KELİSİMŞART

Ekinşi kelisimşart ta 5 aqpanda jasalıp, 2 naurızda orındalğan. Mwnda da bir közden satıp alu täsili qoldanılğan. Kelisimşart bağası – 41,4 mln teñge. Tehnikalıq sipattamağa say, tapsırıstı orındauşı "Wlı dala tarihı" attı taqırıpta hronametrajı 25 minuttan kem emes 2 videorolik dayındauğa tiis. Bwl kelisimşarttıñ maqsatın basqarma bılay sipattaydı: "Türkistan oblısındağı turizm, añızdar men arheologiyalıq qazbalar jäne t.b. bağıttarı turalı  bwqaranı habardar etip, öñirdegi dostıqtı nasihattau" .

41,4 mln teñgege jasalğan kelisimşarttıñ tehnikalıq sipattamasınıñ skrini

Üşinşi kelisimşarttıñ tehnikalıq erekşeligi ekinşige öte wqsas, al portaldağı qısqaşa sipattamadağı atauı birdey. Ekeui de "Wlı dala tarihı" attı rolikter dayındau" dep atalğan. Joğarıdağı ekinşi satıp alu boyınşa tapsırıstı orındauşı "Wlı dala tarihı" attı taqırıpta hronometrajı 25 minuttan kem emes 2 videorolik äzirleuge tiis bolsa, üşinşi kelisimşarttıñ talabına say hronometrajı 40 minuttan kem emes üş videorolik dayındauı şart. Bir qızığı, üşinşi kelisimşarttıñ jwmısı ekinşisine qarağanda kölemdi bolğanımen, bağası odan äldeqayda arzan (24,6 mln teñge).

24,6 mln teñgege jasalğan kelisimşarttıñ tehnikalıq sipattamasınıñ skrini

Bwl satıp satıp aludı orındauşı – Şımkent qalasında tirkelgen "CARAT CONSTRUCTION" JŞS. Wlttıq statistika byurosınıñ saytında kompaniya 2011 jıldıñ jeltoqsanında qwrılğanı körsetilgen. Aynalısatın qızmetiniñ türi – "qanday da bir naqtılausız tauarlardıñ keñ assortimentin köterme bağada satu". Qojayını – Swltan Qayratwlı Berdäuletov.

Kompaniya memlekettik satıp alu portalına 2016 jılı tirkelgen. Sol jılı aşıq konkurs täsili arqılı eki tender wtıp alğan. Ekeuinde de tapsırıs beruşi – Şımkent qalasınıñ bilim basqarması. Basa ayta ketetin jayt – kompaniya ol kezdegi eki kelisimşartqa say, qoqıs şığaru qızmetin körsetken jäne mektep därethanasınıñ sırtına jöndeu jwmıstarın jürgizgen.

Türkistan oblısı qoğamdıq damu basqarması bwl kompaniyağa ne sebepti videorolik dayındaudı tapsırğanı tüsiniksiz. Negizi memlekettik satıp alu turalı zañınıñ 41-babı 2-tarmağına say, kelisimşart tikeley bir közden satıp alu täsili boyınşa jasalsa, tapsırıs beruşi kelisimşarqa qol qoyılğan coñ 10 jwmıs küni işinde portalğa memlekettik satıp alu turalı esepti ornalastıruğa mindetti. Ol esepte tapsırıstı orındauşını tañdaudıñ negizdemesi körsetiluge tiis. Alayda memlekettik satıp alu portalında Türkistan oblısı qoğamdıq damu basqarması "CARAT CONSTRUCTION" kompaniyasımen qanday negizde tikeley bir közden satıp alu täsili boyınşa kelisimşart jasasqanı jaylı aqparat keltirmegen.

10 MLN TEÑGE TWRATIN "TAÑĞAJAYIP TÜRKİSTAN"

Qoğamdıq damu basqarması jasasqan törtinşi kelisimşarttıñ qwnı – 10 mln teñge. Oğan 8 aqpanda qol qoylıp, tapsırıs 2 naurızda orındalıp bitken. Bwl satıp aludıñ portaldağı tolıq atauı: "Tañğajayıp Türkistan" attı fil'm tüsirilimin wyımdastırıp, respublikalıq telearnalardan körsetiluin wyımdastıru". Tehnikalıq sipattamasında tapsırıstı orındauşı oblıstıñ körikti jerleri, tabiğatı men jabayı añdarı, kölderi men özenderi jaylı arnayı fil'mder tüsirip, telearnadan körsetuge tiis delingen. Barlığı 10 video dayındaluı qajet. Olardıñ ärqaysınıñ hronometrajı 15 minuttan kem bolmauı mindetti.

10 mln teñgege jasalğan kelisimşarttıñ tehnikalıq sipattamasınıñ skrini

Memlekettik satıp alu portalındağı aqparatqa qarağanda, bwl kelisimşart boyınşa tapsırıstı orındauşı – "TWRAN TV" JŞS. Bwl kompaniya 2013 jılı Almatı qalasında tirkelgen. Televiziyalıq bağdarlamalar dayındaumen jäne taratumen aynalısadı. Qojayını – Roman Beydalwlı Botabekov. Kompaniya 2016 jıldan beri memlekettik satıp alu portalında 19 kelisimşart jasasqan. Onıñ barlığı tikeley bir közden satıp alu täsili boyınşa.

"Twran TV" jasasqan 19 kelisimşarttıñ üşeuinde tapsırıs beruşi – Türkistan oblısı qoğamdıq damu basqarması. Onıñ üstine bwl kompaniya üş kelisimşartta da "Tañğajayıp Türkistan" taqırıbında video tüsirip, onı respublikalıq telearnadan körsetuge mindettelgen. Kelisimşarttar 2019, 2020, 2021 jıldarı jasalğan. Üşeuiniñ de tehnikalıq sipattaması wqsas. Mäselen, kompaniya 2020 jılı jasalğan kelisimşart boyınşa "Tañğajayıp Türkistan" taqırıbında wzaqtığı 15 minuttan kem emes 10 video tüsirgen. 2021 jılğı kelisimşart boyınşa da däl sonday qızmet körsetken. Onı osı kompaniyağa tiesili "Turan TV" yutub arnasınan köruge boladı.

Nazar audartatın bir jayt, eki jılğı kelisimşarttıñ da bağası birdey, yağni 10 mln teñge. Al 2019 jılğı kelisimşarttıñ bağası bwlardan eki esege arzan (5 mln teñge). Bwğan qosa, ol kezde atqarıluğa tiis qızmet soñğı eki jıldağımen salıstırğanda äldeqayda kölemdi. Mäselen, 2019 jılı jasalğan kelisimşartqa säykes, "Twran TV" "Tañğajayıp Türkistan" taqırıbında ärqaysı 15 minuttıq 10 video emes, 15 video tüsiruge mindettelgen. Biraq ol kezde kompaniyağa osı qızmeti üşin 5 mln teñge ğana tölengen edi.

P.S. "The Qazaq Times" tilşisi bwl maqalanı resmi derekközdegi aqparattar boyınşa dayındadı. Tilşi Türkistan oblısınıñ qoğamdıq damu basqarmasına habarlasıp, birneşe saualğa jauap aluğa tırıstı. Alayda basqarmadağılar qoyılğan saualdarğa tek resmi hat jiberilgen jağdayda ğana jauap beritinin jetkizdi. Redakciya basqarmağa resmi swrau joldadı. Türkistan äkimdiginen jauap bolğan jağdayda, oqırmanğa onı da jetkizemiz.

"The Qazaq Times"