ۆيدەوكامەرا. كورنەكى سۋرەت. فوتو: اشىق دەرەككوز

تۇركىستان وبلىسىنىڭ قوعامدىق دامۋ باسقارماسى 2021 جىلى پروپاگاندالىق ءتۇرلى ۆيدەوروليكتەر مەن دەرەكتى فيلمدەر ءۇشىن بيۋدجەتتەن 376 ملن تەڭگە بولگەن. مەكەمە وسىعان بايلانىستى جىل باسىنان بەرى مەملەكەتتىك ساتىپ الۋ پورتالىندا 10 كەلىسىمشارت جاساسقان. قازىر ولاردىڭ قارجىسى تولەنىپ، ورىندالعانى – تورتەۋ. ال وزگە التى كەلىسىمشارتتىڭ ءونىمى جاسالىپ جاتىر. قوعامدىق دامۋ باسقارماسى تاپسىرىس بەرگەن قانداي ۆيدەوروليكتەر، ونى كىم دايىنداپ جاتىر؟ "The Qazaq Times" ءتىلشىسى انىقتاپ كوردى. 

1 مينۋتتىق 10 ۆيدەو ءۇشىن 12,3 ملن تەڭگە

بۇل ماقالادا ورىندالىپ قويعان 4 كەلىسىمشارتقا توقتالدىق. ونىڭ ءبىرىنشىسى "تۇرلەنگەن تۇركىستان" اتتى ۆيدەوروليك كونتەنتىن دايىنداۋ ءۇشىن جاسالعان كەلىسىمشارت. وعان 5 اقپاندا قول قويىلىپ، تاپسىرىس 2 ناۋرىزدا ورىندالعان سوڭ مەردىگەر كومپانياعا اقىسى تولىعىمەن تولەنگەن. كەلىسىمشارت ءبىر كوزدەن ساتىپ الۋ ءتاسىلى بويىنشا جاسالعان. باعاسى – 12,3 ملن تەڭگە.

بۇل ساتىپ الۋدىڭ تەحنيكالىق سيپاتتاماسىنا قاراعاندا، تاپسىرىستى ورىنداۋشى "تۇرلەنگەن تۇركىستان" تاقىرىبىندا حرونومەتراجى 1 مينۋتتان كەم ەمەس 10 ۆيدەوروليك دايىنداۋعا ءتيىس.

12,3 ملن تەڭگەگە جاسالعان كەلىسىمشارتتىڭ تەحنيكالىق سيپاتتاماسىنىڭ سكرينى

بۇل ساتىپ الۋ بويىنشا تاپسىرىستى ورىنداۋشى – جك كۋلۋمبەتوۆ. ۇلتتىق ستاتيستيكا بيۋروسىنىڭ سايتىنداعى اقپاراتقا سايكەس، كومپانيا قوجايىنى – 33 جاستاعى سەرعالي بەيسەنقۇلۇلى قۇلىمبەتوۆ. كومپانيا شىمكەنت قالاسىندا تىركەلگەن. مەملەكەتتىك ساتىپ الۋ پورتالىندا ەكى كەلىسىمشارت جاساسقان. ەكەۋىندە دە تاپسىرىس بەرۋشى – تۇركىستان وبلىسىنىڭ قوعامدىق دامۋ باسقارماسى.

جۇمىسى ءبىر، اقىسى ءارتۇرلى ەكى كەلىسىمشارت

ەكىنشى كەلىسىمشارت تا 5 اقپاندا جاسالىپ، 2 ناۋرىزدا ورىندالعان. مۇندا دا ءبىر كوزدەن ساتىپ الۋ ءتاسىلى قولدانىلعان. كەلىسىمشارت باعاسى – 41,4 ملن تەڭگە. تەحنيكالىق سيپاتتاماعا ساي، تاپسىرىستى ورىنداۋشى "ۇلى دالا تاريحى" اتتى تاقىرىپتا حرونامەتراجى 25 مينۋتتان كەم ەمەس 2 ۆيدەوروليك دايىنداۋعا ءتيىس. بۇل كەلىسىمشارتتىڭ ماقساتىن باسقارما بىلاي سيپاتتايدى: "تۇركىستان وبلىسىنداعى تۋريزم، اڭىزدار مەن ارحەولوگيالىق قازبالار جانە ت.ب. باعىتتارى تۋرالى  بۇقارانى حاباردار ەتىپ، وڭىردەگى دوستىقتى ناسيحاتتاۋ" .

41,4 ملن تەڭگەگە جاسالعان كەلىسىمشارتتىڭ تەحنيكالىق سيپاتتاماسىنىڭ سكرينى

ءۇشىنشى كەلىسىمشارتتىڭ تەحنيكالىق ەرەكشەلىگى ەكىنشىگە وتە ۇقساس، ال پورتالداعى قىسقاشا سيپاتتاماداعى اتاۋى بىردەي. ەكەۋى دە "ۇلى دالا تاريحى" اتتى روليكتەر دايىنداۋ" دەپ اتالعان. جوعارىداعى ەكىنشى ساتىپ الۋ بويىنشا تاپسىرىستى ورىنداۋشى "ۇلى دالا تاريحى" اتتى تاقىرىپتا حرونومەتراجى 25 مينۋتتان كەم ەمەس 2 ۆيدەوروليك ازىرلەۋگە ءتيىس بولسا، ءۇشىنشى كەلىسىمشارتتىڭ تالابىنا ساي حرونومەتراجى 40 مينۋتتان كەم ەمەس ءۇش ۆيدەوروليك دايىنداۋى شارت. ءبىر قىزىعى، ءۇشىنشى كەلىسىمشارتتىڭ جۇمىسى ەكىنشىسىنە قاراعاندا كولەمدى بولعانىمەن، باعاسى ودان الدەقايدا ارزان (24,6 ملن تەڭگە).

24,6 ملن تەڭگەگە جاسالعان كەلىسىمشارتتىڭ تەحنيكالىق سيپاتتاماسىنىڭ سكرينى

بۇل ساتىپ ساتىپ الۋدى ورىنداۋشى – شىمكەنت قالاسىندا تىركەلگەن "CARAT CONSTRUCTION" جشس. ۇلتتىق ستاتيستيكا بيۋروسىنىڭ سايتىندا كومپانيا 2011 جىلدىڭ جەلتوقسانىندا قۇرىلعانى كورسەتىلگەن. اينالىساتىن قىزمەتىنىڭ ءتۇرى – "قانداي دا ءبىر ناقتىلاۋسىز تاۋارلاردىڭ كەڭ اسسورتيمەنتىن كوتەرمە باعادا ساتۋ". قوجايىنى – سۇلتان قايراتۇلى بەرداۋلەتوۆ.

كومپانيا مەملەكەتتىك ساتىپ الۋ پورتالىنا 2016 جىلى تىركەلگەن. سول جىلى اشىق كونكۋرس ءتاسىلى ارقىلى ەكى تەندەر ۇتىپ العان. ەكەۋىندە دە تاپسىرىس بەرۋشى – شىمكەنت قالاسىنىڭ ءبىلىم باسقارماسى. باسا ايتا كەتەتىن جايت – كومپانيا ول كەزدەگى ەكى كەلىسىمشارتقا ساي، قوقىس شىعارۋ قىزمەتىن كورسەتكەن جانە مەكتەپ دارەتحاناسىنىڭ سىرتىنا جوندەۋ جۇمىستارىن جۇرگىزگەن.

تۇركىستان وبلىسى قوعامدىق دامۋ باسقارماسى بۇل كومپانياعا نە سەبەپتى ۆيدەوروليك دايىنداۋدى تاپسىرعانى تۇسىنىكسىز. نەگىزى مەملەكەتتىك ساتىپ الۋ تۋرالى زاڭىنىڭ 41-بابى 2-تارماعىنا ساي، كەلىسىمشارت تىكەلەي ءبىر كوزدەن ساتىپ الۋ ءتاسىلى بويىنشا جاسالسا، تاپسىرىس بەرۋشى كەلىسىمشارقا قول قويىلعان cوڭ 10 جۇمىس كۇنى ىشىندە پورتالعا مەملەكەتتىك ساتىپ الۋ تۋرالى ەسەپتى ورنالاستىرۋعا مىندەتتى. ول ەسەپتە تاپسىرىستى ورىنداۋشىنى تاڭداۋدىڭ نەگىزدەمەسى كورسەتىلۋگە ءتيىس. الايدا مەملەكەتتىك ساتىپ الۋ پورتالىندا تۇركىستان وبلىسى قوعامدىق دامۋ باسقارماسى "CARAT CONSTRUCTION" كومپانياسىمەن قانداي نەگىزدە تىكەلەي ءبىر كوزدەن ساتىپ الۋ ءتاسىلى بويىنشا كەلىسىمشارت جاساسقانى جايلى اقپارات كەلتىرمەگەن.

10 ملن تەڭگە تۇراتىن "تاڭعاجايىپ تۇركىستان"

قوعامدىق دامۋ باسقارماسى جاساسقان ءتورتىنشى كەلىسىمشارتتىڭ قۇنى – 10 ملن تەڭگە. وعان 8 اقپاندا قول قويلىپ، تاپسىرىس 2 ناۋرىزدا ورىندالىپ بىتكەن. بۇل ساتىپ الۋدىڭ پورتالداعى تولىق اتاۋى: "تاڭعاجايىپ تۇركىستان" اتتى فيلم ءتۇسىرىلىمىن ۇيىمداستىرىپ، رەسپۋبليكالىق تەلەارنالاردان كورسەتىلۋىن ۇيىمداستىرۋ". تەحنيكالىق سيپاتتاماسىندا تاپسىرىستى ورىنداۋشى وبلىستىڭ كورىكتى جەرلەرى، تابيعاتى مەن جابايى اڭدارى، كولدەرى مەن وزەندەرى جايلى ارنايى فيلمدەر ءتۇسىرىپ، تەلەارنادان كورسەتۋگە ءتيىس دەلىنگەن. بارلىعى 10 ۆيدەو دايىندالۋى قاجەت. ولاردىڭ ارقايسىنىڭ حرونومەتراجى 15 مينۋتتان كەم بولماۋى مىندەتتى.

10 ملن تەڭگەگە جاسالعان كەلىسىمشارتتىڭ تەحنيكالىق سيپاتتاماسىنىڭ سكرينى

مەملەكەتتىك ساتىپ الۋ پورتالىنداعى اقپاراتقا قاراعاندا، بۇل كەلىسىمشارت بويىنشا تاپسىرىستى ورىنداۋشى – "تۇران تۆ" جشس. بۇل كومپانيا 2013 جىلى الماتى قالاسىندا تىركەلگەن. تەلەۆيزيالىق باعدارلامالار دايىنداۋمەن جانە تاراتۋمەن اينالىسادى. قوجايىنى – رومان بەيدالۇلى بوتابەكوۆ. كومپانيا 2016 جىلدان بەرى مەملەكەتتىك ساتىپ الۋ پورتالىندا 19 كەلىسىمشارت جاساسقان. ونىڭ بارلىعى تىكەلەي ءبىر كوزدەن ساتىپ الۋ ءتاسىلى بويىنشا.

"تۇران تۆ" جاساسقان 19 كەلىسىمشارتتىڭ ۇشەۋىندە تاپسىرىس بەرۋشى – تۇركىستان وبلىسى قوعامدىق دامۋ باسقارماسى. ونىڭ ۇستىنە بۇل كومپانيا ءۇش كەلىسىمشارتتا دا "تاڭعاجايىپ تۇركىستان" تاقىرىبىندا ۆيدەو ءتۇسىرىپ، ونى رەسپۋبليكالىق تەلەارنادان كورسەتۋگە مىندەتتەلگەن. كەلىسىمشارتتار 2019, 2020, 2021 جىلدارى جاسالعان. ۇشەۋىنىڭ دە تەحنيكالىق سيپاتتاماسى ۇقساس. ماسەلەن، كومپانيا 2020 جىلى جاسالعان كەلىسىمشارت بويىنشا "تاڭعاجايىپ تۇركىستان" تاقىرىبىندا ۇزاقتىعى 15 مينۋتتان كەم ەمەس 10 ۆيدەو تۇسىرگەن. 2021 جىلعى كەلىسىمشارت بويىنشا دا ءدال سونداي قىزمەت كورسەتكەن. ونى وسى كومپانياعا تيەسىلى "Turan TV" يۋتۋب ارناسىنان كورۋگە بولادى.

نازار اۋدارتاتىن ءبىر جايت، ەكى جىلعى كەلىسىمشارتتىڭ دا باعاسى بىردەي، ياعني 10 ملن تەڭگە. ال 2019 جىلعى كەلىسىمشارتتىڭ باعاسى بۇلاردان ەكى ەسەگە ارزان (5 ملن تەڭگە). بۇعان قوسا، ول كەزدە اتقارىلۋعا ءتيىس قىزمەت سوڭعى ەكى جىلداعىمەن سالىستىرعاندا الدەقايدا كولەمدى. ماسەلەن، 2019 جىلى جاسالعان كەلىسىمشارتقا سايكەس، "تۇران تۆ" "تاڭعاجايىپ تۇركىستان" تاقىرىبىندا ارقايسى 15 مينۋتتىق 10 ۆيدەو ەمەس، 15 ۆيدەو تۇسىرۋگە مىندەتتەلگەن. بىراق ول كەزدە كومپانياعا وسى قىزمەتى ءۇشىن 5 ملن تەڭگە عانا تولەنگەن ەدى.

P.S. "The Qazaq Times" ءتىلشىسى بۇل ماقالانى رەسمي دەرەككوزدەگى اقپاراتتار بويىنشا دايىندادى. ءتىلشى تۇركىستان وبلىسىنىڭ قوعامدىق دامۋ باسقارماسىنا حابارلاسىپ، بىرنەشە ساۋالعا جاۋاپ الۋعا تىرىستى. الايدا باسقارماداعىلار قويىلعان ساۋالدارعا تەك رەسمي حات جىبەرىلگەن جاعدايدا عانا جاۋاپ بەرىتىنىن جەتكىزدى. رەداكتسيا باسقارماعا رەسمي سۇراۋ جولدادى. تۇركىستان اكىمدىگىنەن جاۋاپ بولعان جاعدايدا، وقىرمانعا ونى دا جەتكىزەمىز.

"The Qazaq Times"