QazWU-dıñ 11 mlrd teñgege tender ötkizuine «oqıtuşılar» qarsı

Äl-Farabi atındağı Qazaq wlttıq universiteti (QazWU) infraqwrılımdı kütip-wstauğa kölemi şamamen 11 mlrd teñge qarajat bolatın tender jariyaladı. Alayda bwl JOO oqıtuşılarınıñ bir böligi qarsılığın tudırdı.

Informburo.kz redakciyasına özderin QazWU oqıtuşıları retinde tanıstırğan toptan hat kelip tüsken. Olar rektor Janseyit Tüymebaev pen «onıñ adamdarın» memsatıpalu räsimin bwzıp, bağanı negizsiz ösirdi dep ayıptaydı. Ğalımdar qomaqtı qarajatqa keşendi qızmetterdi qamtitın tender ötkizu «byudjet qarjısın jasırın jımqırudıñ oñtaylı ädisi» dep esepteydi.

Hattıñ avtorları «Akcionerlik qoğamdar turalı» zañnıñ bwzılğanına nazar audartadı.

«Soması 11 mlrd bolatın memlekettik satıp alu universitet aktivteriniñ balanstıq qwnınan 25%-ğa köp, al mwnday jağdayda kelisim-mämileler jasasu turalı şeşim tek universitettiñ direktorlar keñesi tarapınan ğana qabıldanuı tiis».

QazWU ğimarattarına qatıstı lotta tapsırıs orındauşı üş jıl boyı lift jwmısı, ğimarattardıñ tazalıq, qar küreu-şığaru, keñse jihazdarın jöndeu siyaqtı t.b. qızmet türlerin körsetui tiis. Konkurstıq täsilmen ötetin memlekettik satıp aluğa ötinim beru kezeñi 8-23 qazan aralığında jürgizilmek.

Byudjeti asa qomaqtı memlekettik satıp alu turalı habarlamada tek bir ğana lot jariyalanğan. Lot atauı – «Ğimarattardı/qwrılıstardı/üy-jaylardı jäne irgeles aumaqtardı kütip – wstau jönindegi qızmetter» dep körsetilgen. Al qosımşa sipattamasında «äl-Farabi atındağı Qazaq wlttıq universiteti» Kommerciyalıq emes akcionerlik qoğamınıñ ğimarattarına keşendi qızmet körsetu jöninde» ekeni atalıp, jalpı qwnı 10 mlrd 974 mln 841 mıñ 673 (10 974 841 673) teñge dep belgilengen.

Soması asa qomaqtı twratın memsatıpalu habarlandıruınıñ skrin-sureti. Foto: satypalu.gov.kz

Bwl qarjı üş jılğa eseptelgen: birinşi jılı  844 mln, ekinşi jılı 3,3 mlrd jäne üşinşi jılı 3,3 mlrd teñge jwmsau josparlanğan.

Informburo.kz saytınıñ jazuınşa, JOO baspasöz kızmeti aqparat qwralınıñ swrauına qatıstı universitet qızmetiniñ beyindi emes türlerin autsorsingke bere otırıp, jıldıq şığındı 20%-ğa ünemdegenin habarlağan.

«QazWU negizgi qızmeti –  bilikti mamandar dayarlau jäne ğılımi zertteuler jürgizu.  JOO-da 3 mıñğa juıq professor, oqıtuşı men ğılımi qızmetker jwmıs isteydi, 26 mıñ student bilim aladı. Universitet jarğıda körsetilmegen özine tän emes funkciyalardı orındamauı tiis», – dep jauap bergen onlayn basılımğa.

Universitettiñ baspasöz qızmeti bergen aqparatqa qarağanda, jeñimpaz mekeme qalaşıqtağı 44 nısanğa, onıñ işinde 16 jataqhana men 24 oqu jäne äkimşilik ğimarattarına, 78 gektar aumaqtı alıp jatqan tört jer uçaskesine, sonday-aq elektrmen jabdıqtau jelilerine – 12 qosalqı stanciya men 58 km kabel'ge, wzındığı 15,7 km bolatın sumen jabdıqtau jäne jılıtu jüyelerine qızmet körsetedi.

The Qazaq Times