QazWU qalaşığınıñ kireberis arkası. Foto: mdp.kaznu.kz

Äl-Farabi atındağı QazWU jariyalağan kampus aumağına 10,9 mlrd teñge qarjığa qızmet körsetu jönindegi daulı memlekettik satıp alu habarlandıruı belgilengen merzimde iske aspadı, uaqıtşa toqtatılğan boluı ıqtimal.

7 qazanda Almatı qalası boyınşa işki memlekettik audit departamenti kameraldı baqılau kezinde anıqtalğan bwzuşılıqtardı joyu turalı nwsqama bergen. Habarlandıruda «uäkiletti organdardıñ şeşimine say» konkurstı boldırmau turalı körsetilgen.

Aqparatqa qarağanda, departamenttiñ kameraldı baqılau böliminiñ bas mamanı Jampoz Bukenov bayqaudı wyımdastıruşınıñ qwjattamağa biliktilik talaptarı men şarttarın belgileu kezinde memlekettik satıp alu turalı zañnamanı bwzğanın anıqtağan.

Atap aytqanda, «Memlekettik satıp alu turalı» zañğa säykes, satıp aludı wyımdastıruşı konkurs qwjattamasın qazaq jäne orıs tilderinde äzirleydi.

«Satıp aludı zertteu arqılı tehnikalıq erekşelikte ornalastırılğan aqparat tek orıs tilinde ğana äzirlengeni anıqtaldı, bwl rette memlekettik tilde aqparat joq», – delingen habarlamada.

Satıp alınatın qızmetter men tauarlar mügedekter qauımdastığınıñ tizbesimen bekitilgen.

«Alayda wyımdastıruşı habarlandıruda satıp alu tek qana respublika mügedekteriniñ qoğamdıq birlestikteri men sol QB qwrğan wyımdar arasında ötkiziletini körsetilmegen», – delingen qwjatta.

Anıqtalğan bwzuşılıqtardı tüzetu turalı eskertudi JOO 10 jwmıs küni işinde orındauğa tiis. Olay bolmağan jağdayda memlekettik audit uäkiletti organğa qarsılıq jibere aladı.

44 nısanğa türli bağıtta keşendi qızmet körsetuge arnalğan qomaqtı tender qoğam nazarın audarıp, oğan bir top oqıtuşı-professor narazılıq tanıtqan. Olar wlttıq universitettiñ bwl äreketin «qarjı jımqıru piğılınan tuğan ayla» dep atağan.

The Qazaq Times