Kongress hol mañında äleumettik kömekti köbeytudi talap etip, narazılıq ötkizip twrğan äyelder. 1 säuir 2021 jıl. Foto: azattyq.org

Bügin, 1 säuirde el astanasında bir top ana Kongress holl sarayınıñ aldında narazılıq jiının ötkizdi. Olar bala sanına qaramastan otbasındağı är balağa 42 500 teñge järdemaqı tağayındau, köp balalı otbasılardı, mügedek bala tärbielep otırğan analarğa arzan bağamen nesiege baspana beru jäne özge mäselelerdi köterdi.

Azattıq radiosınıñ jazuınşa, äyelder qaladağı epidemiologiyalıq ahualdı eskerip, qaşıqtıq saqtap twrğan. Olardıñ qolında «Üy kezegi nege aqırın jıljidı? Baspana mäselesi şeşilsin!», «Otbası şağın memleket. Otbası joq bolsa, memleket te joq» degen jazuı bar plakattar bolğan.

Narazılar bala tuğan kezde beriletin bir rettik tölemdi 1,5 mln teñgege deyin köbeytu qajettigin, ol balanıñ bilim aluına negizdelui kerek degendi ayttı.

Narazılardıñ aldına şıqqan qala äkimdigi işki sayasat basqarmasınıñ basşısı Däuren Babamwratov şaranıñ rwqsat etilmegenin alğa tarttı. Ol narazılıqqa şıqqandardıñ jağdayınan habardar ekenin, olardıñ baspana jaylı şağımdarın äkimdiktiñ qarastırıp jatqanın aytıp ötti. Bwğan qosa, Babamwratov baspanağa mwqtaj azamattarğa üy kezek arqılı beriletinin jetkizdi.

Olar aqpannıñ soñında jäne naurızdıñ basında da baspana mäselesin şeşudi talap etip, äkimdikte tünegen. Sol kezde sanitariya mamandarınıñ epidemiologiyalıq ahualdı alğa tartıp, olardı äkimdikten quğanı da habarlandı.

Qazaqstanda 2019 jıldan beri äleumettik mäsele köterip narazılıq şığatın jalğızbastı jäne köp balalı äyelder köp. Olar köteretin bastı mäsele – baspana.

"The Qazaq Times"