استانادا ونداعان ايەل نارازىلىققا شىقتى

بۇگىن، 1 ساۋىردە ەل استاناسىندا ءبىر توپ انا كونگرەسس حولل سارايىنىڭ الدىندا نارازىلىق جيىنىن وتكىزدى. ولار بالا سانىنا قاراماستان وتباسىنداعى ءار بالاعا 42 500 تەڭگە جاردەماقى تاعايىنداۋ، كوپ بالالى وتباسىلاردى، مۇگەدەك بالا تاربيەلەپ وتىرعان انالارعا ارزان باعامەن نەسيەگە باسپانا بەرۋ جانە وزگە ماسەلەلەردى كوتەردى.

ازاتتىق راديوسىنىڭ جازۋىنشا, ايەلدەر قالاداعى ەپيدەميولوگيالىق احۋالدى ەسكەرىپ، قاشىقتىق ساقتاپ تۇرعان. ولاردىڭ قولىندا «ءۇي كەزەگى نەگە اقىرىن جىلجيدى؟ باسپانا ماسەلەسى شەشىلسىن!»، «وتباسى شاعىن مەملەكەت. وتباسى جوق بولسا، مەملەكەت تە جوق» دەگەن جازۋى بار پلاكاتتار بولعان.

نارازىلار بالا تۋعان كەزدە بەرىلەتىن ءبىر رەتتىك تولەمدى 1,5 ملن تەڭگەگە دەيىن كوبەيتۋ قاجەتتىگىن، ول بالانىڭ ءبىلىم الۋىنا نەگىزدەلۋى كەرەك دەگەندى ايتتى.

نارازىلاردىڭ الدىنا شىققان قالا اكىمدىگى ىشكى ساياسات باسقارماسىنىڭ باسشىسى داۋرەن بابامۇراتوۆ شارانىڭ رۇقسات ەتىلمەگەنىن العا تارتتى. ول نارازىلىققا شىققانداردىڭ جاعدايىنان حاباردار ەكەنىن، ولاردىڭ باسپانا جايلى شاعىمدارىن اكىمدىكتىڭ قاراستىرىپ جاتقانىن ايتىپ ءوتتى. بۇعان قوسا، بابامۇراتوۆ باسپاناعا مۇقتاج ازاماتتارعا ءۇي كەزەك ارقىلى بەرىلەتىنىن جەتكىزدى.

ولار اقپاننىڭ سوڭىندا جانە ناۋرىزدىڭ باسىندا دا باسپانا ماسەلەسىن شەشۋدى تالاپ ەتىپ، اكىمدىكتە تۇنەگەن. سول كەزدە سانيتاريا ماماندارىنىڭ ەپيدەميولوگيالىق احۋالدى العا تارتىپ، ولاردى اكىمدىكتەن قۋعانى دا حابارلاندى.

قازاقستاندا 2019 جىلدان بەرى الەۋمەتتىك ماسەلە كوتەرىپ نارازىلىق شىعاتىن جالعىزباستى جانە كوپ بالالى ايەلدەر كوپ. ولار كوتەرەتىن باستى ماسەلە – باسپانا.

"The Qazaq Times"