Konsuldıq ornalasqan köşede ötken pikette policeyler ädettegidey baqılap twrdı. 30 naurız 2021 jıl. Foto: Serik Äjibaydıñ Facebook jelisindegi beyne efirinen skrin-qiındı

Almatıda Qıtaydıñ Şıñjañdağı sayasatın sınap, tuıstarına bostandıq swrağan qazaqstandıqtardıñ narazılıq akciyasın ötkizip jürgenine 50 künnen astı.

Kün tünerip, jauın silbirlep twr. Jer sız tartadı. Seysenbi küni sağ. 11.00 şamasında Qıtay konsuldığı ornalasqan köşege osı uaqıtqa deyin şığıp jürgen on şaqtı adamnan üş äyel tağı keldi. Olar basqaları auırıp qalğanın, keybiriniñ jeke mäselelerine baylanıstı kele almağanın aytadı. Policiya ädettegidey elşilik ğimaratına baruğa tırısqan keyuananı juıtpadı.

Konsuldıq aldına jinalğandar «Konsul lagerin japsın!», «Qıtay, qazaqtı qorlama», «Otbasımızdı jibersin», «Tuıstarımızğa erkindik bersin», «Jazıqsızdardı bosatsın», «Qazaqtı qorlamasın», «Genocid toqtatılsın!» dep ayqayladı.

Qarsılıq akciyasına üzdiksiz şığıp kele jatqan narazılar tuıstarı men otbası müşeleriniñ negizsiz ayıptarmen wzaq jıldarğa sottaldı dep nalidı. Keybirinen birneşe jıl boyı iz-habar üzilgenin, tipti tiri ya öli ekenin bilmeydi deydi. 70 jastağı anasına swrau salğan Gülpiya Qazıbek «konsuldıq aldına piketke şıqqanım üşin Qıtaydağı inime eskertu jasalıptı» deydi. Jeñishan Jañbırbay, Läzzatqan jäne Qaynigül Qanabekqızın izdegen azamattar bilik tarapınan twşımdı qadam bolmağanına aşınadı.

«Eks-prezident Nwrswltan Nazarbaev pen qazirgi memleket basşısı Qasım-Jomart Toqaevtan wldarıma tağılğan negizsiz ayıptardı alıp, elge oraluına kömektesuin swraymın», – deydi qart keyuana.

Konsuldıq mañındağı azamattıq akciyadan birneşe aptadan beri äleumettik jelilerde tikeley efir jürgizip jürgen belsendi Serik Äjibay öziniñ policiyağa şaqırılğanın habarladı. «Bahadürbek köşesindegi bahadür analardıñ talabı iske assın» dep narazılarğa bolısıp jürgen oğan Almatınıñ Medeu audandıq policiya basqarması qızmetkerleri 28 naurız tünde habarlasqan. Audandıq policiya basqarmasınıñ bastığı Däuren Ötebaevtıñ qolı qoyılğan qağazda Serik Äjibaydıñ 1 aqpannan beri bir top adammen elşilik ornalasqan aumaqta «Qıtay azamattarın qorğap, rwqsat etilmegen piket ötkizip jür» dep jazılğan. Arız iesi Äjibaydı Äkimşilik kodekstiñ 488-babı boyınşa jauapqa tartudı swrağan desedi.

Eki ayğa juıq uaqıtqa jalğasqan narazılıq wyımdastıruşılarına konsuldıqtan eşkim şıqpağan. Sırtqı ister ministrliginen ökil de kelmegen. Bwğan deyin Qıtaydıñ Qazaqstandağı elşisi Çjan Syao SİM swrauınan keyin Şıñjañda qamalğan qazaqtardıñ «QHR azamatı» ekenin jäne olardıñ «zañ bwzğanı üşin jauapqa tartılğanın» mälimdegen edi.

Halıqaralıq wyımdar Beyjiñdi Şıñjañda türkitildi mwsılmandardı qudalağanı üşin ayıptap, birqatar batıs elderi Qıtayğa sankciya salğan.

"The Qazaq Times"