Birneşe ay boyı Şıñjañdağı tuıstarına araşa swrap, Almatıdağı, astanadağı Qıtay konsuldığı aldında narazılıq akciyasın ötkizip jürgen bir top azamat endi prezident Qasım-Jomart Toqaevqa qayrıldı. Olar memleket basşısınıñ atına hat jazıp, Qıtaydağı tuıstarın Qazaqstanğa äkeluge ıqpal etudi jäne özimen kezdesuge mümkindik berudi swradı. Bwl jaylı 29 qırküyek küni Azattıq radiosı jazdı. 

Basılım aqparatına qarağanda, narazı top ökili Baybolat Künbolatwlınıñ 29 qırküyekte hattı prezident äkimşiliginiñ qızmetkerleri qabıldap alğanın aytqan.

"[Prezident] mümkindik bolsa bizben kezdesse eken. Hattı Almatıdan kelgen on adam tügel barıp tapsırdıq. Osığan deyin BWW Qazaqstandağı ökildigine, Sırtqı ister ministrligine hat tapsırğanbız. SİM bizdiñ şağım boyınşa "Qıtay tarapına nota joldadı" deydi. Biraq nätije bolmağanına qarnımız aşadı" dedi Baybolat Künbolatwlı.

Şıñjañdağı tuıstarın qaytarudı talap etip jürgender narazılıq akciyaların Almatı qalasında bastağan. Olar 224 kün boyı Almatıdağı Qıtay konsuldığına barıp, Beyjiñnen Şıñjañdağı tuıstarın Qazaqstanğa jiberudi talap etken. Narazılar üş apta konsuldıq aldında tünegen edi. Olardıñ aytuınşa, jeti aydan astam uaqıtqa sozılğan akciya barısında Qıtay konsuldığınan birde-bir adam şığıp, jauap bermegen. Al özderi "zañsız jiın ötkizdi" degen ayıppen äkimşilik jauapqa tartılğan.

BWW esebinşe, Qıtay Şıñjañda lager'ler aşıp millionğa juıq wyğır, qazaq jäne basqa da mwsılmandardı jazıqsız qamağan. Batıs elderi Beyjiñniñ Şıñjañdağı äreketin «genocid» dep tanığan. Qıtay biligi bwl ayıptardı joqqa şığarıp keledi. Qazaqstan biligi qısım-qudalauğa tüsken qandastardıñ jağdayı turalı tuıstarınıñ (Qazaqstan azamatı sanalatın – QT) jüzdegen arızına qaramastan mwnı «Qıtaydıñ işki şaruası» dep sanaydı. Täuelsiz sarapşılar mwnı «Estitin Ükimettiñ» (Qazaqstannıñ – QT) ekonomikalıq-investiciyalıq müddeni qandastar ömir-qwqığınan joğarı qoyğanın añğartadı dep topşılaydı.

The Qazaq Times