قىتاي كونسۋلدىعىنىڭ الدىندا ءوتىپ جاتقان نارازىلىققا 50 كۇننەن استى

الماتىدا قىتايدىڭ شىڭجاڭداعى ساياساتىن سىناپ، تۋىستارىنا بوستاندىق سۇراعان قازاقستاندىقتاردىڭ نارازىلىق اكتسياسىن وتكىزىپ جۇرگەنىنە 50 كۇننەن استى.

كۇن تۇنەرىپ، جاۋىن سىلبىرلەپ تۇر. جەر سىز تارتادى. سەيسەنبى كۇنى ساع. 11.00 شاماسىندا قىتاي كونسۋلدىعى ورنالاسقان كوشەگە وسى ۋاقىتقا دەيىن شىعىپ جۇرگەن ون شاقتى ادامنان ءۇش ايەل تاعى كەلدى. ولار باسقالارى اۋىرىپ قالعانىن، كەيبىرىنىڭ جەكە ماسەلەلەرىنە بايلانىستى كەلە الماعانىن ايتادى. پوليتسيا ادەتتەگىدەي ەلشىلىك عيماراتىنا بارۋعا تىرىسقان كەيۋانانى جۋىتپادى.

كونسۋلدىق الدىنا جينالعاندار «كونسۋل لاگەرىن جاپسىن!»، «قىتاي، قازاقتى قورلاما»، «وتباسىمىزدى جىبەرسىن»، «تۋىستارىمىزعا ەركىندىك بەرسىن»، «جازىقسىزداردى بوساتسىن»، «قازاقتى قورلاماسىن»، «گەنوتسيد توقتاتىلسىن!» دەپ ايقايلادى.

قارسىلىق اكتسياسىنا ۇزدىكسىز شىعىپ كەلە جاتقان نارازىلار تۋىستارى مەن وتباسى مۇشەلەرىنىڭ نەگىزسىز ايىپتارمەن ۇزاق جىلدارعا سوتتالدى دەپ ناليدى. كەيبىرىنەن بىرنەشە جىل بويى ءىز-حابار ۇزىلگەنىن، ءتىپتى ءتىرى يا ءولى ەكەنىن بىلمەيدى دەيدى. 70 جاستاعى اناسىنا سۇراۋ سالعان گۇلپيا قازىبەك «كونسۋلدىق الدىنا پيكەتكە شىققانىم ءۇشىن قىتايداعى ىنىمە ەسكەرتۋ جاسالىپتى» دەيدى. جەڭىسحان جاڭبىرباي، لاززاتقان جانە قاينيگۇل قانابەكقىزىن ىزدەگەن ازاماتتار بيلىك تاراپىنان تۇششىمدى قادام بولماعانىنا اشىنادى.

«ەكس-پرەزيدەنت نۇرسۇلتان نازارباەۆ پەن قازىرگى مەملەكەت باسشىسى قاسىم-جومارت توقاەۆتان ۇلدارىما تاعىلعان نەگىزسىز ايىپتاردى الىپ، ەلگە ورالۋىنا كومەكتەسۋىن سۇرايمىن»، – دەيدى قارت كەيۋانا.

كونسۋلدىق ماڭىنداعى ازاماتتىق اكتسيادان بىرنەشە اپتادان بەرى الەۋمەتتىك جەلىلەردە تىكەلەي ەفير جۇرگىزىپ جۇرگەن بەلسەندى سەرىك ءاجىباي ءوزىنىڭ پوليتسياعا شاقىرىلعانىن حابارلادى. «باھادۇربەك كوشەسىندەگى ءباھادۇر انالاردىڭ تالابى ىسكە اسسىن» دەپ نارازىلارعا بولىسىپ جۇرگەن وعان الماتىنىڭ مەدەۋ اۋداندىق پوليتسيا باسقارماسى قىزمەتكەرلەرى 28 ناۋرىز تۇندە حابارلاسقان. اۋداندىق پوليتسيا باسقارماسىنىڭ باستىعى داۋرەن وتەباەۆتىڭ قولى قويىلعان قاعازدا سەرىك ءاجىبايدىڭ 1 اقپاننان بەرى ءبىر توپ اداممەن ەلشىلىك ورنالاسقان اۋماقتا «قىتاي ازاماتتارىن قورعاپ، رۇقسات ەتىلمەگەن پيكەت وتكىزىپ ءجۇر» دەپ جازىلعان. ارىز يەسى ءاجىبايدى اكىمشىلىك كودەكستىڭ 488-بابى بويىنشا جاۋاپقا تارتۋدى سۇراعان دەسەدى.

ەكى ايعا جۋىق ۋاقىتقا جالعاسقان نارازىلىق ۇيىمداستىرۋشىلارىنا كونسۋلدىقتان ەشكىم شىقپاعان. سىرتقى ىستەر مينيسترلىگىنەن وكىل دە كەلمەگەن. بۇعان دەيىن قىتايدىڭ قازاقستانداعى ەلشىسى چجان سياو ءسىم سۇراۋىنان كەيىن شىڭجاڭدا قامالعان قازاقتاردىڭ «قحر ازاماتى» ەكەنىن جانە ولاردىڭ «زاڭ بۇزعانى ءۇشىن جاۋاپقا تارتىلعانىن» مالىمدەگەن ەدى.

حالىقارالىق ۇيىمدار بەيجىڭدى شىڭجاڭدا تۇركىتىلدى مۇسىلمانداردى قۋدالاعانى ءۇشىن ايىپتاپ، بىرقاتار باتىس ەلدەرى قىتايعا سانكتسيا سالعان.

"The Qazaq Times"