Imamdar wsınğan şağın as mäziri. Foto: centralasian.org

Aqtöbe oblısınıñ imamdarı qwdayı tamaq kezinde ısırapqa jol bermeudiñ amalın jasadı. Olar "şağın as mäzirin" wsındı. 13 säuirden bastap ol ortalıq "Nwrğasır" meşitinde qoldanıla bastadı. "Şağın as mäzirine" qazaqtıñ wlttıq tağamdarı engen.

"Mwnday as mäzirin bekitu üşin, biz oblıstıñ barlıq audandarın aralap şıqtıq. 1 230 adamnıñ pikirin tıñdadıq. Olardıñ 85 payızı qwdayı tamaq kezinde ısırap köp bolatının ayttı", - dedi Qazaqstan mwsılmandarı dini basqarmasınıñ Aqtöbe oblısı boyınşa ökili Tölebi Ospanov.

As mäziri jergilikti meyramhanalar men kafelerde qoldanu josparda bar. Al oblıs imamdarı bolsa ısırap jasauğa bolmaytını turalı ügit jürgizedi.

"Oblıstıq meşittegi ashanada 100 adamğa 170 mıñ teñge (şamamen 550 dollar) ketedi. Sonıñ 105 mıñ teñgesi azıq-tülikke jwmsaladı. Al jergilikti meyramhanalar 100 adamğa arnalğan qwdayı tamaqqa kem degende 300-400 mıñ teñge aladı", - dedi "Nwrğasır" meşitiniñ aqsaqalı Bekejan qajı Ahanwlı.

Mwnday wsınıs dini räsimder men wlttıq dästürdi biriktiruge arnalğan konferenciyada aytıldı. Jiın soñında imamdar ısırapşıldıqpen küresuge kelisti.

“The Qazaq Times”