Astanadan bastalğan «Wlı dala asarı» Türkistanda jalğaspaq. Jaña oblıs ortalığına kim, ne sıylaytın boldı?

Astanadan bastalğan Wlı dala asarı Türkistanda jalğaspaq. Jaña oblıs ortalığına kim, ne sıylaytın boldı?

Prezident Nwrswltan Nazarbaev Qazaqstandağı alıp kompaniyalar men holding ielerine Türkistan qalasına jaña ğimarattar salıp berudi tapsırdı. Prezidenttiñ tapsırısı boyınşa, Aleksandr Beloviçtiñ basqaruındağı «Bazis-A» kompaniyası jaña oblıs ortalığına teatr, milliarder Patoh Şodievtıñ «ERG» kompaniyası türki halıqtarınıñ mwrajayın, «QazMwnayGaz» wlttıq kompaniyası zamanaui stadion, «BI Group» kompaniyası qazaq handarı, bileri jäne batırlarına arnalğan ortalıq, «Qazaqstan temir jolı» jastar sarayın, «KEGOC» akcionerlik qoğamı Qoja Ahmet YAssauige arnalğan mini muzey, stol tennisi federaciyasınıñ başısı Daniyar Äbilğazin su sportı keşenin, Astana Group kompaniyası avtosalon sıylaytın boldı. Bir sözben aytqanda türki düniesiniñ ortalığı sanalatın Türkistan qalasın qazaqstandıq milliarderler asarlatıp jürip Astana deñgeyine jetkizbese de, zamanaui qala därejesine jetkizbek. Astana demekşi, osı twsta elordamızdıñ 20 jıldıq merey toyına 14 oblıstıñ ne sıylağanın ayta ketken jön şığar.

Esteriñizde bolsa, şilde ayınıñ 6 küni Nwrswltan Nazarbaevtıñ tuğan künimen twspa-tws kelgen Astana qalasınıñ 20 jıldıq merey toyına Qızılorda oblısı ğarıştıq tehnologiyalar muzeyin (1,5 mlrd teñge), Almatı qalası 250 orındıq balabaqşa (1,084 mlrd teñge), Şığıs Qazaqstan oblısı muzıkalıq fontan (1,082 mlrd teñge), Aqtöbe oblısı «Beybitşilik qabırğasın» (1 mlrd teñge) sıyğa tartqan. Bwl qwnı 1 milliard teñgeden astqan sıylıqtardıñ bir sıpırası ğana. Negizinde Astananıñ bwl jolğı tuğan künine 14 oblıs 6 milliard teñge qarjı jwmsağan.

"The Qazaq Times"