AQŞ-tıñ Reseyge qatıstı sayasi wstanımdarı özgeredi. Bwl turalı Aq üydiñ baspasöz hatşısı Djeyn Psaki mälimdedi.

Djeyn Psaki wsınğan resmi mälimdemede: «Bwrınğı äkimşilikpen salıstırğanda Reseyge qatıstı bizdiñ wstanımımız özgeredi. Prezident swhbatında mwnı ayqın jetkizdi. Aramızda tuındağan mäseleler boyınşa naqtı jauap swraymız. Sonımen qatar birlesip jwmıs istey alatın salalar da bar. Bwğan ülgi retinde Strategiyalıq şabuıldauşı qaru-jaraq jöninde jasağan jaña kelisimdi keltiruge boladı. Biraq qarım-qatınasımız özgeşe boladı. Bizdi alañdatqan saualdar jöninde prezident aytqanday, Resey öz äreketteri üşin jauapkerşilikke tartıladı», – delingen.

16 naurızda AQŞ Wlttıq barlau qızmeti ötken jılğı prezidenttik saylauğa şetelderdiñ aralasuı jöninde bayandamanı jariyaladı. Oğan säykes, Vladimir Putin jäne Reseydiñ birqatar ükimettik wyımdarı Djo Baydendi äşkerelep, saylau ürdisine qoğamnıñ senimin joğaltpaq bolğan.

Barlau qızmetiniñ bayandamasınan keyin 17 naurızda Djo Bayden «AVS» telearnasına bergen swhbatında «Vladimir Putindi «baskeser/qanişer» dep esepteysiz be?» degen swraqqa «Iä!» dep jauap berdi. Sonday-aq ol eldegi saylauğa aralasqanı üşin Resey basşılığın jazalaytının eskertti.

Öz kezeginde Vladimir Putin Baydendi debatqa şaqırdı.Memlekettik telearnalardıñ birinde ol: «Ne dep jauap berer edim? Sau bolıñız der edim. Oğan densaulıq tileymin. Bwl äzil emes. Ekinşiden, osı taqırıptı keñinen talqılasaq, är halıq pen memlekettiñ tarihında talay auır jäne qandı oqiğalar bolğan. Biraq özge adamdardı, tipti halıqtar men memleketterdi bağalağanda aynağa qarağanday bolamız. Onda özimizdi köremiz. Bilesiz be, bala kezimdi eske aldım. Aulada bir-birimizben daulasqanda, «mazaqtağan adam özi sonday» deytin edik», – dep jauap berdi.

AQŞ biligi bwl wsınısqa äzirge jauap bergen joq. Prezident Äkimşiligi Aq üy basşısınıñ qolı bos emes ekenin jetkizdi. Al 18 naurızda Aq üy äkimşiligi Reseydiñ özge qimılı üşin sankciyalar auqımın keñeytti. Aleksey Naval'nıydı ulandıru äreketi üşin qaru-jaraq eksportı men importına jäne qorğanıs maqsatında qoldanıluı mümkin tehnologiyalarmen bölisuge tıyım saldı.

"The Qazaq Times"