Bayden men Putin arasındağı beyne sammit erteñ (7 jeltoqsan) keşte ötedi. Foto: The Statesman

AQŞ prezidenti Jo Bayden men RF prezidenti Vladimir Putin AQŞ-Resey qarım-qatınasındağı problemaların jäne Ukraina mäselesin talqılau üşin beyne-konferenciya ötkizbek. Aq üydiñ baspasöz qızmeti kezdesudiñ 7 jeltoqsan küni ötetinin mälimdedi.

Aq üy baspasöz ökili Jen Psaki sözinde: «Köşbasşılar AQŞ-Resey qarım-qatınasındağı keñ auqımdı mäselelerdi, sonıñ işinde strategiyalıq twraqtılıq, kiber jäne aymaqtıq mäselelerdi talqılaydı. Prezident Bayden talqıda Reseydiñ Ukraina şekarasındağı äskeri äreketterine qatıstı AQŞ-tıñ alañdauşılığın da jetkizip, Ukraina egemendigi men territoriyalıq twtastığın qoldaytının aytadı», – degen.

Putinniñ baspasöz ökili Peskov ta kezdesu turalı Interfax agenttigine rastağan. Ol kezdesudiñ seysenbi küni keşte bolatının aytqan.

Mäskeu soñğı uaqıtta Ukraina şekarasına jaqın aumaqta auır qol jinap, äskeri tehnikalardı toptastırıp otır. Reseydiñ bwl äreketi Ukraina ğana emes, Europa elderimen qatar AQŞ-tı da alañdattı. Bayden ötken jwmada jurnalisterge bergen jauabında Reseyge jauap retinde birqatar josparlardı jasap otırğanın aytqan edi.

NATO müşeleri de jağdayğa qatıstı mazasız küyde. Osı aptada alyans müşeleriniñ SİM basşıları kezdesip Reseydiñ qauipti äreketin talqılaydı. Wyımnıñ bas hatşısı Stoltenberg Reseyge eskertu jasap, qauipti qadam Reseyge zor şığın äkeletinin aytqan.

Al, AQŞ şeneunikteri Resey Ukrainanı auqımdı basıp aluğa wrınsa twtastay qarjılıq mümkindigin kesip tastaudıñ josparların aqıldasuda.

The Qazaq Times