اقش-تىڭ رەسەيگە قاتىستى ساياسي ۇستانىمدارى وزگەرەدى. بۇل تۋرالى اق ءۇيدىڭ ءباسپاسوز حاتشىسى دجەين پساكي مالىمدەدى.

دجەين پساكي ۇسىنعان رەسمي مالىمدەمەدە: «بۇرىنعى اكىمشىلىكپەن سالىستىرعاندا رەسەيگە قاتىستى ءبىزدىڭ ۇستانىمىمىز وزگەرەدى. پرەزيدەنت سۇحباتىندا مۇنى ايقىن جەتكىزدى. ارامىزدا تۋىنداعان ماسەلەلەر بويىنشا ناقتى جاۋاپ سۇرايمىز. سونىمەن قاتار بىرلەسىپ جۇمىس ىستەي الاتىن سالالار دا بار. بۇعان ۇلگى رەتىندە ستراتەگيالىق شابۋىلداۋشى قارۋ-جاراق جونىندە جاساعان جاڭا كەلىسىمدى كەلتىرۋگە بولادى. بىراق قارىم-قاتىناسىمىز وزگەشە بولادى. ءبىزدى الاڭداتقان ساۋالدار جونىندە پرەزيدەنت ايتقانداي، رەسەي ءوز ارەكەتتەرى ءۇشىن جاۋاپكەرشىلىككە تارتىلادى»، – دەلىنگەن.

16 ناۋرىزدا اقش ۇلتتىق بارلاۋ قىزمەتى وتكەن جىلعى پرەزيدەنتتىك سايلاۋعا شەتەلدەردىڭ ارالاسۋى جونىندە باياندامانى جاريالادى. وعان سايكەس، ۆلاديمير پۋتين جانە رەسەيدىڭ بىرقاتار ۇكىمەتتىك ۇيىمدارى دجو بايدەندى اشكەرەلەپ، سايلاۋ ۇردىسىنە قوعامنىڭ سەنىمىن جوعالتپاق بولعان.

بارلاۋ قىزمەتىنىڭ بايانداماسىنان كەيىن 17 ناۋرىزدا دجو بايدەن «اۆس» تەلەارناسىنا بەرگەن سۇحباتىندا «ۆلاديمير ءپۋتيندى «باسكەسەر/قانىشەر» دەپ ەسەپتەيسىز بە؟» دەگەن سۇراققا «ءيا!» دەپ جاۋاپ بەردى. سونداي-اق ول ەلدەگى سايلاۋعا ارالاسقانى ءۇشىن رەسەي باسشىلىعىن جازالايتىنىن ەسكەرتتى.

ءوز كەزەگىندە ۆلاديمير پۋتين بايدەندى دەباتقا شاقىردى.مەملەكەتتىك تەلەارنالاردىڭ بىرىندە ول: «نە دەپ جاۋاپ بەرەر ەدىم؟ ساۋ بولىڭىز دەر ەدىم. وعان دەنساۋلىق تىلەيمىن. بۇل ءازىل ەمەس. ەكىنشىدەن، وسى تاقىرىپتى كەڭىنەن تالقىلاساق، ءار حالىق پەن مەملەكەتتىڭ تاريحىندا تالاي اۋىر جانە قاندى وقيعالار بولعان. بىراق وزگە ادامداردى، ءتىپتى حالىقتار مەن مەملەكەتتەردى باعالاعاندا ايناعا قاراعانداي بولامىز. وندا ءوزىمىزدى كورەمىز. بىلەسىز بە، بالا كەزىمدى ەسكە الدىم. اۋلادا ءبىر-بىرىمىزبەن داۋلاسقاندا، «مازاقتاعان ادام ءوزى سونداي» دەيتىن ەدىك»، – دەپ جاۋاپ بەردى.

اقش بيلىگى بۇل ۇسىنىسقا ازىرگە جاۋاپ بەرگەن جوق. پرەزيدەنت اكىمشىلىگى اق ءۇي باسشىسىنىڭ قولى بوس ەمەس ەكەنىن جەتكىزدى. ال 18 ناۋرىزدا اق ءۇي اكىمشىلىگى رەسەيدىڭ وزگە قيمىلى ءۇشىن سانكتسيالار اۋقىمىن كەڭەيتتى. الەكسەي ناۆالنىيدى ۋلاندىرۋ ارەكەتى ءۇشىن قارۋ-جاراق ەكسپورتى مەن يمپورتىنا جانە قورعانىس ماقساتىندا قولدانىلۋى مۇمكىن تەحنولوگيالارمەن بولىسۋگە تىيىم سالدى.

"The Qazaq Times"