Foto: www.inform.kz

Qazaqstanda 1 aqpannan bastap koronavirusqa qarsı reseylik «Sputnik V» vakcinasın egu bastaldı. Densaulıq saqtau ministrliginiñ esebinşe, jıl soñına deyin 6 mln-ğa juıq azamatqa ekpe salınbaq. Bügin alğaşqılardıñ biri bolıp Densaulıq saqtau vice-ministrleri koronavirusqa qarsı vakcina saldırdı. Otandıq QazCovid-in ekpesi äli de sınaqtan ötkizilip jatır. Mälimetterge sensek, reseylik vakcina 92%, al qazaqstandıq vakcina 96% tiimdilik körsetken. 

Vakcinanıñ alğaşqı 20 mıñ dozası Reseyden äkelingen. Al 15 aqpannan bastap Qarağandıdağı farmacevtikalıq keşen öndirgen vakcina tirkeledi. Birinşi kezeñde 90 mıñ doza öndirilgen preparat öñirlerge 26 aqpannan bastap taratılmaq. Naurızda vakcinanıñ 150 mıñ dozası jetkiziledi. Keyinnen öndiris kölemin 2 mln dozağa deyin jetkizu josparlanuda.

Birinşi kezeñde şamamen 100 mıñ adam: infekciyalıq auruhana, jedel medicinalıq järdem, reanimaciya jäne qabıldau bölmeleri, sanepidqızmet medicina qızmetkerleri ekpe qabıldaydı.

1 naurızda bastalatın ekinşi kezeñde jalpı bilim beretin mektepterdiñ, JOO-nıñ pedagogteri, medicinalıq qızmet qızmetkerleri. 1 säuirden bastap üşinşi kezeñde: mektep-internattardıñ, mektepke deyingi balalar mekemeleriniñ pedagogteri, studentter jäne sozılmalı auruı bar adamdar egu saldıradı.

Vakcinanıñ qanday da bir komponentine asa joğarı sezimtaldığı bar adamdarğa, jükti äyelderge, 18 jasqa deyingi jäne 65 jastan asqan adamdarğa tiimdiligi men qauipsizdigi turalı derekterdiñ bolmauına baylanıstı ekpe eguge tıyım salınğan. Sonımen qatar, preparattı bauır men büyrektiñ sozılmalı auruları, qant diabeti, qan tüzu jüyesiniñ auruları, epilepsiya, insul't jäne jürek-tamır jüyesi auruları, bastapqı jäne qaytalama immundıq tapşılıq, autoimmundı aurular, ökpe auruları, astma jäne sozılmalı obstruktivti ökpe auruları, qaterli isik, onıñ işinde qaterli qan auruları bolğan jağdayda saqtıqpen qoldanu kerek.

31 qañtarda «Sputnik V» vakcinasınıñ alğaşqı 2 050 dozası Almatığa jetkizildi. 1 aqpanda tañerteñ ekpe segiz audannıñ emdeu mekemelerine taratıladı. Al qalada barlığı 40 egu punkti jwmıs istep twr. Sonımen qatar, vakcina alğandar 30 minut işinde därigerlerdiñ baqılauında bolatın jeke kabinet qarastırılğan.

Otandıq QazCovid-in vakcinasına keler bolsaq, birinşi kezeñde şamamen 2 mln doza öndiru josparlanğan. Qazir ol klinikalıq sınaqtardıñ III kezeñinen ötkizilip jatır. QazCovid-in naurızdıñ soñı men säuirde tirkeledi. Vakcinanıñ täjiribelik partiyasın şığaru biologiyalıq qauipsizdik problemaları institutınıñ bazasında, al täjiribelik-önerkäsiptik partiyası «Antigen» WKP JŞS öndiristik alañında şığarıladı. Otandıq vakcinanı öndiruşiler ekpe tolığımen qauipsiz dep sendiredi.

Qazaqstan Reseydiñ «Sputnik V» vakcinasın satıp aluğa 16,8 milliard teñge (40 million dollarğa juıq) jwmsamaq.

DenMin mälimetinşe, säuir-mamır aylarında barlıq qazaqstandıqtar ayasında koronavirusqa qarsı tegin ekpe ala aladı. Degenmen, ötken aptada Ükimet otırısında el prezidenti Toqaev «sınaqtan sätti ötken jağdayda, otandıq vakcinanı qabıldaymın» degen. Biraq DenMin Qazaqstanda 18 jasqa tolmağan balalar men 65 jastan asqandarğa «vakcinanıñ tiimdiligi men qauipsizdigi turalı mälimet joq bolğandıqtan», ekpe salınbaytının habarladı. YAğni 67 jastağı ekinşi prezidentke ekpe salınbaydı. «Qazaqstandıq ekpeni saldıramın» dep sendirgen prezidenttiñ bwl mälimdemesi men DenMin habaralamasındağı qayşılıq halıqtıñ vakcinaciyağa degen küdigin odan arı küşeytken tärizdi.

"The Qazaq Times"