قازاقستاندا جاپپاي ۆاكتسيناتسيالاۋ باستالدى

قازاقستاندا 1 اقپاننان باستاپ كوروناۆيرۋسقا قارسى رەسەيلىك «سپۋتنيك V» ۆاكتسيناسىن ەگۋ باستالدى. دەنساۋلىق ساقتاۋ مينيسترلىگىنىڭ ەسەبىنشە، جىل سوڭىنا دەيىن 6 ملن-عا جۋىق ازاماتقا ەكپە سالىنباق. بۇگىن العاشقىلاردىڭ ءبىرى بولىپ دەنساۋلىق ساقتاۋ ۆيتسە-مينيسترلەرى كوروناۆيرۋسقا قارسى ۆاكتسينا سالدىردى. وتاندىق QazCovid-in ەكپەسى ءالى دە سىناقتان وتكىزىلىپ جاتىر. مالىمەتتەرگە سەنسەك، رەسەيلىك ۆاكتسينا 92%، ال قازاقستاندىق ۆاكتسينا 96% تيىمدىلىك كورسەتكەن. 

ۆاكتسينانىڭ العاشقى 20 مىڭ دوزاسى رەسەيدەن اكەلىنگەن. ال 15 اقپاننان باستاپ قاراعاندىداعى فارماتسەۆتيكالىق كەشەن وندىرگەن ۆاكتسينا تىركەلەدى. ءبىرىنشى كەزەڭدە 90 مىڭ دوزا وندىرىلگەن پرەپارات وڭىرلەرگە 26 اقپاننان باستاپ تاراتىلماق. ناۋرىزدا ۆاكتسينانىڭ 150 مىڭ دوزاسى جەتكىزىلەدى. كەيىننەن ءوندىرىس كولەمىن 2 ملن دوزاعا دەيىن جەتكىزۋ جوسپارلانۋدا.

ءبىرىنشى كەزەڭدە شامامەن 100 مىڭ ادام: ينفەكتسيالىق اۋرۋحانا، جەدەل مەديتسينالىق جاردەم، رەانيماتسيا جانە قابىلداۋ بولمەلەرى، سانەپيدقىزمەت مەديتسينا قىزمەتكەرلەرى ەكپە قابىلدايدى.

1 ناۋرىزدا باستالاتىن ەكىنشى كەزەڭدە جالپى ءبىلىم بەرەتىن مەكتەپتەردىڭ، جوو-نىڭ پەداگوگتەرى، مەديتسينالىق قىزمەت قىزمەتكەرلەرى. 1 ساۋىردەن باستاپ ءۇشىنشى كەزەڭدە: مەكتەپ-ينتەرناتتاردىڭ، مەكتەپكە دەيىنگى بالالار مەكەمەلەرىنىڭ پەداگوگتەرى، ستۋدەنتتەر جانە سوزىلمالى اۋرۋى بار ادامدار ەگۋ سالدىرادى.

ۆاكتسينانىڭ قانداي دا ءبىر كومپونەنتىنە اسا جوعارى سەزىمتالدىعى بار ادامدارعا، جۇكتى ايەلدەرگە، 18 جاسقا دەيىنگى جانە 65 جاستان اسقان ادامدارعا تيىمدىلىگى مەن قاۋىپسىزدىگى تۋرالى دەرەكتەردىڭ بولماۋىنا بايلانىستى ەكپە ەگۋگە تىيىم سالىنعان. سونىمەن قاتار، پرەپاراتتى باۋىر مەن بۇيرەكتىڭ سوزىلمالى اۋرۋلارى، قانت ديابەتى، قان ءتۇزۋ جۇيەسىنىڭ اۋرۋلارى، ەپيلەپسيا، ينسۋلت جانە جۇرەك-تامىر جۇيەسى اۋرۋلارى، باستاپقى جانە قايتالاما يممۋندىق تاپشىلىق، اۋتويممۋندى اۋرۋلار، وكپە اۋرۋلارى، استما جانە سوزىلمالى وبسترۋكتيۆتى وكپە اۋرۋلارى، قاتەرلى ىسىك، ونىڭ ىشىندە قاتەرلى قان اۋرۋلارى بولعان جاعدايدا ساقتىقپەن قولدانۋ كەرەك.

31 قاڭتاردا «سپۋتنيك V» ۆاكتسيناسىنىڭ العاشقى 2 050 دوزاسى الماتىعا جەتكىزىلدى. 1 اقپاندا تاڭەرتەڭ ەكپە سەگىز اۋداننىڭ ەمدەۋ مەكەمەلەرىنە تاراتىلادى. ال قالادا بارلىعى 40 ەگۋ پۋنكتى جۇمىس ىستەپ تۇر. سونىمەن قاتار، ۆاكتسينا العاندار 30 مينۋت ىشىندە دارىگەرلەردىڭ باقىلاۋىندا بولاتىن جەكە كابينەت قاراستىرىلعان.

وتاندىق QazCovid-in ۆاكتسيناسىنا كەلەر بولساق، ءبىرىنشى كەزەڭدە شامامەن 2 ملن دوزا ءوندىرۋ جوسپارلانعان. قازىر ول كلينيكالىق سىناقتاردىڭ III كەزەڭىنەن وتكىزىلىپ جاتىر. QazCovid-in ناۋرىزدىڭ سوڭى مەن ساۋىردە تىركەلەدى. ۆاكتسينانىڭ تاجىريبەلىك پارتياسىن شىعارۋ بيولوگيالىق قاۋىپسىزدىك پروبلەمالارى ينستيتۋتىنىڭ بازاسىندا، ال تاجىريبەلىك-ونەركاسىپتىك پارتياسى «انتيگەن» ۇكپ جشس وندىرىستىك الاڭىندا شىعارىلادى. وتاندىق ۆاكتسينانى وندىرۋشىلەر ەكپە تولىعىمەن قاۋىپسىز دەپ سەندىرەدى.

قازاقستان رەسەيدىڭ «سپۋتنيك V» ۆاكتسيناسىن ساتىپ الۋعا 16,8 ميلليارد تەڭگە (40 ميلليون دوللارعا جۋىق) جۇمساماق.

دەنمين مالىمەتىنشە، ءساۋىر-مامىر ايلارىندا بارلىق قازاقستاندىقتار اياسىندا كوروناۆيرۋسقا قارسى تەگىن ەكپە الا الادى. دەگەنمەن، وتكەن اپتادا ۇكىمەت وتىرىسىندا ەل پرەزيدەنتى توقاەۆ «سىناقتان ءساتتى وتكەن جاعدايدا، وتاندىق ۆاكتسينانى قابىلدايمىن» دەگەن. بىراق دەنمين قازاقستاندا 18 جاسقا تولماعان بالالار مەن 65 جاستان اسقاندارعا «ۆاكتسينانىڭ تيىمدىلىگى مەن قاۋىپسىزدىگى تۋرالى مالىمەت جوق بولعاندىقتان»، ەكپە سالىنبايتىنىن حابارلادى. ياعني 67 جاستاعى ەكىنشى پرەزيدەنتكە ەكپە سالىنبايدى. «قازاقستاندىق ەكپەنى سالدىرامىن» دەپ سەندىرگەن پرەزيدەنتتىڭ بۇل مالىمدەمەسى مەن دەنمين حابارالاماسىنداعى قايشىلىق حالىقتىڭ ۆاكتسيناتسياعا دەگەن كۇدىگىن ودان ارى كۇشەيتكەن ءتارىزدى.

"The Qazaq Times"