Sanitarlıq-epidemiologiyalıq baqılau komitetiniñ törayımı Ayjan Esmağambetova jäne Soltüstik Qazaqstan oblısınıñ äkimi Qwmar Aqsaqalov. Fotokollaj: QT

16 qaraşa küni prezident Toqaev «Birqatar oblıstarda  koronavirus indetine qatıstı jaña jağdaylardı jasıru derekteri anıqtalğanın» mälimdegen. Prezidenttiñ aytuınşa, statistikanı bwrmalau faktisi anıqtalğan aymaqtar – ŞQO, SQO, Pavlodar,  Aqmola,  Qostanay oblıstarı. Tipti ol jauaptı şeneunikterdiñ qatısuqan jiında «ötirikti şınday etip jasırğanın» aşıq ayıptağan.

Qaraşa ayınıñ soñında öñir äkimderi Pavlodar oblısında 59, Aqmola oblısında jüzden asa, Qostanay oblısında 57, ŞQO-da 2 jüzden astam, SQO-da jüz şaqtı nauqastıñ mälimeti jalpı esepke keşigip engizilgenin mälimdegen. Bwğan sebep – auruhanalarda nauqastar artqan twsta virus anıqtalğandardıñ mälimetin wsınu procesi keşiktirilgen. Sanitarlıq-epidemiologiyalıq baqılau komitetiniñ bastığı Ayjan Esmağambetovanıñ redakciyağa bergen jauap hatında kadr tapşılığınan jükteme auırlap, derek uaqtılı öñdelip-joldanbağanı aytıladı.

Biraq komitet basşısı men äkimniñ sözi kereağar. SQO äkimi Qwmar Aqsaqalov jüzden astam, al ministrlik ökili Ayjan Esmağambetova 2 jüz şaqtı jağday uaqıtında tirkelmey qalğanın aytqan.

¡Tolığıraq: 27 qaraşa küngi OrtKomdağı baspasöz jiınında Esmağambetova qazan-qaraşa aylarında Soltüstik Qazaqstan oblısında 100-dey keys uaqtılı esepke alınbay, qalıp qoyğanın naqtılap aytqan. Jeltoqsannıñ 8-i ötken esep beru brifinginde äkim Aqsaqalov komitet bastığınıñ sözin eske salğan tilşige vedomstvo cifrın teristep, «Men jüzden asa fakti dedim ğoy» dep qatu jauap bergen edi. Erteñine densaulıq saqtau vice-ministri, bas memlekettik sanitarlıq däriger Erlan Qiyasov bwl qayşılıq turalı swrağanımızda tosırqap, jauaptı jazbaşa joldauğa söz bergen. Ministrlik arada üş aptağa juıq uaqıt ötkende äreñ jauap berdi. Äkimniñ aytanı – qate.

Redakciyağa kelgen resmi jauapqa säykes, ministrlik tekserisi barısında bes birdey öñirde koronavirus PTR testi arqılı anıqtalğan nauqastardıñ sanı esepke alınbay qalğan.

  • Şığıs Qazaqstan oblısında – 273 jağday
  • Soltüstik Qazaqstan oblısında – 177 jağday
  • Aqmola oblısında – 112 jağday
  • Pavlodar oblısında – 59 jağday
  • Qostanay oblısında – 58 jağday

Elde koronavirus jwqqanı PTR testi arqılı naqtılanğan 650-den astam adamnıñ mälimeti jalpı esepke der kezinde kirmey qalğan. Resmi jauapqa qarağanda, qazirgi tañda statistika qalpına keltirilgen.

Osılayşa, ministrlik oblıs äkimi Qwmar Aqsaqalovtıñ deregin joqqa şığardı.

Qazaqstanda ädettegiden birneşe esege kürt ösken biılğı 256 mıñ pnevmoniya keysin esepke qospay, jalpı statistikanı «mausım-şilde qırğınan» keyin jürgize bastağan Ükimettiñ esebine kümänmen qaraytındar köp. Täuelsiz därigerler men medicina sarapşıları, qoğam belsendileri statistikanıñ aşıqtığı men ädildigine seniñkiremeydi.

"The Qazaq Times"