Qazaqstanda 27 qaraşa 826 adamnan koronavirus, al beysenbide 184 adamnan koronavirus pnevmoniyası anıqtaldı. Qazirgi tañda 23 mıñnan astam (KVI+ 11 975, KVI- 11 078) adam auırıp jatır. Auırıp, emdelip jatqan balalar köbeyip keledi. 

#Koronavirus Jwma, qaraşanıñ 27-si koronavirus jwqtırğan 660 adam ayığıp şıqsa, 7 adam ömirden ötken. Jañadan tirkelgen nauqastardıñ eñ köbi –  ŞQO (145) jäne SQO (119), Pavlodar (117) oblıstarı, Almatı qalası (84), Qostanay öñirinde (77). Qızılorda oblısında virus jwqtırğandar müldem anıqtalmağan.

Bir aydan beri epidemiya ahualı uşığıp twrğan ŞQO-dağı jwqtırğandar sanı qaraşa ayı bastalğalı 6 mıñnan astı. Ekinşi qatarda Pavlodar (1863), odan keyin Soltüstik Qazaqstan (1718) oblıstarı ornalasqan. Äzirge jağday twraqtı öñirler – Qızılorda (27), Mañğıstau (31), Türkistan (55) oblıstarı. Mwnıñ barlığı qaraşa ayındağı resmi jiıntıq esep boyınşa.

DenMin-niñ resmi mälimetinşe, emdelip jatqan 12 mıñday nauqastıñ 3294-i auruhanada. Tağı 8681 adam ambulatorlıq terapiyada. Olardıñ arasında 822 bala emdelip jatır. Qaraşanıñ soñğı dekadasında auırıp jatqan balalar kürt köbeydi. 1 qırküyekten beri auırğan 1741 oquşığa KVI+, keminde 1 mıñ balağa KVI- diagnozı qoyılğan. Qazir auru oşağı retinde 66 mektep uaqıtşa karantinde, jabıq twr.

Ahualı naşar 199 nauqastıñ arasında 35 adamnıñ jağdayı qattı qiındağan. Jäne 31 sırqat ökpeni jasandı jeldetu apparatımen tınıstap jatır.

Respublika boyınşa barlığı 130 mıñnan astam adam koronavirus infekciyasın jwqtırsa, emdelip jazılğandarı – 116 mıñnan säl asadı. Bwl jalpı nauqastardıñ 90%-ğa juığı. Qazan ayınıñ ortasınan beri elde koronavirus qayta ekpin ala bastadı. Dese de prezident Toqaev 16 qaraşa küngi mälimdemesinde soltüstik jäne şığıs aymaqtarda statistikanıñ bwrmalanğanın aytqan. Redakciya Pavlodar oblısında 59, Qostanay öñirinde 57, Aqmolada 100, SQO-da 200, ŞQO-da 300 jağdaydıñ jasırılğanın anıqtağan.

#Koronavirus_pnevmoniyası Sonımen qosa, beysenbi küni koronavirus pnevmoniyasına şaldıqqan 184 adam tirkelgen. Tağı 60 adam ayığıp şıqqan, bir adam qaytıs bolğan. Pnevmoniyağa şaldıqqan 42 mıñğa tarta adamnıñ 30 mıñnan astamı jazılıp şıqqan.

DDSW tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ turalı aqparattıq indikatorlar (aymaqtarğa taraluı, nauqastardıñ ahualı, onıñ işindegi stacionar men ambulatorlıq baqılaudağılar sanı, balalar sanı, ÖJJA-men tınıstap jatqandar, ayıqqandar, jaña keyster, qaytqandar) kündelikti jariyalansa, al KVI- deregi soñğı üş körsetkişten özge mälimet berilmeydi. Qazir koronavirus pnevmoniyasınıñ aymaqtarğa taraluı jönindegi deregi ministr äu basta aytqanday kündelikti ne aptasına emes, endi on künde bir-aq beriledi. Onıñ özinde qwjat formatında saytqa jükteledi, vedomstvo resurstarında aşıq äri tüsinikti jariyalanbaydı.

Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Qazaqstanda koronavirus ölimi azaymay twr. Qaraşa ayında 21,5 mıñnan astam adam auırğan jäne 200-den asa adam ömirden ötken. Bwl qazan ayında tirkelgen tolıq jiıntıqtan da köp. Resmi derekke säykes, ötken ayda 9,5 mıñday qazaqstandıq auırğan (4439 adam KVI+, 4984 adam KVI-) jäne 165 adam ömirden ötken (118 adam KVI+, 47 adam KVI-). 

Osılayşa birinşi tolqınnıñ şarıqtau şegi – «mausım-şilde qırğınan» keyingi tamız ayınan beri Qazaqstanda dert jwqtırıp auırğandar 111 mıñnan asqan. Osı tört aydıñ işinde indetten 1,4 mıñday adam ömirden ötken.

Pnevmoniyanıñ koronavirustan basqa türlerine şaldıqqandar sanı 358 mıñğa jetken. Jiıntıq esebi, 13 naurızdan beri COVID-19 infekciyasın jwqtırğandar qatarı 130 mıñnan assa, 1 tamızdan bergi koronavirus pnevmoniyası 42 mıñğa jaqındağan. DDSW mälimetinşe, Qazaqstanda auırğandardıñ sanı 171 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3169-ı (KVI+ / U07.1 – 2020, KVI- / U07.2 – 440, ilespe aurulardan – 709) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 709 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

27 qaraşadağı ahualğa bağa bergen ministr Aleksey Coydıñ sözinşe, ötken aymen salıstırğanda jwqqandar sanı 3,7 ese ösken Qazaqstandağı jağday «ortaşa qauipti» deñgeyde. Bügingi tañda auru jwqtıru qateri jağınan ŞQO, SQO, Palodar, Qostanay jäne Aqmola oblıstarı qızıl, al Almatı qalası sarı aymaqta.  Bir qızığı däl osı küni brifing ötkizgen Almatı qalasınıñ bas memlekettik sanitar-därigeri Jandarbek Bekşinniñ sözi ministrdiñ mälimetine qayşı. Bekşin «jasıl aymaqta» ekenin aytqan.

Almatı qalasındağı bastı köşelerdiñ birindegi qısqı körinis. Foto: aşıq derekköz

*Taqırıpqa replika: Soñğı ret jazda koronavirus pen pnevmoniyanıñ täulik işindegi körsetkişi mıñnan asqan. Naqtıraq aytqanda, tamızdıñ 19-ı küni 1031 jağday tirkelgen edi.

"The Qazaq Times"