Qarjılıq monitoring agenttigi Qazaqstannıñ eks-densaulıq saqtau ministri Eljan Birtanov isine baylanıstı tüsinikteme berdi. 29 qırküyek küni vedomstvonıñ resmi saytında arnayı habarlama jariyalandı. 

Agenttik taratqan aqparatqa qarağanda, vedomstvo Birtanov pen onıñ orınbasarı Oljas Äbişevke qatıstı sotqa deyingi tergep-tekserudi şilde ayında ayaqtağan. Biraq agenttik Qılmıstıq-procestik kodekstiñ 201-babına säykes sotqa deyingi tergep-tekseru derekteri jariya etuge jatpaytının habarlağan.

Birtanov densaulıq saqtau ministrliginiñ aqparattandıru platformasın jaramsız bolsa da qabıldap, "iske qosqanı üşin" ayıptalğan.

"Platforma densaulıq saqtau jüyesindegi mäselelerdi jedel şeşu üşin nauqastar, däri-därmekter jäne medicinalıq bwyımdar turalı barlıq aqparattı biriktirui tiis edi. Biraq platforma eşqaşan jwmıs istemegen jäne onı medicinalıq mekemeler paydalanbaydı. Bwl jinalğan dälelder boyınşa rastaladı. Orındalmağan jwmıs qwnı 4,1 mln AQŞ dolların nemese 1,5 mlrd teñgeni qwraydı" delingen agenttiktiñ 29 qırküyektegi habarlamasında.

Agenttik mälimetinşe, Birtanov sanitarlıq aviaciyanıñ äue kemesin 2020 jıldıñ mausım ayında jeke maqsatta paydalanu kezinde "ökilettikterin asıra paydalandı" degen küdikke de ilingen.

Azattıq radiosınıñ jazuınşa, 28 qırküyek küni Eljan Birtanovtıñ ağası Erjan Birtanov prezident Qasım-Jomart Toqaevqa ündeu jasap, "zañsızdıqtı toqtatuğa" şaqırğan. Ol prezidentke joldağan ündeuinde bauırına tağılğan ayıp jalğan twjırımdarğa negizdelgenin aytıp, qılmıstıq isti toqtatudı swrağan. Qorğau tarabınıñ aytuınşa, "aqparattıq tehnologiya salasında jetekşi orınğa ie iri kompaniya äzirlegen platforma" jwmıs istep twr jäne onı engizu procesi äli tolıq ayaqtalmağan.

50 jastağı Eljan Birtanov "asa kölemdegi byudjet qarjısın jımqırdı" degen küdikpen 2020 jıldın 7 qaraşasınan beri üyqamaqta otır. Onıñ üyqamaq merzimi bwğan deyin birneşe ret wzartılğan. Ol özine tağılğan ayıptardı joqqa şığaradı.

Birtanov 2017 jıldıñ qañtarınan 2020 jıldıñ mausımnıñ soñına deyin densaulıq saqtau ministri qızmetin atqarğan. Ol koronaviruspen auırğandar sanı kürt köbeyip, auruhanalarda orın jetpey qalğan twsta otstavkağa ketken. Onıñ ornına Aleksey Coy qızmetke keldi.

The Qazaq Times