Bası dauğa qalğan bwrınğı densaulıq saqtau ministri Eljan Birtanov. Foto: QR DSM

Densaulıq saqtau salasınıñ eks-ministri Eljan Birtanov pen onıñ orınbasarı bolğan Oljas Äbişevke qatıstı qozğalğan sotqa deyingi tergeu procesi ayaqtaldı. Bwl jöninde prezidenttikke tikeley bağınıstı qarjılıq monitoring agenttigi mälimdedi.

Tergeu organdarınıñ resmi habarlamasına qarağanda, küdiktilerdiñ sebebinen memleketke 1,5 mlrd teñge (4,1 mln dollar) köleminde şığın kelgen. Bwğan deyin Birtanov wstalğan boyda tamız ayında vice-ministr Oljas Äbişevke aqparattıq jüye qwruğa bölingen jartı milliard teñge qarajattı jımqırdı degen ayıp tağılğan.

Qarjılıq monitoring agenttigi Birtanov pen Äbişev qızmettik ökiletin asıra paydalana otırıp «iske jaramsız» aqparattıq resurstı qabıldap-paydalanuğa bergeni üşin ayıptalğanın habarladı.

«Bwl platforma densaulıq saqtau jüyesindegi problemalardı der kezinde şeşuge arnalğan. Onda nauqastar, däri-därmekter jäne medicinalıq bwyımdar turalı barlıq aqparat jinaqtalıp-öñdelui tiis edi. Qazirgi kezde platforma jwmıs istep twrğan joq jäne medicinalıq mekemelerdiñ paydalana almay otır. Qolğa tüsken ayğaqtar sonı däleldeydi», – delingen agenttik baspasöz qızmetiniñ resmi habarında.

Osığan qosa, Birtanovtıñ bıltır mausım ayında «sanitarlıq aviaciyanı jeke maqsatqa paydalandı» degen küdikke ilinip otırğanın da habarlandı. Qazirgi tañda taraptar qılmıstıq is materialdarımen tanısıp jatır.

2020 jılğı «mausım-şilde qırğını» kezinde wstalıp, osı künge deyin üyqamaqta otırğan Birtanov özine tağılğan ayıptardı moyındamaydı.

Juırda jauapker eks-şeneuniktiñ qorğauşısı medplatformanıñ istep twrğanın, onıñ jaramsızdığına resurstı jasağan Ericsson Nikola Tesla ökilderi, ne merdiger, ne qabıldau komissiya müşeleri iske tartılmau sebebin swrağan. İs barısın büge-şügesine deyin baqılap jürgen Azattıq radiosınıñ dereginşe, advokat Dmitriy Kuryaçenko «tergeu organdarınıñ äreketi isti ob'ektivti jürgizuge emes, Birtanovtı qudalauğa bağıttalıp otırğanın» mälimdegen.

3,5 jıl (2017 jılğı qañtar men 2020 jılğı mausım aylarınıñ aralığında) densaulıq saqtau ministri bolğan Eljan Birtanovtiñ ornına bıltır 30 mausım kele sala komandasın qayta jasaqtağan Aleksey Coy tağayındaldı. Keybir sarapşılar Birtanovtı bilik pen ükimettiñ biliksizdiginen kürt örşigen «mausım-şilde qırğınınıñ» jauapkerşiligin moynına aluğa şalınğan qwrbandıq» retinde esepteydi.

"The Qazaq Times"