Foto: QT

Qazaqstanda beybit şeru kezinde şekteu şaraları ädettegidey küşeytildi: 6 mausım – oppoziciyalıq wyımdardıñ mitingisi josparlanğan küni birqatar qalalarda belsendiler wstalıp, Almatı twrğındarına 5 sağat köleminde adam köp jinalatın orındarğa barmau turalı eskertu jasalındı. Qazirdiñ özinde qaladağı Abay alañı dezinfekciyalau maqsatında qorşauğa alınğan. Bwl şara «Qazaqstannıñ demokratiyalıq partiyasın» qwrğısı keletin bastamaşıl toptıñ jetekşisi Janbolat Mamay men oppoziciyalıq sayasatker Mwhtar Äblyazov josparlağan miting künimen qatar kelip otır.

Bügin Almatı qalasınıñ bas sanitar därigeri Jandarbek Bekşinniñ tapsırmasımen qalada adamdar köp jinalatın orındardı dezinfekciyalau jwmıstarı bastaldı. Info RSK jariyalağan ündeude jappay dezinfekciyalau jürgizilgendikten, 5 sağat boyı sırtqa şığuğa bolmaydı dep eskertu jasalğan. Eñ aldımen jwrt köp jinalatın alañdar, köşeler men parkter, skverler, jayau jürginşi aymaqtarı zalalsızdandırıladı. Qoğamdıq keñistikterdi öñdeu jwmıstarına 1200 jwmısşı jäne 135 arnayı tehnika jwmıldırılğan. Osılayşa, Almatı qalası Twrğın üy sayasatı basqarmasınıñ mälimeti boyınşa dezinfekciya jasau üşin qala ortalığında jürip-twru şekteledi.

Almatı Twrğın üy sayasatı basqarması: «Karantin rejiminiñ bäseñdeuine oray koronavirus infekciyasın jwqtırğandar sanınıñ artqanı bayqaladı. Öytkeni, qalalıqtar qoğamdıq orındar – alañdarğa, jayau jüürginşi aymaqtarına, parkter men skverlerge jappay baruda. Onıñ üstine sanitarlıq qauipsizdik erejeleri saqtalmauda, maska tağılmauda, äleumettik qaşıqtıq saqtalmauda. Adamdar köp jinalatın orındar öte qauipti, sebebi virus türli zattardıñ, orındardıñ betterinde ornığıp qaladı», – dep mälimdedi.

Küni keşe Qazaqstannıñ densaulıq saqtau ministri Eljan Birtanov jäne bas prokurorınıñ orınbasarı Bolat Dembaev rwqsat etilmegen miting qarsañında ädettegidey eskertu mänindegi ündeu jariyalap, mitingke qarsılığın aşıq bildirgen. Densaulıq saqtau ministri Eljan Birtanov 4 mausımda ötken onlayn brifingte jwrttı virustıñ ekinşi tolqını jürip jatqanda, karantin kezinde mitingige şıqpaudı eskertti. «Karantin kezinde jwrt köp jinalatın şaralarğa tıyım salınadı. Bwl adamdar üşin qauipti. Zañdı saqtau kerek. Pandemiya kezinde, epidemiya kezinde bas sanitarlıq därigerdiñ qaulısın saqtau kerek. Miting wyımdastıruşılarğa aytarım, mwnday şaralardı keyinge şegere twrğan dwrıs. Miting virustıñ jappay tarauına äser etedi. Biz bwğan qarsımız» – dedi bas däriger.

6 mausımğa oppoziciyalıq sayasatker, «Qazaqstannıñ demokratiyalıq tañdauı» qozğalısınıñ jetekşisi Mwhtar Äblyazov pen «Qazaqstannıñ demokratiyalıq partiyasın» qwrğısı keletin bastamaşıl toptıñ jetekşisi, sayasatker Janbolat Mamay Almatıda halıqtı bilikke qarsı şeruge şaqırğan. Osı rette qalanıñ bas sanitar därigeri Bekşin Äblyazov pen Mamay wyımdastırğan miting qatısuşılarınan koronavirus anıqtalğan jağdayda, jappay oqşaulanatının da eskertti. Sarapşılar däl osı küni Almatıda dezinfekciya jwmıstarı jürgizilip, jwrt köp jinalatın orındarğa barmau turalı eskertu de «adam qwqıqtarın taptau, söz bostandığın şekteudiñ birden-bir ayqın däleli» dep bağalaydı.

«Estitin, äri halıq ünine qwlaq türetin memleket» twjırımdamasın wsınğan prezident Toqaev biligi kezinde de elde ıqtimal miting qarsañında belsendiler qamalıp, miting boladı dep belgilengen orındardıñ qorşauğa alınatını ädetke aynalğan. Osığan deyin halıqaralıq wyımdar Qazaqstan biligi karantindi paydalanıp, adam qwqığın şektep jatır dep mälimdegen. Eldegi qwqıq qorğauşılar da pandemiya kezinde bilik belsendilerge qısımdı küşeytti dep dabıl qaqqan.

"The Qazaq Times"