الماتىدا بەيبىت ميتينگ كەزىندە شەكتەۋ شارالارى كۇشەيتىلدى

قازاقستاندا بەيبىت شەرۋ كەزىندە شەكتەۋ شارالارى ادەتتەگىدەي كۇشەيتىلدى: 6 ماۋسىم – وپپوزيتسيالىق ۇيىمداردىڭ ميتينگىسى جوسپارلانعان كۇنى بىرقاتار قالالاردا بەلسەندىلەر ۇستالىپ، الماتى تۇرعىندارىنا 5 ساعات كولەمىندە ادام كوپ جينالاتىن ورىندارعا بارماۋ تۋرالى ەسكەرتۋ جاسالىندى. قازىردىڭ وزىندە قالاداعى اباي الاڭى دەزينفەكتسيالاۋ ماقساتىندا قورشاۋعا الىنعان. بۇل شارا «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپتىڭ جەتەكشىسى جانبولات ماماي مەن وپپوزيتسيالىق ساياساتكەر مۇحتار ءابليازوۆ جوسپارلاعان ميتينگ كۇنىمەن قاتار كەلىپ وتىر.

بۇگىن الماتى قالاسىنىڭ باس سانيتار دارىگەرى جانداربەك بەكشيننىڭ تاپسىرماسىمەن قالادا ادامدار كوپ جينالاتىن ورىنداردى دەزينفەكتسيالاۋ جۇمىستارى باستالدى. Info رسك جاريالاعان ۇندەۋدە جاپپاي دەزينفەكتسيالاۋ جۇرگىزىلگەندىكتەن، 5 ساعات بويى سىرتقا شىعۋعا بولمايدى دەپ ەسكەرتۋ جاسالعان. ەڭ الدىمەن جۇرت كوپ جينالاتىن الاڭدار، كوشەلەر مەن پاركتەر، سكۆەرلەر، جاياۋ جۇرگىنشى ايماقتارى زالالسىزداندىرىلادى. قوعامدىق كەڭىستىكتەردى وڭدەۋ جۇمىستارىنا 1200 جۇمىسشى جانە 135 ارنايى تەحنيكا جۇمىلدىرىلعان. وسىلايشا، الماتى قالاسى تۇرعىن ءۇي ساياساتى باسقارماسىنىڭ مالىمەتى بويىنشا دەزينفەكتسيا جاساۋ ءۇشىن قالا ورتالىعىندا ءجۇرىپ-تۇرۋ شەكتەلەدى.

الماتى تۇرعىن ءۇي ساياساتى باسقارماسى: «كارانتين رەجيمىنىڭ باسەڭدەۋىنە وراي كوروناۆيرۋس ينفەكتسياسىن جۇقتىرعاندار سانىنىڭ ارتقانى بايقالادى. ويتكەنى، قالالىقتار قوعامدىق ورىندار – الاڭدارعا، جاياۋ جۇۇرگىنشى ايماقتارىنا، پاركتەر مەن سكۆەرلەرگە جاپپاي بارۋدا. ونىڭ ۇستىنە سانيتارلىق قاۋىپسىزدىك ەرەجەلەرى ساقتالماۋدا، ماسكا تاعىلماۋدا، الەۋمەتتىك قاشىقتىق ساقتالماۋدا. ادامدار كوپ جينالاتىن ورىندار وتە قاۋىپتى، سەبەبى ۆيرۋس ءتۇرلى زاتتاردىڭ، ورىنداردىڭ بەتتەرىندە ورنىعىپ قالادى»، – دەپ مالىمدەدى.

كۇنى كەشە قازاقستاننىڭ دەنساۋلىق ساقتاۋ ءمينيسترى ەلجان ءبىرتانوۆ جانە باس پروكۋرورىنىڭ ورىنباسارى بولات دەمباەۆ رۇقسات ەتىلمەگەن ميتينگ قارساڭىندا ادەتتەگىدەي ەسكەرتۋ مانىندەگى ۇندەۋ جاريالاپ، ميتينگكە قارسىلىعىن اشىق بىلدىرگەن. دەنساۋلىق ساقتاۋ ءمينيسترى ەلجان ءبىرتانوۆ 4 ماۋسىمدا وتكەن ونلاين بريفينگتە جۇرتتى ۆيرۋستىڭ ەكىنشى تولقىنى ءجۇرىپ جاتقاندا، كارانتين كەزىندە ميتينگىگە شىقپاۋدى ەسكەرتتى. «كارانتين كەزىندە جۇرت كوپ جينالاتىن شارالارعا تىيىم سالىنادى. بۇل ادامدار ءۇشىن قاۋىپتى. زاڭدى ساقتاۋ كەرەك. پاندەميا كەزىندە، ەپيدەميا كەزىندە باس سانيتارلىق دارىگەردىڭ قاۋلىسىن ساقتاۋ كەرەك. ميتينگ ۇيىمداستىرۋشىلارعا ايتارىم، مۇنداي شارالاردى كەيىنگە شەگەرە تۇرعان دۇرىس. ميتينگ ۆيرۋستىڭ جاپپاي تاراۋىنا اسەر ەتەدى. ءبىز بۇعان قارسىمىز» – دەدى باس دارىگەر.

6 ماۋسىمعا وپپوزيتسيالىق ساياساتكەر، «قازاقستاننىڭ دەموكراتيالىق تاڭداۋى» قوزعالىسىنىڭ جەتەكشىسى مۇحتار ءابليازوۆ پەن «قازاقستاننىڭ دەموكراتيالىق پارتياسىن» قۇرعىسى كەلەتىن باستاماشىل توپتىڭ جەتەكشىسى، ساياساتكەر جانبولات ماماي الماتىدا حالىقتى بيلىككە قارسى شەرۋگە شاقىرعان. وسى رەتتە قالانىڭ باس سانيتار دارىگەرى بەكشين ءابليازوۆ پەن ماماي ۇيىمداستىرعان ميتينگ قاتىسۋشىلارىنان كوروناۆيرۋس انىقتالعان جاعدايدا، جاپپاي وقشاۋلاناتىنىن دا ەسكەرتتى. ساراپشىلار ءدال وسى كۇنى الماتىدا دەزينفەكتسيا جۇمىستارى جۇرگىزىلىپ، جۇرت كوپ جينالاتىن ورىندارعا بارماۋ تۋرالى ەسكەرتۋ دە «ادام قۇقىقتارىن تاپتاۋ، ءسوز بوستاندىعىن شەكتەۋدىڭ بىردەن-ءبىر ايقىن دالەلى» دەپ باعالايدى.

«ەستيتىن، ءارى حالىق ۇنىنە قۇلاق تۇرەتىن مەملەكەت» تۇجىرىمداماسىن ۇسىنعان پرەزيدەنت توقاەۆ بيلىگى كەزىندە دە ەلدە ىقتيمال ميتينگ قارساڭىندا بەلسەندىلەر قامالىپ، ميتينگ بولادى دەپ بەلگىلەنگەن ورىنداردىڭ قورشاۋعا الىناتىنى ادەتكە اينالعان. وسىعان دەيىن حالىقارالىق ۇيىمدار قازاقستان بيلىگى كارانتيندى پايدالانىپ، ادام قۇقىعىن شەكتەپ جاتىر دەپ مالىمدەگەن. ەلدەگى قۇقىق قورعاۋشىلار دا پاندەميا كەزىندە بيلىك بەلسەندىلەرگە قىسىمدى كۇشەيتتى دەپ دابىل قاققان.

"The Qazaq Times"