Bügin, XX ğasırdağı qazaq wlt azattıq qozğalısınıñ jetekşileriniñ biri, dala kökjalı Ospan batır Silämwlınıñ wlt azattığı jolında şahit keşken küni. 1951 jıldıñ 29 säuirinde Ospan batır Ürimjide Qıtay kommunisteri jağınan atıldı.

Ospan batır ötken ğasırdıñ eñ bir almağayıp jıldarında wlt azattıq qozğalısına jetekşilik etip, şığısta Qıtaydıñ eki ükimeti, janında Moñğoliya, oñtüstiginde taranşı, soltüstigi men batısında keñestik qızıl imperiya arasında arıptalasıp, bel şeşpey küres jürgizdi. Ospan batırdan bwrın bastalğan wlt azattıq qozğalıs Ospan batır qaza bolğanğa deyin qarqındı jalğastı. Tipti kökjal batır oqqa wşqannan keyin de Täñirtaudıñ soltüstigi men Altay tauı arasın jaylağan qazaqtardıñ ülkendi-kişili köterilisteri bolıp twrdı. Degenmen, batıs-şığıstı birdey qımtağan qızıl imperiyalar buırqanğan wlt azattıq qozğalıstarın janıştap, basıp tastadı.

Bwl künde Ospan batır turalı zertteuler qarqındı jürip jatır. Elimizde ğana emes, Europanıñ birqatar elderinde, Türkiya men AQŞ-ta da Ospan batırdıñ küres jolın, ömir tarihın zerttep zerdelep jürgen zerttermender bar. Bıltır, 2019 jılı Ospan batır Silämwlınıñ düniege kelgenine 120 tolu merey toyına oray «Er Jänibek» halıqaralıq qoğamdıq qorınıñ wyımdastıruında birqatar şaralar ötkizildi. Ospan batırdı taqırıp etken ğılımi konferenciya, suret körmesi ötkizilgen edi. Bwda bir aydan asa uaqıt bwrın türik tarihşısı Ömer Qwldıñ «Altay qıranı Ospan batır han» attı zertteu eñbegi Almatıda twsauın kesken bolatın.

.Birqatar zertteuşiler Ospan batırdıñ atıluı kommunistik Qıtay biligi üşin ülken sayasi, strategiyalıq qatelik dep körsetedi. Sebebi, Ospan batır Qıtaydan basqa elderde wlt azattıq köterilisiniñ jetekşisi, wlt azattığı men nanım-senim bostandığı, derbestik jolında küresken tarihi twlğa retinde belgili. Onday twlğanıñ kommunistik bilik jağınan atıluı atalmış qızıl ükimettiñ wlt azattığın janıştauşı, şapqınşı küş ekenin däleldey tüsedi. Jäne Ospan batırdıñ basqa emes, qazirgi Şıñjañ ortalığı Ürimji qalasında atıluınıñ özi de tarihi mañızğa ie dep sanaydı.

Ospan batır öz dwşpanınıñ qolınan qaza tapqanımen onıñ küres ruhı Qıtay biligin küni büginge deyin alañdatadı. Sondıqtan da Ospan turalı tarihi şındıqtı aşu, onı wlt azattıq küreskeri retinde atau Qıtayda, äsirese Şıñjañ jerinde qatañ şektelgen.

Eliniñ azattığı üşin aqtıq demi qalğanşa ayanbağan kökjal batırdıñ ruhına tağzım!

“The Qazaq Times”