Qazaqstannıñ Aqtöbe aumağınan tabılğan zımıran bölikteri Reseydiñ atmosferanıñ joğarğı qabatın zertteuge arnalğan geofizikalıq raketasına tiesili. Bwl turalı QR Qorğanıs ministrliginiñ baspasöz qızmeti habarladı.

Apat bolğan jerde radiaciyalıq fondıq ölşeuler, topıraq pen qardıñ sınamaları alınğan. Vedomstvo taratqan habarlamada: «Qaldıqtar qorşağan ortağa da, Aqtöbe oblısınıñ twrğındarına da qauip töndirmeydi. Gamma säulelenudiñ dozası osı aymaqtıñ tabiği radiaciyalıq fonınan aspaydı», — delingen.

Resmi ökilder: «Sonday-aq, biz reseylik BAQ-tıñ qaldıqtar «Iskander-M» zımıranına tiesili degen aqparattyuı rastalmağanın habarlaymız. Qazaqstan Respublikasındağı poligondardı Resey Federaciyası memleket aralıq kelisimge säykes jalğa aladı. Ministrlik osı kelisimge tüzetuler engizedi, eñ aldımen poligondardı paydalanu kezinde qauipsizdik şaraların küşeytedi», — deydi

9 qañtar tüs kezinde, naqtıraq aytqanda sağat 14:30 şamasında (astana uaqıtımen 15:30) Aqtöbe oblısına qarastı Bayğanin audanınıñ Noğaytı jäne Ebeyti eldi mekenderiniñ aumağına örtengen temir bölşek tüsken.

11 qañtarda Qazaqstan Resey Qorğanıs ministrligine Aqtöbe aumağında ötkizgen sınaq, jattığular kezinde zımıran qaldıqtarı qwlağanın habarlağan. Qazaqstan tarabı «zımırandar jattığulardıñ jıldıq josparı men kestesine säykes jüzege asırıldı. Zımırannıñ qwlauı saldarınan qwrban bolğandar joq» — dep qısqa qayırğan.

2013 jılı Qazaqstan men Resey Federaciyası arasında «Bayqoñır» ğarış aylağınan wşıru kezinde wşıru apparatınıñ bölşegi qwlaytın aymaq retinde Qazaqstan aumağınan jer uçaskesin beru turalı kelisimge qol qoyılğan bolatın. Sol uaqıttan beri Qazaqstannıñ är aumağına birneşe märte zımıran qwlağan.

"The Qazaq Times"