قازاقستاننىڭ اقتوبە اۋماعىنان تابىلعان زىمىران بولىكتەرى رەسەيدىڭ اتموسفەرانىڭ جوعارعى قاباتىن زەرتتەۋگە ارنالعان گەوفيزيكالىق راكەتاسىنا تيەسىلى. بۇل تۋرالى قر قورعانىس مينيسترلىگىنىڭ ءباسپاسوز قىزمەتى حابارلادى.

اپات بولعان جەردە رادياتسيالىق فوندىق ولشەۋلەر، توپىراق پەن قاردىڭ سىنامالارى الىنعان. ۆەدومستۆو تاراتقان حابارلامادا: «قالدىقتار قورشاعان ورتاعا دا، اقتوبە وبلىسىنىڭ تۇرعىندارىنا دا قاۋىپ توندىرمەيدى. گامما ساۋلەلەنۋدىڭ دوزاسى وسى ايماقتىڭ تابيعي رادياتسيالىق فونىنان اسپايدى»، — دەلىنگەن.

رەسمي وكىلدەر: «سونداي-اق، ءبىز رەسەيلىك باق-تىڭ قالدىقتار «يسكاندەر-م» زىمىرانىنا تيەسىلى دەگەن اقپاراتتيۋى راستالماعانىن حابارلايمىز. قازاقستان رەسپۋبليكاسىنداعى پوليگونداردى رەسەي فەدەراتسياسى مەملەكەت ارالىق كەلىسىمگە سايكەس جالعا الادى. مينيسترلىك وسى كەلىسىمگە تۇزەتۋلەر ەنگىزەدى، ەڭ الدىمەن پوليگونداردى پايدالانۋ كەزىندە قاۋىپسىزدىك شارالارىن كۇشەيتەدى»، — دەيدى

9 قاڭتار ءتۇس كەزىندە، ناقتىراق ايتقاندا ساعات 14:30 شاماسىندا (استانا ۋاقىتىمەن 15:30) اقتوبە وبلىسىنا قاراستى بايعانين اۋدانىنىڭ نوعايتى جانە ەبەيتى ەلدى مەكەندەرىنىڭ اۋماعىنا ورتەنگەن تەمىر بولشەك تۇسكەن.

11 قاڭتاردا قازاقستان رەسەي قورعانىس مينيسترلىگىنە اقتوبە اۋماعىندا وتكىزگەن سىناق، جاتتىعۋلار كەزىندە زىمىران قالدىقتارى قۇلاعانىن حابارلاعان. قازاقستان تارابى «زىمىراندار جاتتىعۋلاردىڭ جىلدىق جوسپارى مەن كەستەسىنە سايكەس جۇزەگە اسىرىلدى. زىمىراننىڭ قۇلاۋى سالدارىنان قۇربان بولعاندار جوق» — دەپ قىسقا قايىرعان.

2013 جىلى قازاقستان مەن رەسەي فەدەراتسياسى اراسىندا «بايقوڭىر» عارىش ايلاعىنان ۇشىرۋ كەزىندە ۇشىرۋ اپپاراتىنىڭ بولشەگى قۇلايتىن ايماق رەتىندە قازاقستان اۋماعىنان جەر ۋچاسكەسىن بەرۋ تۋرالى كەلىسىمگە قول قويىلعان بولاتىن. سول ۋاقىتتان بەرى قازاقستاننىڭ ءار اۋماعىنا بىرنەشە مارتە زىمىران قۇلاعان.

"The Qazaq Times"